32
Bahtáwar hamá ent ke gonáhi bakshag butagant
Dáuday shayri gwashtánk.
1 Bahtáwar hamá ent ke Hodáwand cha áiay násharián sar gwastag o
gonáhi bakshag butagant.
2 Bahtáwar hamá ent ke Hodáwand áiay gonáhá hechbar hesába nayárit o
áiay arwáhá prébé mán nést.
3 Wahdé chopp o bétawár atán
haddh o bandon pussán atant,
cha sajjahén róchay zári o peryátán.
4 Chiá ke róch o shap tai dast mani sará sangin at,
sajjahén tágaton hoshagá at, chó ke garmágay taptay chérá bebán. Ósht...
5 Gorhá wati gonáhon tai dargáhá mannet o
wati náparmániánon chér nadát.
Gwashton: “Wati gonáh o sarkashián Hodáwanday gwará mannán” o
taw mani gonáhay mayárbári bakshet. Ósht...
6 Paméshká, tán wahd o móh ent,
har Hodádóst tai gwará dwá bekant,
wahdé hárén áp chesta bant,
hech paymá pa áiá sar buta nakanant.
7 Taw mani chér bayagay jágah ay,
cha sakki o tangián maná émena dáray o
gón ázátiay sawt o zémelán gwarambáza kanay. Ósht...
8 Hodáwanda gwashit: “Tará hamá ráhá sója dayán ke báyad ent beraway,
tará shawr o saláha dayán o
tará chárána bán.
9 Násarpadén asp yá kacharay paymá mabay,
ke tahná gón lagám o mahárá rám kanaga bit,
agan na, tai nazziká nayayt.”
10 Badkáray ranj o azáb báz ant,
bale Hodáwanday mehr hamáiay chapp o chágerdá gipt
ke Hodáwanday sará tawkala kant.
11 Oo pahrézkárán! Hodáwanday bárgáhá shádehi kanét o shádán bebét.
Oo sajjahén nékdelán! Shádehiay gwánká borz kanét.