63
1 Wɑrɑ u wee Botisirɑn di
ye yɑ wɑ̃ɑ Edɔmun temɔ,
u yɑbe swɑ̃ɑru sebuɑ kom kom.
Mɑ u sĩimɔ kɑ win dɑm kpuro, kɑ toro sindu.
Yinni Gusunɔ u nɛɛ,
nɛnɑ nɑ wee n kɑ siri dee dee.
Nɑ dɑm mɔ n kɑ nɛn tɔmbu fɑɑbɑ ko.
2 Mbɑn sɔ̃nɑ wunɛn yɑ̃nu nu sɔ̃ri
nɡe wi u resɛm ɡɑmɑmɔ.
3 U wisɑ u nɛɛ,
nɛ turowɑ nɑ dɑ nɑ tɔmbu tɑɑkɑ nɡe resɛm.
Bwesenu kpuro sɔɔ, bɑɑ tɔn turo u ǹ nɛ u mɑn somi.
Nɑ bu tɑɑkɑ nɑ kɔsukɑ kɑ mɔru,
sere ben yɛm mu nɛn yɑ̃nu wisi nu disinu kuɑ.
4 Domi nɑ ɡɔ̃ru doke n kɑ mɔru kɔsiɑ.
Tɔ̃rɑ mɑɑ turɑ n kɑ nɛn tɔmbu yɑkiɑ.
5 Nɑ mɛɛrɑ mɛɛrɑ nɑ biti soorɑ.
Nɑ ǹ wɑ wi u koo mɑn somi.
Goo sɑri wi u koo mɑn dɑm kɛ̃.
Adɑmɑ nɛn mɔru yɑ mɑn dɑm sosiɑ nɑ kɑ nɑsɑrɑ wɑ.
6 Wee, nɑ tɔmbu tɑɑkɑ kɑ mɔru.
Bɑ burisinɑ nɡe tɑm nɔrobu nɛn mɔrun sɔ̃.
Mɑ nɑ ben yɛm yɑri temɔ.
Yinni Gusunɔ
u Isirelibɑ durom kuɑ
7 Kon Yinni Gusunɔn durom mɛ u sun kuɑ kpɑrɑ,
kpɑ n nùn tɔmɑ ye u sun kuɑn sɔ̃.
Kon win tɔn ɡeerun ɡɑri ɡere
te u bɛsɛ Isirelibɑ sɔ̃ɔsi
win wɔnwɔndu kɑ win kĩi bɑkɑrun sɑɑbu.
8 U bwisikɑ u nɛɛ, sɑ sɑ̃ɑwɑ win tɔmbu,
sɑ ǹ nùn tɔnu kɑndu kuɑmmɛ.
Yen sɔ̃nɑ u sun fɑɑbɑ kuɑ.
9 Bɛsɛn wɑhɑlɑ kpuro sɔɔ, u sun somi.
N ǹ mɔ win ɡɔrɑdo u sun fɑɑbɑ kuɑ,
win tiiwɑ u sun yɑkiɑ
win kĩru kɑ win wɔnwɔndun sɔ̃.
Mɑ u sun nɔɔri sɑɑ yellun di.
10 Adɑmɑ sɑ nùn seesi sɑ win Hunde nuki sɑnkɑ.
Yen sɔ̃nɑ u kuɑ bɛsɛn yibɛrɛ
mɑ u kɑ sun tɑbu kuɑ.
11 Mɑ sɑ Mɔwisin wɑɑti yɑɑyɑ sɑ nɛɛ,
mɑnɑ Yinni Gusunɔ u wɑ̃ɑ
wi u kɑ bɛsɛ kɑ bɛsɛn wiruɡibu nim wɔ̃ku tɔburɑ.
Mɑnɑ u wɑ̃ɑ,
wi u derɑ win Hunde Dɛɛro u wɑ̃ɑ bɛsɛn suunu sɔɔ.
12 Mɑ u Mɔwisi kpɑrɑ kɑ win dɑm bɑkɑm.
U nim burɑnɑ bɛsɛn wuswɑɑɔ
u n kɑ yĩsi bɛɛrɛɡiru yɑrɑ
sere kɑ bɑɑdommɑɔ.
13 U sun kpɑrɑ nim bweru sɔɔ.
Mɑ sɑ sĩɑ ɡbɑburɔ
nɡe dumi yi yi duki mɔ̀,
sɑ ǹ sokure.
14 Win Hunde u kɑ sun dɑ sɑ wɛ̃rɑ
nɡe mɛ yɑ̃ɑ kpɑro u rɑ kɑ win yɑɑ sɑbenu de wɔwɑɔ.
Nɡe mɛyɑ u sun kpɑrɑ u kɑ yĩsi bɛɛrɛɡiru yɑrɑ.
Isirelibɑ bɑ Gusunɔ
wɔnwɔndu kɑ somiru kɑnɑmɔ
15 Yinni Gusunɔ,
ɑ mɛɛrimɑ sɑɑ wɔllun di
mi wunɛn wɑ̃ɑ yee dɛɛrɑru kɑ yiikoɡirɑ wɑ̃ɑ,
kpɑ ɑ wɑ ye yɑ sun mɔ̀.
Mɑnɑ wunɛn hɑniɑ kɑ wunɛn dɑm mu wɑ̃ɑ.
Wee ɑ sun wunɛn kĩru kɑ wunɛn wɔnwɔndu wunɑri.
16 Adɑmɑ wunɑ ɑ sɑ̃ɑ bɛsɛn bɑɑbɑ.
Bɛsɛn yĩiyɔbu kun mɑɑ wɑ̃ɑ bɛsɛn sikɑdobɑ sɔɔ.
Bɑɑ Aburɑhɑmu kɑ Isireli bɑ̀ kun sun wure,
Yinni Gusunɔ, wunɑ ɑ sɑ̃ɑ bɛsɛn bɑɑbɑ,
wunɛ wi ɑ sun fɑɑbɑ kuɑ sɑɑ yellun di.
17 Yinni Gusunɔ,
mbɑn sɔ̃nɑ ɑ derɑ sɑ kɑ wunɛn swɛɛ tondɑ,
mɑ bɛsɛn ɡɔ̃rusu bɔbiɑ,
sɑ ǹ mɑɑ nun nɑsie.
A wurɑmɑ bɛsɛn kĩrun sɔ̃ bɛsɛ be sɑ nun sɑ̃ɑmɔ.
Sɑ sɑ̃ɑwɑ wunɛɡibu sɑɑ yellun di.
18 Wee, sɑɑ fiiko tɔnɑwɑ bɛsɛ wunɛn tɔn be ɑ ɡɔsɑ,
sɑ sinɑ tem mɛ sɔɔ.
Mɑ bɛsɛn yibɛrɛbɑ bɑ wunɛn sɑ̃ɑ yeru wɔri bɑ kɔsukɑ.
19 Wee yɑ tɛ, mìn di sɑ sɑ̃ɑ nɡe be ɑ ǹ kpɑre,
kɑ be bɑ ǹ wunɛn yĩsiru sɔɔwɑ.
Yinni Gusunɔ, sɑ nun mɑrɑ
ɑ wɔllu ɡĩɑ kpɑ ɑ sɑrɑmɑ.
À n tunumɑ, ɡuunu nu koo diiri bɛrum sɔ̃.