9
“Kure mase,” kary Ritonõpo a zae aexiryke
Sero saumu tymerose Tawi a.
1 Ritonõpo Jesemy, oeahmãko ase yronymyryme.
Onyrityã poko osenuruhkãko ase,
ipoko xine imehnõ zurũko ase.
2 Opokoino atãkyemãko ase,
eremiãko ase yzamaro oexiryke.
Oeahmaryme eremiãko ase onetaryme,
Ritonõpo, Imehxo Exikety.
3 Ooepyryhtao jepetõkara epãko mã toto;
epukãko, orihnõko roropa mã toto.
4 Ahno apiakaneme mase, zae exiketyme,
typorohse awahtao tuisa konõto apõ po zae
ehtoh rĩko mase, zae ypynanohnõko mase.
5 Imeimehnõ nonory põkõ, awaro pyra exiketõ
tuãnohse oya.
Popyra exiketõ tonahkase oya;
tuenikehsẽme toto ehtohme jũme.
6 Kuepetõkara patary tõ takuhkuhmose oya;
tonahkase toto oya jũme
tuenikehse ipunaka mã toto.
7 Yrome Kuesẽkõ Ritonõpo jũme tuisa imehxo mana.
Typorohse tapõ po, tuisa konõto apõ po,
imehnõ apiakãko mana.
8 Kure rokẽ erohnõko Ritonõpo mana
sero nono põkõ tuisaryme;
zae toehtoh ke ahno apiakãko mana,
zae ehtoh waro toexiryke.
9 Tapyi jamihmã sã Kuesẽkõ mana
tyyryhmase exiketõ osewomatohme;
aetuarimarykohtao toto ewomãko mana.
10 Ritonõpo yna Esemy, awaro exiketõ
oenetupuhnõko mã toto Tosẽkõme,
oya ytoketõ atakorehmapotohme,
jũme mokaro onurumekara mase.
11 Oeremiatoko Ritonõpo eahmaryme,
tuisa imehxo mana Jerusarẽ po.
Imeimehnõ nonory põkõ zurutoko inyrityã poko.
12 Wenikehpyra Ritonõpo mana
taosanumase exiketõ poko;
pusuhkatoh poko eya xine wenikehpyra mana,
imehnõ osanumary se exiketõ wãnohnõko mana.
13 Ritonõpo Jesemy, kuewomako, kypynanohko!
Josanumary eneko jepetõkara a, yzehno exiketomo a.
Kypynanohko orihpyra jehtohme.
14 Mame owõnõko ase xikihme opoetory tõ
ẽpataka Jerusarẽ po oturutohme tãkye
jehtoh poko: “Tãkye ase oeahmaryhtao
typynanohse jexiryke orihpyra jehtohme,” ãko ase.
15 Ozehnotokomo a eutary ahkahpyry aka
toepukase toto.
Ahno apoitoh aka tomõse toh nexiase,
tynyrihpyrykõ aka.
16 Ritonõpo, awaro exĩko imehnõ mana,
zae rokẽ imehnõ apiakaryke oya.
Mokaro popyra exiketõ, tynyrityã aka
omõnõko mã toto, ahno apoitoh aka.
17 Etyhpyryme orihnõko mã toto,
Ritonõpo rumekananõ maro emero.
18 Wenikehpyra mã tymõkomokãkara poko.
Mokaro etuarimaketõ kure Ritonõpo ehtoh
oneraximakehpyra mã toto.
19 Osehko Ritonõpo!
Sero nono põkõ oenetuputyry se pyra mã toto
Tosẽkõme; orẽpyra exiko toto neneryme.
Awaro pyra exiketõ enehpoko
oẽpataka toto apiakatohme.
20 Toto tyripoko ouno toto ehtohme, Ritonõpo!
tuaro toto tyripoko orihketyme toehtohkõ
waro toto ehtohme!