22
Etuarimatoh poko, eahmary poko
Sero saumu tymerose Tawi a.
1 Ritonõpo Jesemy, oty katohme kurumekase?
Oty katoh ameke toehse mahno?
Kykohmase repe jakorehmatohme
yrome jomiry onetara mexiase.
2 Ritonõpo, saereme ahtao okohmãko ase,
yrome jezuhpyra mase.
Koko okohmãko ase, yrome oseremasaromepyra ase.
3 Tuisa apõ po typorohse mase, Ritonõpo kurano.
Omoro mase Izyraeu tõ neahmahpyry.
4 Typynanohnekõme, tonetupuhse
omoro yna tamuru tomo a;
omoro tonetupuhse eya xine, oya typynanohse toto.
5 Tõturuse toto oya, takorehmatohkõ poko oya,
tõsepynanohse toto, tyzehnotokõ wino;
amonohkara oehtoh tonetupuhse eya xine,
moromeĩpo tãkye rokẽ toh nexiase.
6 Yrome ywy orukome rokẽ ase; ahnome pyra.
Jeunohnõko mã toto emero,
ypoihtõko roropa mã toto.
7 Jeneryhtao emero eunohnõko mã toto,
tunurukõ enepõko mã toto,
tupuhpyrykõ wykywykyhmãko mã toto.
8 Ynara ãko mã toto: “Ritonõpo enetupuhnõko
mase Oesẽme; oty katohme opynanohpyra hnae?
Ose ynororo ahtao oty katohme ãkorehmara nae?”
ãko mã toto ya.
9 Omoro, Ritonõpo, kuenehne sero nono pona
tonuruse jahtao,
mame poetome jahtao kuewomane.
10 Jenurutopõpyry poe tõsekarose ywy oya;
jũme Jesẽme mexiase, Ritonõpo.
11 Ameke pyra exiko ya, jetuarimatoh oehsasaka
mana, mame takorehmaneke pyra ase.
12 Pui orutua kõ zomyehmary sã jomyehmãko
jepetõkara mana,
Pasã nonory poe pui aehtyã samo.
13 Reão tõ samo ẽtakãko mã toto,
pyhseky kary se mã toto ypona.
14 Yjamitunuru tonahse; ywy ase tuna tukuãse
aexihpyry samo nono pona.
Yzehpyry tõ toesyryhmase tosae xine;
jeano moronapu sã nase toetunamase ahtao.
15 Jesenary tonore nase, putokane samo.
Unuru tõsexihse sã nase ỹtary pokona.
Kynomoase aorikyhpyry samo, nono po.
16 Popyra exiketõ jomyehmãko mã toto;
kaikuxi tõ sã ya oehnõko mã toto,
jemah xihxihkãko mã toto upupuru roropa
xihxihkãko mã toto.
17 Yzehpyry tõ jarao exĩko mana.
Yzehpyry tuhke exiry kuhnõko mã toto.
Jenẽko jepetõkara, okynano jenekehpyra mã toto.
18 Jupõ apiakãko mã toto tupõkõme.
Tuaro ehtoh emãko mã toto
juponỹpyry esẽ menekatohme.
19 Ritonõpo, ya ameke pyra exiko!
Axĩ ke kypynanohko.
20 Kuewomako jetapara toto ehtohme,
isene jehtohme, kaikuxi tomo a jesekaryino.
21 Kypynanohko mokaro reão tõ poe;
osewomasaromepyra ase, mokaro pui, zehnotokohtae.
22 Mame wekyry tõ zurũko ase onyrityã poko; oeahmãko ase toto rãnao, oximõme toto ahtao:
23 “Ritonõpo a eremiatoko, emero ipoetory tomo.
Inyrityã kurã ekarotoko, Jako pakomotyamo!
Oesẽkõme eahmatoko Izyraeu tomo!
24 Tymõkomokãkara onurumekara mana,
wenikehpyra roropa mana toto
etuarimatopõpyry poko.
Otonẽpyra ynororo toto wino,
yrome ezuhnõko mana tykohmase ahtao eya xine.”
25 Ritonõpo, imoihmãkõ rãnao oeahmãko ase
onyrityã poko.
Õmihpyry omipona exiketõ neneryme
ynekarory tõ ekarõko ase oya, jomihpyry ae ro.
26 Tymõkomokãkara otuhnõko mã toto,
tuesapare exĩko; Ritonõpo a oehketõ eremiãko
mã toto, eahmaryme.
Kure rokẽ toto ripory se ase eya, jũme, exikehpyra.
27 Imeimehnõ nonory põkõ emero osenetupuhnõko
mã toto Ritonõpo poko.
Sero nono etyhpyry po eramãko mã toto eya,
Tosẽkõme aenetupuhnõko mã toto,
eahmãko mã toto, emero.
28 Tuisame Ritonõpo mana,
emero nono põkõ Esẽme mana.
29 Tymõkomoke exiketõ tosekumuru po
porohnõko mã toto oẽpataka.
Sero nono põkõ emero tosekumuru po
porohnõko mã toto oẽpataka.
Orihketõme mã toto.
30 Ahno imeĩpo exiketõ aomipona exĩko;
Ritonõpo Kuesẽkõ poko typoenõ zurũko mã toto,
imepỹ zumakahpõkomo a roropa.
31 Enurupyra ro exiketõ etãko mã toto,
turuse toto ahtao Ritonõpo nyrityã poko:
“Eya typoetory tõ typynanohse!” ãko mã toto.