3
Dega mondhéay drahbakshi
(Mattá 12:9–14; Luká 6:6–11)
Dega randé, Issá kanisahá shot. Mardé hamódá at ke dasti hoshk o mondh at. Mardománi chamm Issáyá sakk atant ke agan Issá Shabbatay róchá é mardá dráh bekant, gorhá má áiay sará bohtámá* jata kanén. Issáyá gón mondhén mardá gwasht: “Byá, démá bósht.” Nun gón mardomán gwashti: “Shabbatay róchá, néki kanag rawá ent yá badi kanag? Zenday rakkénag yá zenday gerag?” Mardom bétawár atant. Issáyá pa zahr cháretant, chéá ke cha áyáni sengdeliá sakk padard at. Gón á mardá gwashti: “Dastá shahár day!” Áiá dast shahár dát o dasti wassh o dráh but. Gorhá Parisi damáná dhanná dar átkant o gón Hirudián pa Issáay koshagá pandalay§ sázagesh bendát* kort.
Bázén mardomé Issáay randgira bit
(Luká 6:17–19)
Issá gón wati moridán cha mardomán dur, gwarmay lambá shot. Cha Jalilá mazanén rombé mardom áiay randá rawán but. Cha Yahudiah, Urshalim, Edumiah o Ordonay kawray á dastá o cha Sur o Saydunay chapp o chágerdá ham bázén mardomé áiay kerrá mocch but. Chéá ke áyán eshkotagat ke Issá ché kanagá ent. Mocchi mérhiay sawabá Issáyá gón moridán gwasht: “Bójigé tayár kanét ke cha mardománi mocchiá dur bebén.” 10 Áiá bázén mardomé dráh kortagat, paméshká nádráhén mardom télánk dayán o démá kenzán atant ke má Issáyá dast bejanén. 11 Jenni nádráhán har wahdá ke Issá dist, áiay pádána kaptant, kukkáresha kort o gwashtesh: “Taw Hodáay Chokk ay.” 12 Issáyá kaddhana kortant ke kassá hál madayét.
Dwázdah káseday gechén kanag
(Mattá 10:1–2; Luká 6:12–16)
13 Randá, Issá kóhay sará sar kapt o hamá mardom ke áiá lóthet ke byáyant, tawári kortant o á Issáay kerrá átkant. 14 Issáyá dwázdah kas gechén kort o wati kásed náméntant ke gón áiá hamráh bebant o áyán pa wasshén mestágay járay janagá rawán bedant. 15 Jenn kasshagay ehtiári ham dátant. 16 É dwázdahén kásedáni nám esh ant:
 
Shamun ke Issáyá áiay domi nám, “Petros” kort,
17 Zebdiay chokk Ákub o Ákubay brát Yuhanná ke Issáyá áyáni nám “Bu Ánergés” kort, bezán granday chokk,
18 Andriás,
Pilipos,
Bartulumá,
Mattá,
Tumá,
Halpiay chokk Ákub,
Taddá,
sarmachárén Shamun§ o
19 Yahudá Eskaryuti ke randá Issái dróhet* o dozhmenáni dastá dát.
Issá o Belzabul
(Mattá 12:22–32; Luká 11:14–23)
20 Randá, Issá lógéá shot. Haminchok mardom padá átk o mocch but ke Issá o moridán nán waragay móh ham nabut. 21 Issáay syád o wáres ke sahig butant, áiay randá átkant, chéá ke lahténá gwashtagat ke Issá sare wat naent. 22 Cha Urshalimá átkagén Sharyatay zánógerán gwashtagat ke Issáyá jenn per o gón jennáni sardár Belzabulay zórá jennána kasshit. 23 Issáyá é mardom lótháéntant, mesálé dát o gwashti: “Shaytán chón Shaytáná kasshet kant? 24 Agan molkéá nátepáki bebit, á molk barjáha namánit o 25 agan lógéá nátepáki bebit, á lóg barjáh namánit. 26 Hamé dhawlá, agan Shaytán wati jenday helápá pád byayt o gón wat nátepák bebit, óshtáta nakant, halása bit. 27 Zóráwarén mardoméay lógá hechkas potert o pol o pánch korta nakant, tán wahdé ke á zóráwarén mardomá magipt o mabandit. Randá áiay lógá pol o pánch korta kant. 28 Shomárá rásténa gwashán, mardománi sajjahén gonáh o kopr bakshaga bant, 29 bale hamá ke Pákén Ruhay bárawá kopra kant, hechbar baskhaga nabit o abadi gonahkára mánit.” 30 Issáyá paméshká é habar kort ke á gwashagá atant: “Issáyá jenné per ent.”
Issáay mát o brát
(Mattá 12:46–50; Luká 8:19–21)
31 Issáay mát o brát átkant o dhanná óshtátant, mardomé démesh dát ke Issáyá tawár kan. 32 Issáay chapp o chágerdá báz mardom neshtagat, Issáesh hál dát: “Tai mát o brát dhanná óshtátagant o tará lóthagá ant.” 33 Issáyá áyáni passawá§ jost kort: “Mani mát o brát kay ant?” 34 Padá Issáyá gerdágerd neshtagén mardománi némagá cháret o gwashti: “Mani mát o brát esh ant! 35 Hamá mardom ke Hodáay wáhag* o razáay sará amala kant, mani mát o gohár o brát hamá ent.”
* 3:2 Bohtám, bezán malámat, tohmat. 3:4 Rakkénag, bezán neját dayag, bacchénag. 3:6 Hirudi, bezán Hirudis bádsháhay dózwáh. § 3:6 Pandal, bezán sázesh, repk o honar. * 3:6 Bendát, bezán bongéj, shoru. 3:9 Mérhi, bezán mazanén mocchi o sholuki. 3:16 Yunáni zobáná, “petrá” sengén oh o talárá gwashant o “petros” dhóká gwashant. § 3:18 Bázéné gomána kanant ke sarmacháray máná esh ent: Shamun Yahudiáni yakk dini syási párthiéay básk butag ke Rumiáni démá óshtátag. * 3:19 Dróhag, bezán hamráhdári nakanag, helápá rawag. Arabi o Pársiá “khiánat”. 3:20 Móh, bezán wahd, porsat, mókal, wár o gég. 3:27 Pol o pánch, bezán zórbord, lotth o pol. § 3:33 Passaw, bezán jwáb. * 3:35 Wáhag, bezán lóth, talab, hájat.