51
Tyyrypyry korokapotopõpyry
Tawi nymerohpyry sero.
1 Ritonõpo, yna pyno exikehpyra oexiryke
ajohpãme sã juãnohpyra exiko.
Yna pyno oexiryke, iirypyryme jehtopõpyry
ikorokako emero.
2 Kukurikako popyra jexiryke,
iirypyryme jehtoh ikurikako kure jehtohme ropa.
3 Zae pyra jehtopõpyry enetupuhnõko ase,
yyrypyry mã kokoro rokẽ jẽpataka mana.
4 Yyrypyry mã oryhmaneme rokẽ mana,
popyra ehtoh yriase oneneryme,
ise pyra oehtoh ipunaka moro tyrise ya.
Zae mase japiakaryhtao oya, juãnopyryhtao oya zae rokẽ mase morohne rĩko.
5 Ajohpe pyra, popyra ywy jenurutopõpyry poe ro; jenurutopõpyry poe ro iirypyryme exiketyme ase.
6 Zae jehtoh se mase ukurohtao
ajohpe pyra jehtohme. Tuaro kyriko ukurohtao.
7 Yyrypyry touko ukurohtae kure jehtohme;
kukurikako upo ikurikasenã sã jehtohme,
mauru karimutumã motye jehtohme.
8 Sekese kyriko ropa tãkye exiketõ omiry
etatohme ropa, oseahmaketõ omiry etatohme
roropa, tytũtũmase jahtao ro oya tytohtohkase jahtao roropa, tãkye exĩko ropa ase.
9 Yyrypyry onenepyra exiko,
popyra jehtopõpyry ikorokako ropa, emero porehme.
10 Ritonõpo, kure rokẽ josenetupuhtoh
tyriko ukurohtao,
Ouzenu ekaroko ya tyrisenã sã jehtohme ropa.
11 Jenyohpyra exiko owinoino,
Ouzenu kurã onupuxihkara exiko roropa ywinoino.
12 Tãkye kyriko ropa typynanohse jexiryke oya,
õmiry omipona se jehtoh tyriko ropa ukurohtao.
13 Moromeĩpo õmiry omipona pyra exiketõ
amorepãko ase onyripohpyry poko,
mame eramãko ropa mã toto oya.
14 Ritonõpo, ypynanohneme mase, kuewomako orihpyra jehtohme, mame tãkye rokẽ
yna pynanohneme oehtoh ekãtõko ase!
15 Ritonõpo, wakorehmako õmiry poko jotururu poko, mame oeahmãko ase!
16 Okyno tõ etapary ya se pyra mase
ynekaroryme oya; okyno zahkary se pyra roropa mase ynekaroryme oya.
17 Ritonõpo, ynekaroryme juzenu ekarõko ase oya osanume jahtao ro;
“Ose pyra ase,” kara mase ya ime pyra jahtao
ukurohtao, yyrypyry rumekary se roropa jahtao.
18 Ritonõpo, kure oexiryke Jerusarẽ põkõ
akorehmako, ipatarykõ apururu tõ tyriko ropa!
19 Morarame opoetory tõ nekarory azamaro
exĩko, zae okyno tõ zahkasẽ tytororo
azamaro exĩko mana.
Pui mũkuru tõ roropa zahkãko mã toto
okyryry apoto apõ po.