50
Ritonõpo eahmary poko isene exiryke
Asape nymerohpyry.
1 Ritonõpo, Jamihmehxo Exikety, Kuesẽkomo,
oturũko mana; sero nono põkõ kohmãko
xixi tũtatoh wino aomõtoh pona.
2 Saereh ãko moroto Ritonõpo mana Jerusarẽ po,
pata kurã potu ipunaka.
3 Kuesẽkõ oehnõko mana, mynyhme pyra
eporehkãko mana;
apoto nyahkary sã esemazupurume oehnõko.
Zomye tyryrykane itamurume exĩko.
4 Kapuaõkõ kohmãko mana nono põkõ roropa
eneneme toto ehtohme,
typoetory tõ apiakary tyya enetohme.
5 Ynara ãko mana: “Jomiry omipona exiketõ
enehpoko ya, tõmihpyrykõ etahpõkomo ya,
mame moro enetupuhtohme tokykõ
tyahkase eya xine tynekaroryme ya.”
6 Kapuaõkõ emero zae Ritonõpo ehtoh
ekarõko mã toto, ynororo apiakaneme exĩko mana.
7 Ritonõpo ynara ãko: “Etatoko pahne ypoetory tomo,
ourutorỹko ase; ohxirotorỹko ase, Izyraeu tomo.
Ywy ase Ritonõpo Oesẽkomo.
8 Ohxiropyra xine ase onekarotyãkõ poko,
okyno tomo, apoto apõ po onyahkatyãkomo,
mokarohne onenehkehpyra matose ya.
9 Yrome otyme kure ya, pui orutua kõ oeky tõ wino?
Mokaro apoiry se pyra ase,
poti tõ se pyra ase roropa oeky tõ wino.
10 Onokyro tõ emero itu htaõ komo jekyme mã toto,
pui tõ roropa miu motye
ypy tõ po exiketõ jekyme mã toto.
11 Torõ tõ jekyme mã toto, emero ypy tõ po
exiketomo, onokyro tõ roropa ona po exiketõ
jekyme mã toto.
12 Omise jahtao tonahsẽ onekaropopyra jexiry
oya xine, sero nono ykyryryme exiryke
emero zao aexityã maro.
13 Johme pui orutua kõ pũ õnõko ha?
Poti tõ munuru ẽnõko ha?
14 Ah, ‘Kure mase,’ katoh, onekarorykõme nexĩ ya.
Õmihpyrykõ omipona oehtohkõ roropa:
‘Ynara ekarõko ase oya,’ karyhtao ya,
moro ekaroko onekarorykõ kurãme
Ritonõpo Imehxo Exikety a.
15 Kykohmako popyra ehtoh toehse ahtao,
opynanohnõko ase, mame jeahmãko mase.”
16 Yrome popyra ehtoh poko exiketomo a
ynara ãko Ritonõpo mana:
“Oty katoh ynyripohpyry ekarõko matou?
Oty katoh ynetapohpyry poko oturũko roropa matou?
17 Zae pyra oehtohkõ kurãkapory se pyra matose ya,
ynyripohpyry oya xine rumekãko roropa matose.
18 Emero rokẽ omato tõ eneryhtao oya xine
osepeme exĩko matose toto maro,
imehnõ nohpo poko exiketõ maro
imehnõ orutua poko exiketõ maro
osepeme exĩko matose.
19 Ihximyra matose popyra õmiarykõ poko,
tupime pyra oya ajohpe õtururu mana.
20 Oekyrykõ hxirokehpyra matose, ajohpe ehtoh ke
toto onykerekeremakehpyra matose.
21 Morohne tyrise oya xine,
mame mynyhme rokẽ exiase;
naeroro asã xine kuekaroase repe.
Yrome seromaroro oupokatorỹko ase;
zae pyra oehtohkõ enepõko ase oya xine.
22 Etatoko pahne, jenetupuhpyra exiketomo,
jomiry onetara awahtao xine oenahkatorỹko ase.
Mame opynanohnekõ pyra exĩko mana.
23 ‘Kure mase,’ kary ya, onekaroryme mana,
jeahmãko mase, mame opynanohtorỹko ase,
jomipona awahtao xine emero porehme.”