24
1 Dɑfidin womu.
Yinni Gusunɔ, wunɑ ɑ tem mɔ kɑ ye yɑ wɑ̃ɑ mɛ sɔɔ.
Wunɑ ɑ hɑnduniɑ mɔ kɑ yen hunde konibɑ kpuro.
2 Wunɑ ɑ tem kpɛɛkpɛɛku swĩi nim wɔ̃ku sɔɔ.
Wunɑ ɑ mu bɔnu kuɑ kɑ dɑɑnu.
3 Wɑrɑ u koo kpĩ u yɔ wunɛn ɡuurɔ
mi wunɛn wɑ̃ɑ yee dɛɛrɑrɑ wɑ̃ɑ.
4 Wi u koo yɔ mi,
wiyɑ wìn ɡɔ̃ru ɡɑ dɛɛre.
Wiyɑ wìn nɔmɑ yɑ sɑ̃re.
Wiyɑ wi u ku rɑ weesu swĩi.
Wiyɑ wi u ku rɑ bɔ̃re u kɑ tɔnu nɔni wɔ̃ke.
5-6 Wiyɑ wi u wunɛ Gusunɔ, Yɑkɔbun Yinni soku.
Wi u sɑ̃ɑ nɡe mɛ,
wiyɑ kɑɑ domɑru kuɑ.
Wiyɑ kɑɑ fɑɑbɑ ko.
Wiyɑ kɑɑ ɡem wɛ̃.
7 Bɛɛ wuun kɔ̃sobu, i kɔnnɔ ɡunum sosio.
I Yinni Gusunɔn sɑ̃ɑ yerun kɔnnɔ kɛniɔ.
I de sinɑ boko bɛɛrɛɡii u du.
8 Wɑrɑ u sɑ̃ɑ sinɑ boko wi.
Yinni Gusunɔwɑ.
U dɑm mɔ, u yiiko mɔ,
u sɑ̃ɑwɑ tɑbu durɔ dɑmɡii.
9 Bɛɛ wuun kɔ̃sobu, i kɔnnɔ ɡunum sosio.
I Yinni Gusunɔn sɑ̃ɑ yerun kɔnnɔ kɛniɔ.
I de sinɑ boko bɛɛrɛɡii u du.
10 Wɑrɑ u sɑ̃ɑ sinɑ boko wi.
Gusunɔ, wɔllu kɑ tem Yinniwɑ.
Wiyɑ sinɑ boko bɛɛrɛɡii.