32
Osekarõko, akorokãko
Tawi nymerohpyry.
1 Tãkye mã mokyro, popyra aexihpyry
topehmase ahtao Ritonõpo a,
iirypyry tykorokase ahtao eya.
2 Tãkye mã mokyro onyhxiropyra Ritonõpo ahtao
popyra ehtoh poko, ajohpe pyra roropa
ynororo ahtao imehnõ onenekunohpyra exiryke!
3 Yyrypyry onekaropyra jahtao totaehse exiase,
yxitary poko rokẽ kohmãnõko exiase.
4 Saereme ahtao koko roropa tuãnohse exiase oya,
Ritonõpo; yjamitunuru tonahse axitaku samo
axitũ toehse ahtao eina ahtao.
5 Mame osekaroase oya, yyrypyry ekaroase,
popyra jehtoh ononẽpyra exiase,
zae pyra jehtopõpyry emero ekaroase oya,
mame yyrypyry tõ emero mykorokase.
6 Morara exiryke, popyra ehtoh toehse ahtao,
kure opoetory tõ otururu exiry emero oya;
pohkane konõto sã popyra ehtoh toehse ahtao
taryporyke, toto pona eporehkara exĩko mana.
7 Omoro mase jotonẽtohme;
jewomãko mase etuarimara jehtohme.
Eremiãko ase imehnõ netaryme ypynanohtopõpyry
poko oya, towomase jexiryke oya.
8 Ynara tykase Ritonõpo Jesemy ya:
“Ãmorepãko ase oesemary ae zae oytotohme;
ãkorehmãko ase oesemary menekary poko,
zae ehtoh enepõko ase oya tuaro oehtohme.
9 Tuaro pyra exiketõ sã pyra exiko, kawaru samo
te, mura sã roropa, kurimene se mã toto ĩtao,
eary se roropa zae toto ytotohme tosẽkõ omipona.”
10 Popyra exiketõ etuarimãko mã toto
pitiko rokẽ pyra. Yrome Ritonõpo enetupuhnanõ
Tosẽme, towomase mã toto ipyno xine aexiryke.
11 Tãkye ehtoko emero zae ehtoh poko exiketomo,
Ritonõpo nyrihpyry poko atãkyematoko!
Eremiatoko tãkye rahkene,
amarokõ emero aomiry omipona exiketomo!