3
Yohaana Hiinunqudimiisay caacaahhamisu haa kakaaru gosi
(Mataayo 3:1-12; Maariko 1:1-8; Yohaana 1:19-28)
1 Inkoo, yaati kori gu mibi haa kooani gu tawaaloo da mutemi Kaysaari Tiberiiyo. Qatlaykee Pontiyo Pilaatu yaa gafana gu hhapee da Yudaaya, haa mutemi Heroode Antipaasi naa tawaaliilina hhapee da Galilaaya. Kara, Filiipo hhia gosi Heroode naa tawaaliilina hhapee da Itureeya haa Tirakoniiti. Slime mutemi Lisaniiya yaati tawaaliilina hhapee da Abileene.
2 Anaasi haa Kayaafa naa hhapalooee da deni gu hhapee da Israeeli. Qatlaykeesii gimba gu Iliitleemu yaagi ilii khay Yohaana, nanku Sakariyaa yade kongoqomeege.
3 Ina gi hadakay daqeemoo sliimaa gu hhapee goõ, gwaa ilaciyaa waaree haa duudu gu Yoridaani, tay tosaa kakaana gimba gu hiinunqudimisu gu hiifookida tlakwaroogo daqa Iliitleemuge, ma ilamooyimi tlakwaroo dooina.
4 Hari amoo da Yohaana, Iliitleemu yaatii gaamaamisi gimbaki gu Isaaya tletimiisay, idoo giyaa ilii handikimi gooay kitaabuu gosii tuba,
“Afoo da didiri wanta da heedi kakaakanta kongoqomeege tuba,
‘Tafaꞌasa amoo sa Looimoo gu Goõ,
la tafaꞌasiday amamu kosi cuti!
5 Daqeemoo gu koomee hiihuuꞌuma, digi tipidiye,
kara omeeri haa tioo goõ, taataahhasakina.
Amamu gwaay qolongaaga⁄ee, digi tafaꞌamisiye,
slime amamu goõ gu koomee bondeeri, digi hacimisiye tipa.
6 Hida goõ daqeemoo sliimaa arinayi, ilabuꞌuruu gu Iliitleemu.’ ”
7 Inkoo, hida wa⁄a yaa khakhaakhayay daqa Yohaanage, magii nunqudimisi inay. Yohaana gi kaay sa inay tuba, “De, laqwaloti da deesasee pahha! Ha miyaa nangwaa ilii⁄oo⁄i, ma hii⁄ipidiri qupidaa gu Iliitleemu, gwaa khocee?
8 Inkoo, laqama ⁄aamu gu laqama hiifookida dooguna tlakwaroogo daqa Iliitleemuge. Kara, hhanti tlaatleesiday ilahudeemisu muunaiĩ kokunay tuba, ‘Taataa goori na Aburahaamu!’ Gu lou, sangu kaay Iliitleemu hiidahhasi hiitlaysa yaꞌay sa Aburahaamu daqa tle⁄eẽ hhankaa.
9 Inkoo see kiraara dagaã hheꞌesi, daganii qaasi kibeeri gu khaige! Khai sliimaa gooba boo⁄araa ⁄aamu gu hhou, digi tlaaqi haa digii kwakwahhi aslaage!”
10 Raqatira da hida gugi maasidi hari murumuꞌuumaa ina tuba, “Inkoo, hati malee laqana?”
11 Yohaana gigi ilaki⁄isi tuba, “Heedi gu kooma qayroo cada, leẽ gi hadisiye sa hikira guba qayru. Kara heedi gu kooma ⁄agoo wa⁄a, teesaaqay laqiye.”
12 Karaanimaiĩ goóyii kurunkurimee koodi slime yaagi khayri daqa Yohaanage, ma digii nunqudimisi. Inay gugi maasiri tuba, “Maarimuu, dandiray ti malee laqana?”
13 Ina gigi ilaki⁄isi inay tuba, “Hhanti hiioyimintayi daqa hidago peesay gwaay catu hikaꞌa dangwaa ilafahhi ha sirikariinii da Ruumi.”
14 Slime sirikaarii gugi maasiri ina tuba, “Hari dandiray ti malee laqana?”
Yohaana gigi ilaki⁄isi tuba, “Hhanti afii⁄utlida heedi lensee idadu kosi ma sitaakiikiru see hari afaꞌafuumaa! Kara buꞌudisa hari peesay dangoó buiye.”
15 Hida yaa konay iliipaꞌaru gu khawaraa da Kristu. Sa gimbakee, gonkoinaa hingaa tlaatleesiri ilahudeemisu muunaiĩ koinay tuba, angamalee Yohaana naa Kristu.
