46
Ritonõpo kymaro xine mana
Kora tõ nymerohpyry.
1 Kuewomanekõme Ritonõpo mana,
kyjamitunurukõme roropa mana.
Ameke pyra exiryke kuakorehmatorỹko mana
popyra ehtoh toehse ahtao.
2 Morara exiryke enaromyra exĩko sytatose,
sero nono tykytyky karyhtao ro, ypy tõ
epukaryhtao roropa zue aka, tuna konõto kuaka;
3 Oserehpyra sytatose pohkane konõto
etaryhtao tuna konõto kuao, ypy tõ
kywyh kywyh karyhtao roropa.
4 Tuna nae mana, ipokoino tãkye exĩko
Ritonõpo patary põkõ mana,
Ritonõpo Imehxo Exikety tapyĩ kurã taõkomo.
5 Moro pata po Ritonõpo mana,
naeroro jũme enahpyra exĩko mana;
ẽmepyryhtao typatary akorehmãko Ritonõpo mana.
6 Imehnõ nonory põkõ oserehnõko mã toto,
mokaro kowenu tõ tyjamihkehkasẽme mã toto.
Oturũko mã Ritonõpo konomeru samo,
tuname sero nono exĩko mana.
7 Ritonõpo Jamihmehxo Exikety kymaro xine mana;
Jako Esemy kuewomanekõme mana.
8 Osehtoko osenuhmatokose Kuesẽkõ nyrihpyry!
Enetokose osenuruhkatoh tonõ tyrise eya sero nono po.
9 Osetapatoh konõto mynyhpãkãko mana
sero nono po porehme;
taky tõ tahkãko mana, warata tõ roropa,
osewomatoh tonõ zahkãko mana.
10 “Osetapakehtoko,” ãko ynororo.
“Zuaro ehtoko ypoko, ywy ase Ritonõpo.
Sero nono põkõ tuisaryme ase.
Sero nono esẽme ase, porehme.”
11 Kuesẽkõ Jamihmehxo Exikety kymaro xine mana;
Ritonõpo Jako Esemy kuewomanekõme mana.