49
Ekurehpyra orihketõme sytatose porehme
Kora tõ nymerohpyry.
1 Ahno tomo, etatoko pahne!
Otato ehtoko, sero nono põkomo porehme,
2 tuisamehxo exiketomo te, imehnõ poetory tomo,
tymõkomoke exiketomo te, tymõkomokãkara roropa,
3 Josenetupuhtoh enetupuhpõko mana;
tuaro ehtoh ekarõko ase.
4 Atamorepãko ase omi tuaro ehtoh poko,
ipoko amorepãko ase, ykyryry rue ynetoryke.
5 Enaromyra ase popyra ehtoh toehse ahtao,
tomyehmase jahtao yzehnotokomo a.
6 Popyra exiketõ orẽpyra osekarõko mã toto
tytinerũkõ pokoino, itamurume tytineruke
toexirykõ poko epyrypãko mã toto.
7 Yrome onepehmasaromepyra sytatose
orihpyra kuehtohkõme;
Ritonõpo onepehmasaromepyra sytatose jũme
isene kuehtohkõme,
8 isene ahno ehtoh typyne kuhse exiry mana.
Tineru itamurume nae ahno ahtao ro
ipune pyra exiry mana,
9 orihpyra mokyro ehtohme,
jũme isene mokyro ehtohme.
10 Ynara enẽko sytatose: tuaro exiketõ ro
orihnõko mã toto, tuaro pyra exiketõ morararo,
putupyra exiketõ morararo.
Tymõkomorykõ nomõko mã toto emero imehnõ mõkomoryme.
11 Ekepyrykõ zonẽtoh tonõ itapyĩkõme exĩko
mana jũme; moroto exikehpyra exĩko mã toto
nono itamurume esemỹpyryme toto ahtao ro.
12 Kymarokõ ahnome kuexirykõke,
imehxo kuahtao xine ro, ekurehpyra orihnõko sytatose;
onokyro tõ orikyry sã orihnõko sytatose.
13 Mokaro etyhpyry enetoko ke typoe xine rokẽ
orẽpyra osekaroketomo; enetoko ke tymõkomorykõ poko epyrypaketomo,
14 kaneru sã orihnõko mã toto,
aorihtohkõ toto esẽ sã toto arõko.
Ẽmepyryhtao mokaro poremãkapõko zae exiketõ mã
toto; ekepyrykõ motãko mana zonẽtopõpyry ao
ameke toto tapyinỹpyrykõ winoino.
15 Yrome juzenu pynanohnõko Ritonõpo mana
joorihtopõpyry wino, jarõko mana tymaro jehtohme.
16 Torẽtyke pyra ehtoko imehnõ tymõkomoke toehse ahtao, itamurumehxo imõkomory
tomãse ahtao.
17 Tymõkomory anarosaromepyra mana
toorihse ahtao;
imõkomory ytopyra mana imaro zonẽtoh aka.
18 Tãkye exiketyme ahno ahtao ro isene toehtoh poko,
kure turuse ahtao roropa inyrityã poko,
19 toorihse ahtao tytamuru tõ maro oximõnõko mana,
moroto xinukutume ehtoh exikehpyra mana.
20 Kymarokõ ahnome kuexirykõke, imehxo kuahtao xine ro, ekurehpyra sytatose;
onokyro tõ orikyry sã orihnõko sytatose.