94
Kuapiakanekõ zae exiketyme Ritonõpo mana
1 Ritonõpo yna Esemy, zae pyra exiketõ
wãnohneme mase!
Mokaro zehno oehtoh enepoko yna a!
2 Ahno apiakaneme mase emero porehme;
owõko, epyrypaketõ epehmako
toto nyrihpyry emetakame.
3 Ritonõpo, otoko na pixo popyra exiketõ
tãkye rokẽ exĩko toh nae?
Otoko ehtoh pona, Ritonõpo?
4 Otokonahxo imehnõ motye kure osekarõko toh nae,
epyrypãko roropa popyra tynyrirykõ poko?
5 Ritonõpo, opoetory tõ osanumãko mã toto,
ononory põkõ rohmanohpõko mã toto,
ĩkyryrykõ ematonanohnõko mã toto.
6 Pytỹpo tõ etapãko mã toto, poetõpo tõ roropa,
katonomo imehnõ nonory poe aehtyã tarona
aorihmapõko mã toto.
7 Ynara ãko mã toto: “Onenepyra Ritonõpo mana;
sero poko zuaro pyra Izyraeu tõ Esẽ mana.”
8 Tamuxi tomo, putupyra exiketõme pyra ehtoko!
Otara ahtao tuaro exĩko matou?
9 Ritonõpo kynexine kypanarykõ rihpono;
oty katoh onetasaromepyra ynororo, ekarõko matohu?
Kuenurukõ rihpõme mana;
oty katoh onenesaromepyra ekarõko matou?
10 Ahno tõ zupokãko Ritonõpo mana;
toto onuãnohpyra roropa hnae?
Sero nono põkõ emero amorepãko Ritonõpo mana;
oty katohme zuaro pyra ynororo, ekarõko matou?
11 Ahno osenetupuhtoh waro Ritonõpo mana;
toiparo rokẽ kuosenetupuhtohkõ ahtao moro waro mana.
12 Ritonõpo yna Esemy, tãkye mã mokaro tamorepase exiketõ oya,
Õmiry poko anamorepatyamo.
13 Torẽtyke pyra ehtoh ekarõko mase eya xine popyra ehtoh toehse ahtao, yrome popyra exiketõ esaryme eutary tahkasẽme exĩko zonẽtohme.
14 Typoetory tõ onurumekara exĩko Ritonõpo mana; tosẽkõme tonetupuhnanõ onynomopyra mana.
15 Zae ehtoh poko exĩko ropa mã toto apiakatoh tao.
Mame kure ehtoh poko exiketõ emero
moro zae ehtoh sehxo exĩko mã toto.
16 Onoky towõse ymaro popyra exiketõ poremãkatohme?
Onoky ymaro nexiase popyra ehtoh poko exiketõ akorekehkatohme?
17 Jakorehmara Ritonõpo ahtao axĩ toytose jexiry mynyhme ehtoh pona.
18 Ritonõpo Jesemy: “Orihnõko ase myhene,” ase ahtao, ypyno oehtoh ke tanỹse ropa ywy oya.
19 Torẽtyke jahtao, jetuarimaryhtao roropa
jemuhkehkapõko mase, tãkye jyrĩko ropa mase.
20 Osepeme pyra mase apiakananõ maro ajohpe exiketõme toto ahtao,
zae pyra ehtoh rĩko mã toto zae ehtoh samo,
21 oximõnõko mã toto ajohpe pyra exiketõ akorekehkatohme, zae ehtoh poko exiketõ
popyra ekarõko mã toto, aorihmapotohme.
22 Yrome Ritonõpo jewomãko mana;
topuimo sã mana, ytapyiny jamihme exikety.
23 Apiakananõ zae pyra exiketõ wãnohnõko mana zae pyra toto nyrityã pokoino; toto enahkapõko Ritonõpo Kuesẽkõ mana popyra inyrityãkõ emetakame.