33
Hodáwandá adl o rásti dósta bit
1 Oo pahrézkárán! Hodáwanday bárgáhá pa shádehi kukkár kanét,
nékdelán, Hodáwanday satá kanag zéba dant.
2 Hodáwandá gón chang benázénét,
gón dahtárén changá pa áiá sáz bejanét.
3 Pa áiá, nókén sawté byárét,
gón washpanjagi simmán belarzénét o pa shádehi gwánk janét.
4 Chiá ke Hodáay habar tachk o rást ent o
áiay sajjahén kár gón wapádáriá.
5 Áiá adl o rásti dósta bit,
zemin cha áiay mehrá porr ent.
6 Gón Hodáwanday gál o habará ásmán addh butagant o
áyáni sajjahén lashkar, gón áiay dapay damá.
7 Daryáay ápán mocch o hákótha kant o
johlián mán ambárá.
8 Sajjahén zemin cha Hodáwandá betorsit,
jahánay sajjahén mardom áiá ezzat bedayant.
9 Chiá ke áiá gwasht o hamá chizz paym but,
parmáni dát o barjáh dárag but.
10 Hodáwand, kawmáni shawrbandián pacha réchit o
rájáni kársáziána karójit.
11 Bale Hodáwanday shawr o saláh abadmán ant,
áiay delay shawrbandi pa sajjahén nasl o padréchán.
12 Bahtáwar hamá kawm ent ke Hodáwand áiay Hodá ent,
hamá mardom ke áiá pa wati mirásá gechén kortagant.
13 Hodáwand cha ásmáná jahláda chárit o
sajjahén bani ádamána gendit,
14 cha wati bádsháhi tahtá
zeminay sajjahén jahmenendána chárit,
15 á ke é sajjahénáni deli jórh kortag o
áyáni har kár o kerdá zánt.
16 Bádsháhá, wati lashkaray mazani nejáta nadant o
sarmachárá, wati básk o panjagáni zór.
17 Pa sóbén bayagá, aspay sará omét bandag náhudag ent,
toré zóráwar bebit bale rakkénta nakant.
18 Haw! Hodáwanday chamm gón hamáyán ent ke cha áiá torsant,
gón hamáyán ke óst o ométesh áiay mehr ent,
19 tánke áyáni arwáhá cha marká berakkénit o
mán dhokkálá zendagesh bedárit.
20 May arwáh Hodáwanday wadárá ent,
hamá may komak o espar ent.
21 May del áiay bárgáhá shádmánia kant,
chiá ke may tawkal hamáiay pákén námay sará ent.
22 Oo Hodáwand! Tai mehr may sará sáhél bát,
hamá dábá ke ométen pa taw bastag.