144
Kure Ritonõpo ehtoh ekarory tuisa a
Tawi nymerohpyry.
1 “Kure mase, Ritonõpo,” kahtoko Kuesẽkomo a!
Jewomaneme mana; jamorepãko mana etonatohme,
tuaro jehtohme yzehnotokõ poremãkapotohme.
2 Jewomaneme mana, jakorehmaneme roropa.
Ytapyĩme jamihmã mana, ypynanohne roropa.
Enetuputyryke ya imaro osewomãko ase.
Imehnõ nonory põkõ poremãkãko mã ynororo,
ypoetoryme toto ehtohme.
3 Ritonõpo, ahnome rokẽ ynanase;
oty katohme yna poko osenetupuhnõko mah?
Orihketõme rokẽ ynanase mãpyra yna pyno mase.
4 Anonokane sã ynanase, pu katoh samo;
isene yna ehtoh jerutumã sã mana axĩtao rokene.
5 Ritonõpo, kapu etapuruhmakako oyhtotohme!
Ypy tõ apoko, mame orexĩto tũtãko mana.
6 Nenenehkane enehpoko ozehno
exiketõ aropotohme sapararahme;
pyrou tõ ekomako toto epatohme tururume.
7 Oesae kapu ae kuanỹko oemary ke,
zue ae kypynanohko.
Kuewomako awaro pyra exiketõ wino,
8 zae pyra rokẽ toto exiryke.
“Ajohpe pyra ase,” ãko toh mã repe,
yrome ajohpe mã toto tõmirykõ etaporyhtao ro.
9 Onetaryme, Ritonõpo, eremiatoh kasenato ke
eremiãko ase;
rira etõko ase 10me toare exikety ke,
eremiãko ase oeahmaryme.
10 Omoro mase tuisa tõ pynanohneme,
Tawi ewomaneme mase onetapara imehnõ ehtohme.
11 Kypynanohko, kuewomako yzehno exiketõ wino,
zae pyra rokẽ toexirykõke.
“Ajohpe pyra,” ãko toh mã repe, yrome ajohpe mã toto.
12 Ah yna mũkuru tõ poetome toto ahtao,
otyro zoko sã nexĩ toto, jamihme,
ah yna ẽxiry tõ tuisa tapyĩ konõto ipuroxikihny sã
nexĩ toto, emeporyme!
13 Ah yna napyry tapyĩ tõ pehme nexĩ kehko,
emero rokẽ tykyrysã ke!
Ah yna eky tõ kaneru tõkehko nemã toto
10 miumãkõme toto ehtohme, yna nonory po!
14 Ah yna eky tõ pui tõkehko nemã toto,
ipoenõ epukara ehtohme, orihpyra ehtohme roropa!
Ah kui kara roropa osema tao nexĩ toto!
15 Tãkye mã mokaro morohne nae exiketomo!
Tãkye roropa mã toto
Tosẽkõme Ritonõpo enetupuhnanomo!