Zaburay cháromi ketáb
90
Zabur 90—106
May dastáni kárán barkat beday
Hodáay hezmatkár Mussáay dwá.
1 Oo Hodáwand! Nasláni nasl
taw may menendjáh butagay.
2 Cha kóháni pédá bayag o
zemin o jahánay addh kanagá pésar,
cha azal tán abad, Hodá taw ay.
3 Ensáná padá hákay chérá baray o
gwashay: “Oo ensánay chokk! Háká per tarr.”
4 Hazár sál pa taw chó gwastagén yak róchéá ent,
chó shapi yak páséá.
5 Ensán wábé o chó háréá áiá rópána kanay.
Sohbá chó káhá tázag ent,
6 sabáhá rodit o sabzit,
bégáhá gimmorit o hoshka tarrit.
7 Cha tai hezhmá halása bén,
cha tai gazabá paréshán.
8 Taw may mayár wati démá kortagant o
chérén gonáh wati bárgáhay rozhnáiá.
9 May sajjahén zend tai hezhmay chérá gwazit o
wati sálán pa nálagá halása kanén.
10 May omray róch haptád sál ant
yá hashtád sál, agan sakk zreng bebén,
bale sharterén róch ham zahmat o janjálá porr ant,
sakk zutta gwazant o má bála kanén.
11 Kay tai hezhmay trondiá zánt?
tai gazab delá torsa nádénit.
12 Gorhá márá é zántá beday ke may rócháni hesáb kamm ent,
tán may del aglmand bebit.
13 Dém pa má per tarr, oo Hodáwand! Tán kadén chosha bit?
Wati hezmatkáráni sará rahm kan.
14 Bámgwáhán, márá gón wati mehrá sér kan,
tánke sajjahén omrá sawt bejanén o shádehi bekanén.
15 Haminchok róchá ke taw márá azáb dátag,
haminchok róchá márá shádmán kan,
haminchok sálá ke sakkián dochár butagén.
16 Tai kár tai hezmatkáráni démá paddar bátant o
tai mazani pa áyáni óbádagán.
17 May Hodáwandén Hodáay mehrabáni pa má sar bát,
may dastáni kárán barkat beday,
haw, may dastáni kárán barkat beday.