31
Ritonõpo enetupuhnõko
Tawi nymerohpyry.
1 Ritonõpo yna Esemy, oya ytõko ase jewomapose;
yporemãkapopyra exiko jepetõkara a.
Zae mase; kuakorehmako ajohpãme samo.
2 Jomiry etako! Kypynanohko seromaroro!
Ajohpãme sã topu konõtome exiko ytapyĩme,
jewomatohme, ypynanohneme.
3 Ytapyĩme mase, topu konõtome,
josewomatoh jamihmãme mase;
kuaroko, kuamorepako õmihpyry ae ro ya.
4 Kuanỹko ahno apoitoh tae,
imehnõ nyrihpyry tokare pyra japoitohme,
omoro mase josewomatohme.
5 Oya isene jehtoh ekarõko ase.
Ypynanohnõko mase, Ritonõpo,
jũme amonohpyra exiketyme oexiryke, Jesemy.
6 Imehnõ neponãmary eahmananõ se pyra mase
ipunaka; ajohpe rokẽ mã toto.
Yrome ywy oenetupuhnõko ase.
7 Tãkye exĩko ase,
atãkyemãko roropa ase ypyno oexiryke.
Jetuarimatoh enẽko mase,
tyrohsẽ hpe jehtoh waro mase.
8 Japoipopyra mexiase jepetõkara a.
Osa konõto mekaroase ya,
jytotohme jytory se jehtoh pona torẽtyke pyra.
9 Ritonõpo, Jesemy, ypyno exiko,
etuarimãko jexiryke!
Jenuru typenekehse nase, itamurume yxitary
poko; tapotũkehse upũ mana, juzenu roropa.
10 Yjamitunuru tonahse jemynyhmaryke;
okyna hkopyra orihnõko ase yxitaryke.
Jamihme pyra ase tyrohsẽ ke;
yzehpyry roropa osenahkãko nase.
11 Ypoihtõko jepetõkara mana,
ykerekeremãko ypãnary tomo.
Juaro exiketõ juno mã toto,
epãko mã toto jeneryhtao osema tao.
12 Tuenikehse ywy jepe tomo a emero,
toorihse jehtoh samo;
typahse aexihpyry sã ase.
13 Jepetõkara tuhke etãko ase puti puti ãko;
jenaroximãko imehnõ mana emero rokẽ po.
Atamorepãko mã toto yyryhmary poko,
jetapatohme tyya xine.
14 Yrome jewomaneme oenetupuhnõko ase, Ritonõpo;
omoro mase Jesemy.
15 Ypyno exikehpyra mase.
Kypynanohko jepetõkara winoino,
yyryhmary se exikehpyra exiketõ winoino.
16 Nupunato kueneko, opoetoryme ase;
kypynanohko ypyno oexiryke.
17 Ritonõpo Jesemy, okohmãko ase.
Yporemãkapopyra exiko jepetõkara a.
Mokaro popyra exiketõ iporemãkapoko,
mynyhme toto ytotohme aorihtyã esaka!
18 Ah ajohpe exiketõ mynyhme nexĩ toto,
mokaro epyrypaketomo,
imehnõ motye kure osekaroketomo,
imehnõ ajohpe pyra exiketõ poihtonanomo!
19 Kure kuhse okyryry tõ onukurãkahpyry
ekarotohme õmiry omipona exiketomo a!
Kure oehtoh enẽko imehnõ mana emero,
oenetupuhnanõ ewomary oya enẽko mã toto.
20 Imaro xine oehtoh ke toto ewomãko mase,
toto ryhmary kuhtoh wino popyra exiketomo a.
Otonẽtoh jamihmã tao toto zonẽnõko mase
toto hxirory tõ wino topetõkara a.
21 Kure kuhse Ritonõpo Kuesẽkõ mana!
Japururuhtao jepetõkara a, etonatohme ymaro,
ypyno toexiry tonepose eya. Osenuruhkãko ase.
22 Enaromỹke toehse ywy, taropose ywy eya
ẽpatary winoino, ekaroase repe.
Yrome ykohtary totase eya jakorehmatohme
tykohmase ynororo ahtao ya.
23 Ritonõpo pyno ehtoko,
aomiry omipona exiketõ emero!
Aomiry omipona exiketõ ewomãko mana,
yrome epyrypaketõ wãnohnõko mana
inyrityã emetakame.
24 Ajamihtatoko orẽpyra roropa ehtoko,
amarokõ emero Oesẽkõme Ritonõpo enetupuhnanomo!