62
1 Yinni Gusunɔ u nɛɛ,
wunɛ Yerusɑlɛmu, wunɛn kĩrun sɔ̃ nɑ ǹ mɑrimɔ.
Nɑ ǹ mɑɑ wɛ̃rɑmɔ sere n kɑ nun fɑɑbɑ ko,
kpɑ yu sɔ̃ɔsirɑ nɡe bururun sɔ̃ɔ,
ǹ kun mɛ, nɡe wii bɔn te tɑ dɔ̃ɔ yɑbure,
2 kpɑ bwesenu kpuro nu wɑ
mɑ nɑ nun fɑɑbɑ kuɑ,
kpɑ sinɑmbu bɑ n wunɛn yiiko mɛɛrɑ.
Yĩsi kpɑɑrɑ bɑ koo kɑ nun soku
te nɛ, Yinni Gusunɔ kon nun kɛ̃.
3 Kpɑ ɑ n sɑ̃ɑ nɡe furɔ bɛɛrɛɡuu
ɡe ɡɑ bɑllimɔ nɛ, Gusunɔ wunɛn Yinnin nɔmɑ sɔɔ.
4 Bɑ ǹ mɑɑ nun sokumɔ wuu ɡe nɑ deri.
Bɑ koo nun sokuwɑ nɛ, Yinni Gusunɔn nuku dobu.
Domi wunɛ sɔɔrɑ nɛn nuku dobu wɑ̃ɑ.
Bɑ ǹ mɑɑ wunɛn tem sokumɔ bɑnsu.
Bɑ koo mu sokuwɑ kurɔ kpɑo,
domi kon mu durɔ kɛ̃.
5 Nɡe mɛ bii durɔbu ɡɑ koo kɑ ɡen kurɔ ɡbinnɑ,
nɡe mɛyɑ wunɛn bibu bɑ koo kɑ nun ɡbinnɑ.
Nɡe mɛ ɑluwɑɑsi u rɑ n nuku dobu mɔ win kurɔ kɛ̃ɛron sɔ̃,
nɡe mɛyɑ ko nɑ n nuku dobu mɔ wunɛn sɔ̃.
6 Wunɛ Yerusɑlɛmu,
nɑ derɑ ɡɑbɑ sɑ̃ɑ nɡe wuu kɔ̃sobu
be bɑ rɑ n yɔ̃ ɡbɑ̃rɑru wɔllɔ,
bɑ ǹ nɔɔ mɑrimɔ sɔ̃ɔ sɔɔ kɑ wɔ̃kuru.
Bɛɛ wuu kɔ̃sobu,
bɛɛ be i nɛ, Yinni Gusunɔ Yerusɑlɛmun ɡɑri yɑɑyɑsiɑmɔ,
i ku wɛ̃rɑ.
7 I ku de n wɛ̃rɑ sere n kɑ Yerusɑlɛmu swĩi,
kpɑ yɑ n bɛɛrɛ mɔ hɑnduniɑ sɔɔ.
8 Nɛ, Yinni Gusunɔ, nɑ bɔ̃ruɑ kɑ nɛn dɑm, nɑ nɛɛ,
nɑ ǹ mɑɑ wunɛn ɑlikɑmɑ yibɛrɛbɑ wɛ̃ɛmɔ bu di.
Mɛyɑ sɔbu bɑ ǹ mɑɑ wunɛn tɑm nɔrumɔ,
mɛ mu sɑ̃ɑ wunɛn sɔmburun ɑre.
9 Adɑmɑ be bɑ ɑlikɑmɑ ɡɑ̃ bɑ koo ye di,
kpɑ bu nɛ, Yinni Gusunɔ siɑrɑ.
Be bɑ mɑɑ ben resɛmbɑ sɔrɑ
bɑ koo yen tɑm nɔ nɛ, Yinni Gusunɔn sɑ̃ɑ yerɔ.
10 Bɛɛ Yerusɑlɛmuɡibu,
i yɑrio sɑɑ wuun di,
i bɛɛn tɔn be bɑ wee swɑɑ sɔnwɑ,
i yen kpenu wunɑ i nɔɔ nɛrɑsiɑ.
I ɡidi bɔrɑ yɔ̃rɑsio ben berɑ ɡiɑ.
11 Wee ye nɛ, Yinni Gusunɔ, nɑ hɑnduniɑn tɔmbu kpuro sɔ̃ɔmɔ.
Nɑ nɛɛ, i Yerusɑlɛmuɡibu sɔ̃ɔwɔ i nɛɛ,
wee, nɛ, ben fɑɑbɑ kowo, nɑ sisi
kɑ ben tɔn be bɑ rɑɑ yoru mwɛɛrɑ.
12 Bɑ koo bu soku bwese te nɑ ɡɔsɑ nɑ yɑkiɑ.
Wunɛ mɑɑ Yerusɑlɛmu, bɑ ǹ mɑɑ nun sokumɔ wuu ɡe nɑ deri.
Bɑ koo nun sokuwɑ wuu ɡe nɑ kĩ.
Yinni Gusunɔ u nɑsɑrɑ
wɑ hɑnduniɑ kpuro sɔɔ