97
Ritonõpo sero nono Esẽme mana
1 Ritonõpo Kuesẽkõ tuisa konõtome mana.
Atãkyematoko, sero nono põkomo!
Atãkyematoko, ahmõta po exiketomo,
tuna konõto ehpiõkomo!
2 Mokyro zomye akurũ tõ mana,
ikohmamyry xinukutume roropa.
Tuisamehxo mana ajohpe pyra exiketyme ipunaka,
zae rokẽ exiketyme roropa mana.
3 Esemazupurume apoto ytõko
epetõkara zahkatohme zomye.
4 Neneneh katoh sero nono zeipõko mana.
Moro eneryke sero nono põkõ tykytyky ãko mã toto.
5 Ypy tõ tunatãko mã kehko moronapu samo
Kuesẽkõ ẽpataka, sero nono emero esẽ ẽpataka.
6 Kapu poko exiketõ kuurutorỹko mã kehko
zae Ritonõpo ehtoh poko.
Saeremehxo aehtoh enẽko sero nono põkõ emero.
7 Imehnõ neponãmary eahmananõ ehxirõko mã toto; epyrypaketõ tyneponãmarykõ poko ehxirõko mã toto.
Ritonõpo Kuesẽkõ ẽpataka emero ritõ tõ
tosekumurukõ po porohnõko mã toto.
8 Zae rokẽ imehnõ apiakary poko oya, Ritonõpo,
pata Jerusarẽ põkõ tãkye mã toto,
Juta patary põkõ roropa atãkyemãko mã toto.
9 Ritonõpo Imehxo Exikety, erohnõko mase
sero nono esẽme ehtoh poko porehme,
emero ritõ tõ motye tuisamehxo mase.
10 Opyno xine Ritonõpo Kuesẽkõ mana
popyra ehtoh se pyra awahtao xine;
oewomãko mana orihpyra oehtohme,
opynanohnõko mana popyra exiketõ winoino.
11 Saerehkatoh saereh ãko mana
zae ehtoh poko exiketõ pona,
tãkye ehtoh saereh ãko sã mana
Ritonõpo omiry omipona exiketõ pona.
12 Tãkye ehtoko Ritonõpo poko,
amarokõ emero aomiry omipona exiketomo!
“Kure mase,” kahtoko Ritonõpo kurano a,
eahmatohme inyrihpyry poko.