93
Tuisamehxo Ritonõpo mana, Kapu Esemy
1 Ritonõpo Kuesẽkõ tuisame mana.
Tuisamehxo ehtoh ke tupoke mana,
tymetyke ynororo tyjamitunuru ke.
Sero nono tyrise eya orẽpyra sã esaka,
onysyryhmasaromepyra imehnõ mana.
2 Tuisame oehtoh onytyoromasaromepyra
imehnõ mana, jũme mase apitorymã poe.
3 Ritonõpo, tuna konõto zueme exikety opore tyryãko,
tuna konõto opore omiomitaketyme mã kehko,
pohkane konõto panaikato opore aryrykane samo.
4 Ritonõpo tuisamehxo mana kapu ao,
Jamihmehxo Exikety.
Tuna konõto jamitunuru motye jamihme mana,
pohkane konõto jamitunuru motye
tuna konõto kuao jamihmehxo mana.
5 Ritonõpo, jũme õmihpyry zae mana,
Atapyiny jũme oesary kurãme mana,
jũme exikehpyra mana.