6
1 Ɗa Vuzavaguɗu u danai Musa, <<Gogo na ve kene ta̱ ili i na n kuya'anka Firi'auna. N kukiye ku utsura ku va̱ wi ta̱ a̱ kuka̱sukpa̱ le a wala, n utsura u va̱ wi ta̱ a̱ kuta̱ka̱ le punu a iɗika ya.>>
2 Ka̱shile ka danai Musa, <<Mpa ɗa Vuzavaguɗu.
3 N yotsongu ta̱ ka̱ci ka̱ va̱ wi Ibirahim, n Ishaku, n Yakubu, tsu Ka̱shile Mala'imili. Ama n ka̱sukpa̱ e yeve mu n utsura u kula ku va̱ ku Vuzavaguɗu ba.
4 N Ya'an ta̱ uzuwakpani n ele n kuneke le iɗika i Kana'ana, i na a̱ da̱sa̱ngi a kuya'an limoci.
5 Gogo na m pana ta̱ yura̱ ya aza a Isaraila, aza na aza a Masar a zuwai a ugbashi, ɗa n ciɓai nu uzuwakpani u va̱.
6 Adama a nannai, dana aza a Isaraila, <Mpa ɗa Vuzavaguɗu, mi ta̱ a̱ kuta̱ka̱ ɗa̱ a̱ ka̱tsuma̱ ka atakaci ka aza a Masar, ka̱ta̱ n neke ɗa̱ uba̱ruwi a̱ ubuta̱ u tsugbashi wa, ka̱ta̱ mi isa ɗa̱ n utsura we ekiye a̱ va̱, ka̱ta̱ n neke le atakaci a gbayin.
7 Ka̱ta̱ m bonoko ɗa̱ uma a̱ va̱, ka̱ta̱ mpa tamkpamu mo okpo Ka̱shile ka̱ ɗa̱. Ɗaɗa i kuyeve a na mpa ɗa Vuzavaguɗu vu ɗa̱ n Ka̱shile ka̱ ɗa̱, vuza na wu utuka̱i ɗa̱ a̱ ka̱tsuma̱ ka atakaci ka aza a Masar.
8 Mi ta̱ a kubanka ɗa̱ a iɗika i na n ya'in akucina n kuneke Ibirahim, n Ishaku n Yakubu. Mi ta̱ e kuneke ɗa̱ i ɗa yo okpo ya ili yi uka̱ni i ɗa̱. Mpa ɗa Vuzavaguɗu.> >>
9 Musa u danai aza a Isaraila kadanshi ka nampa, ama ɗa a iwain kupanaka yi adama a una̱mgbi u ka̱tsuma̱ n atakaci a na i o kuso'o a̱ ubuta̱ wu ugbashi.
10 Ɗa Vuzavaguɗu u danai Musa,
11 <<Bana vu dana Firi'auna mogono ma Masar u ka̱sukpa̱ uma a Isaraila a̱ uta̱ punu a iɗika i ni.>>
12 Ama ɗa Musa wu ushuki Vuzavaguɗu, <<Uma a Isaraila a panaka mu baci ba, nini ɗai tamkpamu Firi'auna u kupanaka mu, mpa na mi a kadanshi n cikeku?>>
Tsukaya tsu Musa n Haruna
13 Ama ɗa Vuzavaguɗu u danai Musa n Haruna kakuna adama a aza a Isaraila n Firi'auna mogono ma Masar. U danai le a̱ uta̱ka̱ n aza a Isaraila punu a iɗika i Masar.
14 Na va ɗaɗa nkoshi m gba̱ra̱-gba̱ra̱ mi i'uwa ya aza a Isaraila. Muku mo olobo n Ruben, maku ma iyain mi Isaraila ele ɗa, Enoku m Palu, n Hezuron, n Karimi. Ele na ɗa okpoi mogbodo mo Ruben.
15 Muku mo olobo n Simiyon ele ɗa Jemuwelu, n Jamin, n Ohadu, n Jaki, n Zoharu, n Shawu, vuza na vuka va aza a Kana'ana vu matsai, na va ɗaɗa mogbodo ma Simiyon.
16 Na va ɗaɗa ula a̱ muku mo olobo n Levi, yaba dem n tsumani ci ni, ele ɗa Geshon, n Kohatu, m Merari. Levi wi ta̱ n a̱ya̱ amangatawun n kamangankupa n e cindere (137) kafu u kuwa̱.
17 Muku mo olobo n Geshon yaba dem m mogbodo ma̱ ni ele ɗa Libini n Shime.
18 Muku mo olobo n Kohatu ele ɗa Amuram n Iziharu n Heburon n Uziyelu. Kohatu u ya'an ta̱ a̱ya̱ amangatawun n kamangankupa n tatsu (133), kafu u kuwa̱.
19 Muku mo olobo m Merari, ele ɗa Mahali m Mushi. Ele ɗa umaci u Levi, yaba dem m mogbodo ma̱ ni.
20 Amuram u zuwai Jokabe taku ve esheku a̱ ni, ɗa u matsakai ni Haruna m Musa. Amuram wi ta̱ n a̱ya̱ amangatawun n kamangankupa n e cindere (137) kafu u kuwa̱.
21 Muku mo olobo n Iziharu ele ɗa Kora, n Nefeku, n Zikiri.
22 Muku mo olobo n Uziyelu ele ɗa Mishayel, n Elizafan, n Sitiri.
23 Haruna u zuwai Elisheba mekere ma Aminadabu vangu vu Nashon, ɗa u matsakai ni Nadabu, n Abihu, n Eliyaza, n Itama.
24 Muku mo olobo n Kora ele ɗa Asiru, n Elikana, n Abiyasafa. Na va ɗaɗa mogbodo ma Kora.
25 Eliyaza maku ma Haruna u zuwai mekere me Putiyelu, ɗa u matsakai ni Finihasu. Aza na okpoi aza a̱ gba̱ra̱-gba̱ra̱ a i'uwa i Levi m mogbodo me le.
26 Haruna vu nampa va m Musa va, ele ɗa aza a na Vuzavaguɗu u ya'ankai kadanshi, <<Uta̱ka̱i n aza a Isaraila a iɗika i Masar ka̱tsura̱-ka̱tsura̱.>>
27 Musa n Haruna ele ɗa a ya'in kadanshi n Firi'auna mogono adama a na u ka̱sukpa̱ a̱ uta̱ka̱ n aza a Isaraila a iɗika i Masar.
Haruna u ya'in kadanshi a̱ una̱ u Musa
28 A kanna ka na Vuzavaguɗu u ya'in kadanshi m Musa a iɗika i Masar,
29 u danai ni, <<Mpa ɗa Vuzavaguɗu, dana Firi'auna mogono ma Masar ili i na n danai nu dem.>>
30 Ama Musa u danai Vuzavaguɗu, <<A na wo okpoi mpa mi ta̱ a kadanshi n cikeku, nini ɗai Firi'auna u kupanaka mu?>>