27
Kabepepa Parina
Ayina Deivid igirumi
1 Yagu yeghana na Yawe God gwabinama yapiipiika,
bi yiyawiigu na geananagharana.
Touna piropiro gwabidima yamiiri babaregu
na kate geiiyabo ananagharenina.
2 Raghanina kagu aviya, iiyawogha na wawaya beroberodi
sinagogona tagu biidi bi sinimatipo da kasunuyigu,
na toudi wosina sinataguredi da sinabeku.
3 Meboda aviya peyaridi sinapiika sinituwiikapudi da sinagogona tagu biidi,
bi gegha da geananagharedina.
Raghanina sinagogona tagu biidi,
na tagu Yawe God kawagha anitumaghaneni.
4 Tagu sawara tanagha kiiravine Yawe God avibabiini,
sawara tanagha kawagha akayoveni:
Yagu wiina kirakii da yagu yawa tupana kamone na yana bare kamone anamakae,
bi anakita da touna imiise da awaki patana
bi yana Bare Kabikabikuwayine anarupari touna biidi.
5 Raghanina piropiro anabanani na yana gawara nighorovine inikowoyigu,
bi yana bare kamone inababaregu,
touna akima kiidamo kirakiine inatoregeeyegu
meme kagu aviya gerubana sinakabiguna.
6 Kagu aviya sinagwagwara wiikenaviviregu,
bi gegha da animaragata kirakii da anageiwayidi.
Yawe God yana bare kabikabikuwayina kamone tagu suwara anagibu,
bi nuwamiiseye anarukwatu da anatawora
bi inawa anarouwa da ayima anakabepepi.
7 Yawe God, raghanina arupari tam biidi na kwawaiyanegu,
kinuwanuwaghanegu bi yagu sisiya kuwonabodegu!
8 Tam kuwonegu bo, Piika kunisisiya tagu biidi,
na kata apiipiika tam biidi.
9 Tagu yam wiitamariyana,
genuwanuwam inapughu da kunamiiri kubuteguna,
gegwabiguma kunakowoghana!
Tam kuviyawiigu bi nonowa kwiiwiitegu,
na kata gekunakuyoveguna!
10 Meboda tamagunaki da sinagunaki sinamiiri kubutegu,
bi gegha, Yawe God na nonowa inakoyakoyayigu.
11 Yawe God, kagu aviya sikoyakoyagha da sinaburavigu,
na kiyevevegu da anakivinim,
bi keda rotomanidiye kinaghovegu.
12 Nokodi aviyidi kiiraviguve sisiya wiiyaba saberabera,
yadi wiina da siniberogu,
na gekuniwaghasinedi da sinaburaviguna!
13 Bi gegha da iitumaghana da Yawe God miisena inabera tagu biidi,
raghanina mmko kuburina debane patana yawayawiiguve amakamakena
bi anakitani da noko inabera.
14 Na tam Yawe God kitumaghaneni,
kimaragata bi nuwanuwam inatora,
na Yawe God kitumaghaneni.