2
کانائے مێتگئے سور و آرۆس
1 سئیمی رۆچا، جَلیلا، کانا نامێن مێتگێا، سور و آرۆسے هست‌اَت و ایسّائے مات هم همۆدا اَت.
2 ایسّا و آییئے مریدِش هم لۆٹتگ‌اتنت.
3 وهدے شراب هَلّتنت، ایسّائے ماتا گۆن آییا گوَشت: «آیان دگه شراب نێست.»
4 گوَشتی: «او بانُک! منا و ترا گۆن اِشیا چِه کار؟ منی وهد اَنگت نرَستگ.»
5 ماتا گۆن کارنده و هِزمتکاران گوَشت: «هرچے شمارا گوَشیت، هما کارا بکنێت.»
6 اۆدا آپئے شَش سِنگێن کونزگ اێر اَت، که هر یکّێا سَد تاسئے جاگه هست‌اَت و یَهودیانی پاکیزگیئے رسمان کارمرزَ بوتنت.
7 ایسّایا گۆن هِزمتکاران گوَشت: «کونزگان چه آپا پُرّ کنێت.» گڑا کونزگِش چه آپا سررێچ کرتنت.
8 نون ایسّایا گوَشت: «په دیوانئے کماشا کَمُّکے ببرێت.» آیان اَنچش کرت.
9 دیوانئے کماشا نزانت اے آپ که شراب بوتگ‌اتنت چه کجا آرگ بوتگ‌اَنت، آییا چَشِت و نۆش کرتنت، بله هِزمتکاران که آپ کَشّتگ‌اتنت زانتِش. نون دیوانئے کماشا، سالۆنک تئوار جت و
10 گوَشتی: «هرکَس مهمانان شرترێن شرابا پێسرا دنت، وهدے آ ملار و سرگْرانَ بنت، رَندا اَدنا و اَرزانترێنا کارنت. بله تئو شرترێن نۆکی آورتگ!»
11 اے مۆجزه و اَجَبَّتێن نشانی که جَلیلئے مێتگ کانایا بوت، ایسّائے ائولی مۆجزه اَت. آییا گۆن همے مۆجزها وتی مزنی و شئوکت پَدّر کرت و مریدان آییئے سرا ایمان آورت.
12 رَندا ایسّا گۆن وتی مات، برات و مریدان کَپَرناهومئے شهرا شت و لهتێن رۆچا همۆدا مَنت.
ایسّا مزنێن پرستشگاها رئوت
(مَتّا 21:12–13؛ مَرکاس 11:15–17؛ لوکا 19:45–46)
13 یَهودیانی پِسَه، بزان سَرگوَزئے ایید، نزّیک اَت. پمێشکا، ایسّا اورْشَلیما شت.
14 مزنێن پرستشگاهئے تها دیستی که مردم گۆک، پَس و کپۆتئے بها کنگا گُلاێش اَنت و زرّ بَدَ‌ل کنۆکێن سَرّاپ هم نِشتگ‌اَنت.
15 گڑا گۆن ساد و چیلّکا، هئیزرانے جۆڑێنتی و سجّهێن باپاری و پَس و گۆکی چه پرستشگاها در کرتنت و سَرّاپانی زرّ و سِکَّه‌ای هم رێتکنت و میزّ و بَرۆنکی چپّیگ کرتنت.
16 گڑا گۆن کپۆت بها کنۆکان گوَشتی: «اِشان چه اِدا در کنێت. منی آسمانی پتئے لۆگا بازارے مکنێت.»
17 نون مرید یات و ترانَگا کپتنت که هُدائے پاکێن کتابَ گوَشیت: آ گئیرت که منا په هُدائے لۆگا هست‌اِنت، منا جانسۆچَ کنت و باهێنیت.
18 گڑا یَهودیان گوَشت: «تئو گۆن چۆنێن نشانیے پَدّرَ کنئے که ترا اے کارانی اِجازت هست‌اِنت؟»
19 ایسّایا گوَشت: «اے مزنێن پرستشگاها بپرۆشێت و کرۆجێت، من سئے رۆچا پدا چستیَ کنان.»
20 یَهودیان گوَشت: «اے مزنێن پرستشگاه، چِل و شَش سالا جۆڑ کنگ بوتگ، تئو چۆن آییا سئے رۆچا چستَ کنئے؟»
21 بله آ پرستشگاه که ایسّا آییئے بارئوا گپّ کنگا اَت، آییئے جندئے جسم و جان اَت.
22 چه ایسّائے مِرَگ و جاه جنَگا رَند، مرید یات و تْرانَگا کپتنت که آییا وت اے هبر گوَشتگ‌اَت، پمێشکا هُدائے پاکێن کتاب و ایسّائے هبرانی سرا ایمانِش آورت.
23 آ رۆچان، ایسّا په سَرگوَزئے اییدا اورْشَلیما اَت. بازێن مردمێا که ایسّائے اَجَبَّتێن نشانی دیستنت، آییئے نامئے سرا باورِش کرت.
24 بله ایسّایا وتا آیانی دێما زاهر و پَدّر نکرت، چیا که آییا سجّهێن مردم شَرّیئے سرا زانتنت.
25 په انسانئے زانگ و پَجّاه آرگا، آییا هچکَسێئے گواهیئے زلورت نه‌اَت، چیا که آ، مردمانی دلئے هر هالا سهیگ اَت.