145
Eremiatoh sero Ritonõpo eahmaryme
Tawi nymerohpyry
1 Ritonõpo Jesemy, ytuisaryme mase;
imehxo oehtoh ekarõko ase, “Kure mase,”
kakehpyra ase jũme.
2 Kokoro rokẽ, “Kure mase,” ãko ase oya.
Jũme oeahmakehpyra ase.
3 Imehxo Kuesẽkõ mana,
eahmary kyya xine kure mana;
imehxo aexiry kuosenetupuhtohkõ motye mana.
4 Ritonõpo, onyrityã kurã ekarõko toiro emãsamo imepỹ emãsamo a, mame oeahmãko mã toto onyrityã poko ajamitunuru ke.
5 Oturũko mã toto xixi motye saereme oehtoh poko,
imehxo oehtoh poko roropa.
Morohne poko osenetupuhnõko ase, onyrityã osenuruhkatoh tonõ poko.
6 Oturũko mã toto onyrityã poko ajamitunuru ke,
ywy roropa imehxo oehtoh ekarõko ase.
7 Kure oehtoh poko emero oturũko mã toto,
eremiãko roropa mã toto tãtãkyemarykõme
anamonohpyra oehtoh poko.
8 Ritonõpo Kuesẽkõ kure mana, kypyno xine mana;
axĩ pyra zekĩtãko mana, kuãnopyrykõ se pyra mana,
kypynanopyrykõ sehxo mana.
9 Kure Kuesẽkõ mana ahno poko emero,
tynyrityã pyno mana emero porehme.
10 Ritonõpo yna Esemy, oeahmãko mã toto
onyrityã emero, “Kure mase,” ãko oya mã toto,
õmiry omipona exiketomo.
11 Oturũko mã toto, xixi saerehkatoh motye,
tuisamehxo oehtoh poko, ajamitunuru poko oturũko roropa mã toto,
12 onyrityã ajamitunuru ke zuaro
emero nono põkõ ehtohme, xixi saerehkatoh motye tuisamehxo oehtoh poko roropa.
13 Tuisame oehtoh jũme mana,
emero esẽme oehtoh exikehpyra mana.
Ritonõpo Kuesẽkõ tõmihpyry ae ro emero rĩko mana,
anamonohpyra mana emero riryhtao eya.
14 Etuarimaketõ akorehmãko mana,
aepukatyã anỹnõko roropa mana.
15 Isene exiketõ emero enẽko mã toto,
ewino tynapyrykõ eraximãko mã toto,
inapyrykõ ekarõko eya xine mana ise toto ahtao.
16 Tonahsẽ ekaroryhtao Kuesẽkomo a epo exĩko mana,
isene exiketõ pune, emero tuesapare exĩko mã toto.
17 Kuesẽkõ zae mana emero riry poko,
anamonohpyra mana emero riryhtao eya.
18 Ameke pyra Ritonõpo mana ahno a,
ekaroporyhtao eya xine takorehmapotohkõme,
ajohpe pyra ekaroporyhtao eya xine.
19 Aomiry omipona exiketõ ise ehtoh ekarõko mana;
toto kohtary etãko mana,
ipynanohtorỹko mana aorikyrykõino.
20 Typyno exiketõ ewomãko Ritonõpo mana,
yrome popyra exiketõ enahkãko mana.
21 “Kure mase, Ritonõpo,” kakehpyra ase,
Kuesẽkõ eahmaryme.
Ah isene exiketõ emero Ritonõpo kurã eahmã toto,
jũme rahkene.