28
Takorehmapotoh Ritonõpo a
Tawi nymerohpyry.
1 Ritonõpo Jewomane, okohmãko ase;
kuakorehmako! Otato exiko.
Jezuhpyra awahtao, mokaro orihketõ maro
exĩko ase, yhtõko mã toto aorihtyã esaka.
2 Jomiry etako okohmaryhtao ya
jakorehmatohme oya, jemary tõ anymyryhtao
ya Atapyĩ kurã ẽpataka.
3 Juãnohpyra exiko iirypyryme exiketõ maro,
popyra ehtoh poko exikehpyra exiketõ maro.
Osepeme sã oturũko mã toto,
yrome ikurohtao xine popyra mã toto.
4 Mokaro zuãnohko inyrityã epehpyryme,
popyra toto nyrityã emetakame.
Popyra exiketõ zuãnohko tyyrypyhpyke toexirykõke.
5 Tuaro toexirykõ se pyra mã toto
Ritonõpo nyrihpyry poko.
Inyrityã tyjamitunuru ke,
morohne poko osenetupuhpyra mã toto;
naeroro toto wãnohnõko mana,
jũme toto enahkapõko mana.
6 “Kure mase,” sykatone Ritonõpo Kuesẽkomo a,
jomiry totase eya exiryke
tykohmase ahtao ya jakorehmatohme.
7 Jewomãko Ritonõpo mana,
yjamitunurume roropa mana;
Jesẽme enetupuhnõko ase. Jakorehmãko mana;
morara exiryke atãkyemãko ase, eremiatoh kurã
eremiãko ase Ritonõpo eahmaryme.
8 Typoetory tõ ewomãko Kuesẽkõ mana.
Inymenekahpyry tuisame ewomãko mana.
9 Opoetory tõ ipynanohko, Ritonõpo,
kure rokẽ toto tyriko opoetoryme aexirykõke!
Kaneru pyno exikety sã opoetory tõ pyno exiko,
jũme toto pyno exiko.