27
Towomase Ritonõpo a
Tawi nymerohpyry.
1 Ritonõpo Jesemy jezurume mana,
ypynanohneme roropa;
enaromyra exĩko ase.
Jewomãko Ritonõpo mana popyra ehtoh
ypoko pyra ehtohme;
imehnõ zuno pyra jyrĩko mana ipunaka.
2 Popyra exiketõ etonary se ahtao ymaro,
jetapary kukuruhtao roropa eya xine
osetapãko mã toto, epukãko.
3 Tapuruse jahtao soutatu tomo a,
zuno pyra jyrĩko mase;
ymaro jepetõkara etonaryhtao,
Ritonõpo onenetupuhkehpyra exĩko ase.
4 Toiro ekaropoase Ritonõpo a,
moro se rokẽ ase eya: Itapyĩ tao jexiry se ase jũme,
isene ro jahtao, atãkyematohme kure aexiry poko,
zae ehtoh poko ekaropotohme eya.
5 Mame popyra ehtoh toehse ahtao
jewomãko mana tytapyĩ tao.
Jukurãkãko mana Tytapyĩ kurã tao,
jewomãko mana kaetoko exikety ao, topu konõto po.
6 Moro sã jepetõkara poremãkapõko ase,
japuruhpõkomo. Kohtãko ase atãkyemaryme,
okyno tõ zahkãko ase ynekaroryme Itapyĩ tao;
eremiãko ase Ritonõpo Kuesẽkõ eahmaryme.
7 Ritonõpo, jomiry etako okohmaryhtao ya!
Ypyno exiko, kuezuhko roropa.
8 Ynara mase ya: “Osehko jeahmase.”
Kuezukuase: “Oehnõko ase oeahmase,
Jesemy Ritonõpo.”
9 Otonẽpyra exiko ywinoino.
Yzehno pyra exiko; owinoino jaropopyra exiko.
Jakorehmahpono, jurumekara exiko, toiroro
ynomopyra exiko, Ritonõpo Ypynanohne.
10 Jurumekaryhtao papa tomo a, aja maro,
ypyno ro mase exĩko, Ritonõpo.
11 Ritonõpo Jesemy, kuamorepako zae ehtoh poko õmiry omipona jehtohme.
Kuaroko zae ehtoh poko jehtohme,
kuewomako jepetõkara tuhke exiryke.
12 Jekaropyra exiko jepetõkara a,
ajohpe jyhxirõko mã toto jenaroximãko mã toto.
13 Zuaro ase isene ro jahtao Ritonõpo Jesẽ
nyriry kurã enẽko ase orihpyra ro jahtao.
14 Ritonõpo enetupuhko. Wenikehpyra exiko
inyrihpyry poko, enaromyra roropa exiko.
Ritonõpo Kuesẽkõ enetupuhko.