37
Radkáráni sará hasadd makan
Dáuday Zabur.
1 Badkáráni sawabá jósh majan o
radkáráni sará hasadd makan.
2 Chiá ke é káhay paymá zutta gimmorant o
sabzagáni paymá hoshka tarrant.
3 Hodáay sará tawkal kan o nékiay ráhá ger,
wati molká jahmenend bay o
wapádáriay randgir.
4 Cha Hodáwandá shádmán bay
ke á tai delay morádá puraha kant.
5 Wati zendmánay ráhá Hodáwanday sepordag kan o
áiay sará tawkal,
ke kársáz hamá ent.
6 Á tai bémayáriá nuray paymá róshena kant o
dádrasiá chó bámgwáhay rozhnáiá drapshán.
7 Hodáwanday bárgáhá árám bay o
gón ópáré áiay wadárá.
Áyáni sawabá jósh majan ke wati ráhá kámrán ant o
áyáni sawabá ham ke palitén pandalán kára bandant.
8 Cha hezhmá dur bay o gazabá yalah kan.
Jósh majan ke tará dém pa badkáriá bárt.
9 Chiá ke badkár goddhaga bant,
bale á ke Hodáwanday wadárá ant molká mirása barant.
10 Kammoké wahdá rand badkára namánit,
shomá áiá sakk báz shóháza kanét bale nagendéti.
11 Narmdel molká mirása barant o
cha wasshén sohl o émeniá shádkámia kanant.
12 Badkár pahrézkáray helápá pandala sázit o
pa áiá dantána droshit,
13 bale Hodáwand badkáray sará kandit,
chiá ke zánt áiay rócha kayt.
14 Badkár wati zahmá cha nyámá dara kanant o kamáná kasshant,
tán nezór o hájatmandán chér betarrénant o
nékdelán tégáni dapá bedayant.
15 Bale áyáni zahm, wati jenday delá nendit o
kamánesha proshant.
16 Pahrézkáray kammén hasti
cha bázén badkáráni hastiá gehter ent.
17 Chiá ke badkáráni báskay zóra proshit,
bale Hodáwand pahrézkáráni madat kanók ent.
18 Hodáwand bégonáháni rócháni negahpán ent o
mirásesh namirána bit.
19 Baláh o mosibatáni wahdá bazzag o sharmendaga nabant o
kahti o dhokkálay róchán sér o ábáda bant.
20 Bale badkár gára bant,
Hodáwanday dozhmen charágáhay sabzagáni paymá gár.
Haw! Zyána bant, duttay paymá zyán.
21 Badkár wáma kant o padá nadant,
bale pahrézkár pa daspachia bakshit.
22 Allamá, áyán ke Hodáwand barkata dant molká mirása barant,
bale áyán ke nálata kant, gár o bégwáha bant.
23 Hodáwand hamáiay gámán mohra kant
ke Hodáwanday ráhá shádehia kant.
24 Toré bethagalit, zeminá nakapit,
chiá ke Hodáwand áiay negahpán ent.
25 Warná atán o nun pir án,
bale choshén pahrézkáré nadiston ke Hodáwandá yalah kortag
yá ke chokki pa nánéá gadá butagant.
26 Modám daspach ent o pa ásáni wáma dant,
chokki barkata kárant.
27 Cha badiá démá chahr day o néki kan,
gorhá tán abad molká jahmenenda bay.
28 Chiá ke Hodáwandá adl dóst ent o
wati dóstdárán yalaha nakant.
Hodáwand tán abad pahrézkáráni posht o panáh ent,
bale badkáráni nasl goddhaga bit.
29 Pahrézkár molká mirása barant o
tán abad hamódá jahmenenda bant.
30 Pahrézkáray dap hekmat tálána kant o
zobáni adl.
31 Hodáwanday Sharyat áiay delá ent o
pádia nalakoshant.
32 Badkár, pa pahrézkárá kamina kant o
áiay kóshay randá ent.
33 Bale Hodáwand áiá badkáray zóray tahá naperrénit o
wahdé hakdiwáná baraga bit, pa mayárbáriá nayliti.
34 Hodáwanday wadárá bay o hamáiay ráhá bósht,
ke tará pa molkay mirás baragá sarperáza kant,
wata genday ke badkár chón goddhaga bant.
35 Badkár o bérahmén mardé diston ke
sarsabzén drachkéay paymá wati jáhá shádáb at,
36 bale namant o zutt mort,
harché shóházon kort, gendag nabut.
37 Béaybén mardá begend o nékdelá bechár,
chiá ke sohl o émeniay shóház kanóká ákebaté hast,
38 bale sajjahén sarkash gár o gomsára bant,
badkár goddhaga bant o áyán ákebaté nést.
39 Pahrézkáráni rakkénók Hodáwand ent o
sakkiay wahdá áyáni kalát.
40 Hodáwand áyán madata dant o rakkénit,
cha badkáráni dastá rakkénit o nejáta dant,
chiá ke áiay mayár o báhóth ant.