22
Taw chiá maná tahná esht?
Pa sázger o washáwázáni sálárá. Dáuday Zabur. “Sahargáhi áskay” tarzay sará.
1 Oo mani Hodá, oo mani Hodá! Taw chiá maná tahná esht?
Pa ché cha mani rakkénagá dur ay,
cha mani áh o peryátán sakk jetá ay.
2 Oo mani Hodá! Sajjahén róchá peryáta kanán o taw passawé nadayay,
sajjahén shapá ham, bale áráma nagerán.
3 Angat ham taw pák o palgár ay,
Bani Esráil tará názénit ke taw pa bádsháhi neshtagay.
4 May petán tai sará tawkal kort,
tai sará tawkalesh kort o taw rakkéntant.
5 Tai dargáhá peryátesh kort o rakketant,
tai sará tawkalesh kort o pashal o sharmendag nabutant.
6 Záná, man ensáné naán, kermé án?
Mardománi démá sobakk án o kawmay chammá béezzat.
7 Harkas ke maná gendit kalág o rishkand kant.
Dapá chótha kanant, sará sorénant o gwashant:
8 “Angat wati óst o ométá pa Hodáyá band,
bell á tará berakkénit,
berakkénit agan tará dósta dárit.”
9 Bale taw maná cha mátay lápá dar áwort o
mátay sénagá ásudagi dát.
10 Cha pédáeshá tai baddhá dawr dayag bután,
cha mátay lápá mani Hodá butagay.
11 Cha man dur mabay,
chiá ke sakki o sóri nazzik ent o
kassé pa komaká nést.
12 Bázén narén gókéá mani chapp o chágerd geptag,
Báshánay sardhagáray zóráwarén gókán maná angerr kortag,
13 wati práhén dapesh pa man parroptag,
gorrók o derrókén shéráni paymá.
14 Chó ke ápá réchag o tálán butagán
sajjahén haddhon cha bandán dar átkagant.
Delon chó ke mómá áp ent o sénagá sóchit.
15 Zór o tágaton kunzagi chondhé ke hoshk butag o
zobánon nokká lacchetag,
maná markay háká wápéntaget.
16 Kochekán mani chapp o chágerd geptag,
sherr o badkáráni rombá angerr án,
mani dast o pádesh thong thong kortagant,
17 wati sajjahén haddhán shomár korta kanán.
Áyán wati thélag pa man sakk kortagant,
18 mani pocchán wati nyámá bahra kanant o
jámagay sará pála janant.
19 Bale taw, oo Hodáwand! Dur mabay.
Oo mani zór o tawkal! Pa mani komaká eshtáp kan.
20 Mani arwáhá cha zahm o shamshirá berakkén o
mani zendagiá cha kochekáni zolm o zórákiá.
21 Maná cha shér o mazáráni dapá neját beday,
ke taw maná cha wahshién káigaráni kánthán rakkéntag.
22 Tai námá pa wati brátán jára janán o
mocchiay nyámá tará názénán.
23 Shomá, oo Hodátorsán! Áiá benázénét.
Oo Ákubay sajjahén chokk o óbádagán! Áiá ezzat o shán bedayét.
Oo Esráilay padréchán! Áiay haybatá bechárét.
24 Chiá ke áiá cha setam distagénay bazzagiá posht nakortag o
démi cha áiá natarréntag.
Peryáti ke kortag áiá eshkotagant.
25 Mazanén diwáná mani satá o saná pa taw ent,
wati kawlán hamáyáni démá sarjama kanán ke Hodátors ant.
26 Békebr o darbésh waráka warant o séra bant o
á ke Hodáyá shóháza kanant áiá názénant.
shomay del tán abad zendag bát.
27 Zeminay chárén kondh áiá yáta kanant o
dém pa Hodáwandá pera tarrant,
sajjahén kawmáni hándán o kothom áiay bárgáhá sará jahla kanant.
28 Chiá ke bádsháhi Hodáwandayg ent o
hamá ent ke kawmáni sará hákemia kant.
29 Zeminay sajjahén zóráwar waráka warant o áiay démá kapant,
hákién ensán kóndhána kapit,
hamá ke watá, wat zendag dáshta nakant.
30 Áyókén nasl áiay hezmatá bant,
démi padréch Hodáwanday bárawá sahig kanaga bant o
31 pa áyán ke angat wadi nabutagant
áiay adl o ensápá jára janant.
Gwashant: “Á hamá at ke é kári kort.”