98
Tuisamehxo Ritonõpo mana Zae Apiakaneme roropa
Eremiatopo.
1 Eremiatoh kasenato ke oeremiatoko Ritonõpo
Kuesẽkõ netaryme;
inyrityã eneryke osenuruhkãko sytatose.
Tyjamitunuru ke imehxo toehtoh ke roropa,
orẽpyra toehse mana.
2 Orẽpyra toehtoh tokarose Kuesẽkomo a;
imeimehnõ nonory põkõ tuaro tyripose eya
toto pynanopyry poko tyjamitunuru ke.
3 Izyraeu tõ pyno toexiryke, anamonohpyra
toexiryke roropa, typynanohse toto eya
tõmihpyry ae ro.
Imehnõ nonory moe exiketõ po orẽpyra
Ritonõpo Kuesẽkõ ehtoh tonese ahno a emero.
4 Oeremiatoko tãkye Ritonõpo eahmaryme,
sero nono põkõ porehme!
Kuesẽkõ eahmatoko eremiatoh ke,
kui katoh ke roropa tãkye oehtohkõke.
5 Oeremiatoko Ritonõpo Kuesẽkõ eahmaryme,
haapa tõ etotoko, rira tõ etotoko roropa.
6 Rue etotoko, koroneta tõ maro oeremiatoko
ãtãkyemarykõme Ritonõpo ẽpataka,
tuisa konõtome aexiryke.
7 Panaikato tyriko tuna konõto,
isene exiketõ emero tunakuaõkõ maro.
Oeremiatoko, nono, emero nono põkõ maro.
8 Tuna tomo, tahtah kahtoko!
Ypy tomo, oeremiatoko tãkye oehtohkõke
Ritonõpo ẽpataka.
9 Ynara exiryke, oehnõko mana tõmiry omipona
sero nono põkõ ritohme!
Ahno tõ emero esẽme exĩko mana sero nono po,
zae ehtoh ke toto rohmanohpõko mana,
zae rokẽ ehtohme sero nono po.