7
1 Ɗa Vuzavaguɗu u danai Musa, <<Pana, mi ta̱ o kubonoko wu an Ka̱shile u Firi'auna. Mokoshi ma̱ nu Haruna wi ta̱ o kokpo an keneki ka na ka kuya'an kadanshi n una̱ u nu.
2 Vu dana yi ili i na n tonokoi nu dem. Ka̱ta̱ a̱yi Haruna u dana Firi'auna u ka̱sukpa̱ aza a Isaraila a̱ uta̱ punu a iɗika i ni.
3 Ama mi ta̱ a kuzuwa Firi'auna ugbamukaci. Ka̱ta̱ n doku kpamu urotu wi ili i mereve i va̱, a iɗika i Masar,
4 ko n nannai Firi'auna wi ta na a kupanaka ɗa̱ ba. Ka̱ta̱ mpa n neke aza a Masar atakaci n a̱bunda̱i, ka̱ta̱ mu uta̱ka̱ uma a̱ va̱ aza a Isaraila kakau.
5 Ayin a na baci m ba̱ra̱kpa̱i kukiye ku va̱ wa aza a Masar, ciya̱ mu utuka̱ n aza a Isaraila a̱ ka̱tsuma̱ ke le, i ta̱ e kuyeve a na mpa ɗa Vuzavaguɗu.>>
6 Musa n Haruna a ya'in tsu na Vuzavaguɗu u danai le.
7 A ayin a na a banai a ya'ankai Firi'auna kadanshi, Musa wi ta̱ n a̱ya̱ amanga̱na̱shi. A̱yi Haruna tamkpamu wi ta̱ n a̱ya̱ amanga̱na̱shi n a tatsu.
Kalangu ka Haruna ka vazai koko
8 Ɗa Vuzavaguɗu u danai Musa n Haruna,
9 <<Firi'auna u dana baci, <Ya'in ili i mereve,> vu dana Haruna, <Ɗika kalangu ka̱ nu, vu vakangu ka'a a iɗika e kelime ka Firi'auna.> Ka'a ki ta̱ a kuvaza koko.>>
10 Ɗa Musa n Haruna a banai u Firi'auna a ya'in ili i na Vuzavaguɗu u danai le. Ana a yawai, ɗa Haruna u vakangi kalangu ka̱ ni lo a̱ ubuta̱ u Firi'auna n anan taji a̱ ni, ɗa ta na ka vazai koko.
11 Ɗa Firi'auna u ɗekei aza e kuyeve n aza a̱ kula̱na̱ a̱ ni, n oboci a aza a Masar, ɗaɗa a̱ ka̱na̱i kuya'an ili i mereve i nanlo feu derere.
12 Yaba dem vi le feu ɗa u vakangi kalangu ka̱ ni a iɗika ɗa ta na a vazai oko. Ama ɗa kalangu ka Haruna ko soɗongi alangu e le ra̱ka̱.
13 Ko n nannai, ɗa Firi'auna u doku ɗa u ya'in ugbamukaci, ɗa u kpa̱ɗa̱i kupanaka le, uteku u na Vuzavaguɗu u danai ɗe.
Ma̱dukpa̱ ma na Mini mo bonoi mpasa
14 Ɗa Vuzavaguɗu u danai Musa, <<Firi'auna wi ta̱ n ugbamukaci n a̱bunda̱i, u iwain kuka̱sukpa̱ uma a̱ va̱ a laza.
15 Bana u Firi'auna n usana, ayin a na wi a̱ kuta̱ a kubana e kuyene ku Nilu. Ka̱ta̱ vu vana yi ɗe a̱ ka̱ga̱'in ka̱ kuyene ka, vi ɗika kalangu ka na ka vazai koko ka.
16 Ka̱ta̱ vu dana yi, <Vuzavaguɗu Ka̱shile ka aza a Ibirahim, u suku mu ta̱ wa̱ nu u danai vu ka̱sukpa̱ uma a̱ va̱ a wala a bana a cikpa mu na ɗe e meremune, ama ali n gogo na vu iwain kushuku.
17 Pana ili i na Vuzavaguɗu u danai, nannai ɗa ve kuyeve a na mpa ɗa Vuzavaguɗu. N kalangu ka na ki e kukiye ku va̱ na, mi ta̱ a kulapa mini ma̱ Nilu ka̱ta̱ mo bono mpasa.
18 Adan a na i punu a̱ mini ma i ta̱ a̱ kukuwa̱, mini kpamu mi ta̱ o kokpo n ushami tsu na aza Masar a kufuɗa o doku o so'o mini ma ba.> >>
19 Ɗaɗa Vuzavaguɗu u danai Musa, <<Dana Haruna <U ɗika kalangu ka̱ ni, ka̱ta̱ u shamgba u sapangu nɗolu m Masar ni nyeneke n adaɓa n ayinva a na o ko'i dem. I ta̱ o kokpo mpasa, ali m mini ma na mi lo a̱ ndiki n okotsu koɓolo n ogbodo a iɗika i Masar dem.> >>
20 Ɗa Musa n Haruna a ya'in tsu na Vuzavaguɗu u danai le a ya'an. Ɗa Haruna u ɗengusa̱i kalangu ka̱ ni lo e kelime ka Firi'auna n anan taji a̱ ni dem lo a kinda. Ɗa u lapai Kuyene ku Nilu, ɗa ko okpoi mpasa.
21 Adan a na i punu a̱ mini ma a̱ kuwa̱i. Ɗa mini ma shamai ka̱u, ali aza a Masar a fuɗa o doku so'o ba. Ɗa mini dem a iɗika i Masar mo okpoi mpasa.
22 Ama oboci a Masar a̱ ka̱na̱i kuya'an ili i tsuboci i le, ɗa feu o bonokoi mini ma mpasa. Ɗa ka̱ɗu ka Firi'auna ko doku ka gbamasakai, u ciga kupanaka Musa ele n Haruna ba, tsu na Vuzavaguɗu u danai.
23 Ɗa Firi'auna u lazai o kubono e kefeku ka̱ ni, ko ka̱ɗu ka̱ ni ka̱ muɗa̱ adama a ili i nampa ya ba.
24 Ɗa aza a Masar dem a̱ ga̱va̱i ayinva a̱ ka̱ga̱'in ke kuyene ku Nilu a̱ kula̱nsa̱ mini mo kuso'o adama a na o doku a fuɗa o so'o mini me kuyene ma ba.
Ma̱dukpa̱ mo opoɗo
25 Ayin e cindere a lazai ana Vuzavaguɗu u la̱nga̱sa̱i Kuyene ku Nilu.