45
Tuisa pytatoh eremiatopo
Kora tõ nymerohpyry.
1 Omi kurã oehkehpyra mana ukurohtaka sero
eremiatoh riryhtao ya tuisa eahmatohme.
Unuru pape merotoh sã nase,
emese kure pape merone emary ao.
2 Tuisa, nuaseme potu mase, imehnõ motye emero,
imehnõ zururu poko emese kure mase.
Moino ro kure rokẽ orĩko Ritonõpo mana.
3 Ometỹ eary pokona atapemã tyriko,
tuisa jamihmehxo exikety, orẽpyrahxo, tuisamehxo!
4 Kawaru po orẽpyra mase ytõko,
okyryry tõ mã zemizemiãko xixi ke,
ajohpe pyra ehtoh ewomãko mase,
zae rokẽ imehnõ apiakãko mase.
Ajamitunuru ke imoihmãkõ poremãkãko mase.
5 Opyre, pyrou tõ pohsuime mã kehko,
ozehnotokõ eano posohkãko mã kehko;
imehnõ nonory põkõ epukãko mã toto omyhtokoxi.
6 Tuisame oehtoh, Ritonõpo nekarohpyryme oya,
jũme exikehpyra mana.
Zae rokẽ erohnõko mase tuisame oehtoh poko.
7 Zae ehtoh pyno mase,
popyra ehtoh se pyra mase ipunaka.
Morara exiryke Ritonõpo Oesemy a
tymenekase mexiase, oya tãkye ehtoh
ekaroase imehnõ tuisa tomo a inekarohpyry motye.
8 Ixtaratu kurã nae nase oupõ poko,
mira te, aroe tomo, enara.
Eremiatoh etõko mã toto onetaryme
tuisa tapyĩ tõ konõto tao,
maafim ke emeporyme.
9 Nohpo tõ maro atapyĩ konõto tao,
tuisa tõ ẽxiry tõ mana.
Ãpotunuru wino tuisa pyty mana,
uuru kurã risẽ ke tynamuruke.
10 Tuisa pytyme exikety, jomiry etako:
“Oekyry tõ poko owenikehko,
omy tapyĩ taõkomo.
11 Oryxime potu mase,
morara exiryke opyno exĩko tuisa mana;
kure rokẽ aomiry omipona exiko oniome exiryke.
12 Tuisa pytyme exikety, pata Tiro põkõ tynekarory kurã enehnõko oya mana;
tuhke tymõkomokãmo kure oriry se exĩko.”
13 Tuisa tapyĩ konõto tao tuisa pytyme exikety mana, oryxime potu mana!
Zupõ mã uuru kurã risẽme mana.
14 Upo kurã tamuruse, sỹsỹkamã potu
toytotohme tuisa ẽpataka,
tymaro oryximãkõ arõko mana.
15 Oseahmaryme atãkyemaryme roropa
oehnõko mã toto, omõnõko tuisa tapyĩ konõto taka.
16 Omoro, tuisa, tuhke tumũkue exĩko mase,
tuisame exĩko mã toto, atamuru tõ myakãme;
sero nono põkõ tuisaryme toto rĩko mase,
sero nono põkõ porehme.
17 Sero jeremiatoh ke jũme wenikehpyra
exĩko mã toto imehxo oehtoh poko, jũme
oeahmãko mã toto myarotokoromero.