10
Zae ehtoh tyripõko Ritonõpo a
1 Ritonõpo yna Esemy,
oty katoh ameke mahno ya?
Oty katohme otonẽnõko mah jetuarimaryhtao?
2 Popyra exiketõ epyrypãko mã toto,
tymõkomokãkara tuarimapõko mã toto.
Apoiko toto, Ritonõpo, ahno apoitoh aka,
inyrihpyrykõ aka.
3 Popyra ehtoh poko exiketõ
epyrypãko mã toto typenetatohkõ poko.
Tyamene se exiketõ imehnõ ryhmãko mã toto,
popyra ehtoh tyripõko mã toto Ritonõpo a,
tosẽkõme Ritonõpo onenetupuhpyra mã toto.
4 Popyra exiketõ Ritonõpo onupipyra mã toto;
toepyrypatohkõke oty kara mã toto Ritonõpo poko.
5 Emero rokẽ poko mokyro ahtao typenetatoh apoĩko mana.
Onenetupuhsaromepyra mana Ritonõpo napiakary
poko, topetõkara poihtõko roropa mana.
6 Ynara osenetupuhnõko mokyro mana:
Orẽpyra exikehpyra ase; jũme etuarimara exĩko ase.
7 Oturukehpyra mana popyra ehtoh
enehpory poko te, omi ajohpanory ke,
imehnõ enaroximary poko.
Imehnõ hxirõko roropa mana,
popyra toto ehtoh poko oturukehpyra mana.
8 Otonẽnõko mokyro mana pata tõ rãnao;
ahno kurã eraximãko moroto mana etapatohme,
towomaneke pyra exiketõ zupĩko mana
toto apoitohme.
9 Eraximãko mana tõtonẽtoh tao, reão samo,
imehnõ enẽko mana,
osewomasaromepyra exiketomo.
Tãto tao eraximãko mana urakanakety samo,
tykarimory apoĩko mana apoitoh tao,
tymõkomoke pyra exikety, iiryhmatohme.
10 Totapase toto, epukãko toto;
typoremãkase jamihme exikety a.
11 Mokyro popyra exikety ynara ãko mana
tyya rokene:
“Ritonõpo ‘Oty’ kara mana.
Pimỹme rokẽ mana, osenuhmara mana!”
12 Osehko, Ritonõpo yna Esemy,
mokaro popyra exiketõ zuãnohko!
Wenikehpyra exiko aosanumatyã poko!
13 Ritonõpo onypoihtosaromepyra popyra
exiketõ mana, eunopyryhtao eya xine:
“Juãnohpyra Ritonõpo mana,”
ãko osenetupuhnõko mã toh repe.
14 Yrome omoro, Ritonõpo, osenuhmãko mase,
imehnõ osanumary enẽko mase, emynyhmaketõ
akorehmary se mase toto atasamaryhtao ro.
Osewomasaromepyra exiketõ oeraximãko mã toto.
Etuarimaketõ anakorehmakehpyra mase.
15 Ritonõpo, popyra exiketõ jamitunuru
enahkapoko, zae pyra exiketomo.
Toto zuãnohko inyrityãkõ popỹ epehpyryme,
zae pyra toehtohkõ poko pyra ropa
toto ehtohme.
16 Ritonõpo tuisame mase jũme;
imehnõ tyneponãmarykõ eahmananõ
osenahkãko mã toto ononory po.
17 Ritonõpo yna Esemy, taosanumase exiketõ
otururu oya etãko mase, orẽpyra toto rĩko mase.
18 Iiryhmatyã kohtary etãko mase,
tumyke pyra exiketõ roropa;
zae apiakãko mase toto akorehmaryme,
toto onyryhmara ropa ahno tõ ehtohme.