34
God yana Miisena kiiravine Kabepepina
Raghani tana Abimelek naghone bi Deivid ibera da ware iyaneghanegha na iviporataveni inagho. Muriye na God metagha Deivid iviwiiteni na kiiravine noko raghanine mmko ayina igirumi.
1 Tagu raghani nonowa Yawe God anakabepepi
bi yana miisena kiiravine anisisiya.
2 Tagu kana waghawagha iragata kirakii na anakabepepi,
tami moyamoyakimi yagu sisiya koyawaiyana bi koyinuwamiise.
3 Kobera da tupada Yawe God tana kabepepi,
kobera da tupada kana waghawagha tana kabikarawayeni!
4 Tagu arupari Yawe God biidi na iwonabodegu,
nokodi wawaya ayanaghanagharedi, na gwabidima iviyawiigu.
5 Wawaya iiyawogha wiiwiita kiiravine samiiri wamira Yawe God biidi,
na toudi parapa sinuwamiise,
bi nonowa iniwiitedi.
6 Tagu piropiro kamone bi arupari na Yawe God iwaiyanegu,
touna yagu nuwapoya tupadi kamodima iviyawiigu.
7 Bi wawaya iiyawogha Yawe God sakabi karawayeni,
na yana aneya inakoyayidi,
bi riiridiye yamake da yitarababaranedi.
8 Na Yawe God biidi komiiriwamira
bi tami bada konakabibanani da yana miisena metagha.
Memeda wiiwiita kiiravine konanagho touna biidi,
na tami parapa koninuwamiise.
9 Tami wiiwiigeruwana dammi,
Yawe God kokabikarawayeni.
Wawaya iiyawogha sakabikarawayeni na
getana awaki siyadadiyenina.
10 Raghani viya, na laiyon kadi kam sarukwamra na vitonana sarabobo,
bi gegha da Yawe God yana wiiwiigeruwana damdi na
sawara miisedi bogaebogae gesinadiyanana.
11 Natunatugu, kopiika yagu sisiya konawaiyana.
Tagu aniyevevemi da metagha Yawe God konakabikuwayeni.
12 Memeda makewiiguri konakayoveni
bi yawa miisena kabina,
13 na gewawaya konisisiya berovedi
da gekoniyabana.
14 Berabero beradima komiiriwamira,
bi miisena konabera,
kovi matipo kirakii bi wawaya koniwiitedi
da nuwaruririye sinamakae.
15 Yawe God na rotomana berabera wawayidi yakighukighudi,
raghanina wiiwiita kiiravine sakwatu touna biidi na yawaiyanedi.
16 Bi bera bero wawayidi na yamiiri kubutedi da yiaviyedi,
toudi sinarabobo da getana iiyabo inanoghota mayedina.
17 Raghanina Yawe God yana wawaya wiiwiita kiiravine sarukwatu,
na yawaiyanedi,
da yadi piropiroma yiyawiidi.
18 Yawe God na noghota kawakawa wawayidi yagwabigwabiyedi,
bi raghanina wawaya yadi noghota parapa sabeku na yiwiitedi.
19 Rotomana berabera wawayidi na nuwapoya peyaridi sabanana,
bi gegha da Yawe God yiwiitena nonovedi.
20 Touna irikedi tupadi yabaabarena wiimasiyedi
da irikedi getana inipokina.
21 Bi wawaya berodi kiiravidiye,
na toudi wosina yadi berona sinageghomiiri da sinirabobodi,
bi rotomana berabera wawayidi
kadi aviya na aro sinakabi.
22 Bi gegha, Yawe God yana wiitamariyana yiyawiidi.
Wawaya iiyawogha wiiwiita kiiravine samiiri karona
touna biidi na aro gesinabananina.