91
Hodáay bánzoláni chérá panáha bay
1 Hamá ke borzén arshay Hodáay panáhgáhá neshtag,
zórákay sáhegá áráma gipt.
2 Hodáwanday bárawá gwashán: “Hamá mani panáh o kalát ent,
mani Hodá, ke hamáiay sará tawkala kanán.”
3 Deljam án ke hamá tará cha shekáriáni dámá rakkénit,
cha koshókén wabáyán.
4 Á tará gón wati poth o bálán póshénit o
áiay bánzoláni chérá panáha bay,
áiay wapádári espar o diwálé.
5 Cha shapay bimmá natorsay,
na cha á tirá ke róchá srapit,
6 na cha wabáyá ke taháriá gardit,
na cha á hawpá ke némróchá béránia kárit.
7 Hazárán kas tai kerrá kapit,
dahán hazár tai rástén némagá,
bale é tabáhi tai nazziká átka nakanant.
8 Tahná gón wati chammáni shánk dayagá
badkáráni sezáyána genday.
9 Agan Hodáyá wati panáh bekanay,
borzén arshay Hodáyá wati menendjáh,
10 hech kazá tai sará sarzóra nabit o
hech baláh tai gedánay nazziká nayayt.
11 Tai bárawá préshtagán hokma kant
ke tai sajjahén ráhán, tai negahpániá bekanant.
12 Á tará wati dastáni delá dárant
tán tai pád dhókéá malaggit.
13 Shér o máráni sará garday,
rostagén shér o syahmáráni saragán pádmála kanay.
14 Hodáwanda gwashit: “Á ke maná dósta dárit
áiá nejáta dayán o
hamáiay posht o panáha bán ke mani námá zánt.
15 Á maná tawára kant o man passawia dayán,
sakkián áiay hamráha bán,
áiá nejáta dayán o ezzata bakshán.
16 Áiá cha drájén omré sérápa kanán o
Hodái nejátá áiá pésha dárán.”