16 Yohaana gigi ilaki⁄isi inay tuba, “Gu lou, ana hanguri maꞌay kilesi hiinunqudimisa. Teesaaqay see, himaa khay heedi gu kooma ⁄uuru, koyi see ba⁄i, ana may condoa see haraay boo⁄iiba gweedaraa da dincaaraa da ye⁄eetoo kosi! Ina hiinunqudimisi unkuray hari Muuna gu Iliitleemu haa hari aslaa.
17 Ina hiĩ ooyi daba gosii kiyaaray gu heeleꞌemisu, hiĩ tlaatleesi ficinay biraa gosi, ma hiikurunkuri ganoo kuugiya dosii da didiri. Teesaaqay see, muuꞌu gumaa da⁄i hari aslaa doóba hhama!”
18 Nama teesaaqay leẽ, Yohaana yaa ilakoomi tlaatlaqamisu hida, maay fookidiri daqa Iliitleemuge, tay tosaa kakaana Gimba gu Hhou gu Iliitleemu sa inay.
19 Inkoo, Yohaana gi ilii⁄oo⁄i mutemi Heroode Antipaasi, sa gimba giyaa khabimi Heroodiiya, hadee da hhia gosi loi, haa sa tlakwaroo waka wa⁄a giyaa yondiidi.
20 Teesaaqay Heroode gii roogisi tlakwaroo waka daqa dosii, tay Yohaana gugi ilapingimi jeerage.
Yeesu hiinunqudisa dosi haa Yohaana
(Mataayo 3:13-17; Maariko 1:9-11)
21 Qatlay hida digaa ilii hheꞌesi hiinunqudimisu ha Yohaana, Yeesu see dugugii nunqudisi. Yeesu giyaa ilii firiirine Iliitleemu, raw yaati tlaaꞌadi.
22 Muuna gu Iliitleemu yaagii ⁄eeti rawgo daqa dosii, tlabiya pahha. Kara afoo yaagii ca⁄adi rawaa gu rawgo, kakanta tuba, “Ugu na Nankoy ga slae! Ugu hanoó muunaboo⁄eesida hari khisla!”
Yeesu motoliya dosi giyaa dahhiye
(Mataayo 1:1-17)
23 Yeesu qatlay giyaa ilii tlaatleesi yondu gosi, yaa koraraa mibeeri tami kona taqaaqay. Kara hida yaati ilahudeesiri tuba, ina yaati nanku Yoseefu, laqwaloo da Heeli.
24 Heeli, yaa nanku Mataati.
Mataati, yaa nanku Laawi.
Laawi, yaa nanku Meliiki.
Meliiki, yaa nanku Yanaay.
Yanaay, yaa nanku Yoseefu.
25 Yoseefu, yaa nanku Matatiiya.
Matatiiya, yaa nanku Aamoosi.
Aamoosi, yaa nanku Nahuumu.
Nahuumu, yaa nanku Esiili.
Esiili, yaa nanku Nagaay.
26 Nagaay, yaa nanku Maati.
Maati, yaa nanku Matatiiya.
Matatiiya, yaa nanku Semeyiini.
Semeyiini, yaa nanku Yoseeki.
Yoseeki, yaa nanku Yooda.
27 Yooda, yaa nanku Yohanaani.
Yohanaani, yaa nanku Reesa.
Reesa, yaa nanku Serubabeeli.
Serubabeeli ya nanku Seyalitiyeeli
Seyalitiyeeli, yaa nanku Neeri.
28 Neeri, yaa nanku Meliiki.
Meliiki, yaa nanku Aadi.
Aadi, yaa nanku Kosaamu.
Kosaamu, yaa nanku Elimadaamu.
Elimadaamu, yaa nanku Eeri.
29 Eeri, yaa nanku Yosuuwa.
Yosuuwa, yaa nanku Elieseeri.
Elieseeri, yaa nanku Yoriimu.
Yoriimu, yaa nanku Mataati.
Mataati, yaa nanku Laawi.
30 Laawi, yaa nanku Simi⁄ooni.
Simi⁄ooni, yaa nanku Yuuda.
Yuuda, yaa nanku Yoseefu.
Yoseefu, yaa nanku Yonaamu.
Yonaamu, yaa nanku Eliyakiimu.
Eliyakiimu, yaa nanku Meleeya.
31 Meleeya, yaa nanku Meena.
Meena, yaa nanku Mataata.
Mataata, yaa nanku Nataani.
Nataani, yaa nanku Dawdi.
32 Dawdi, yaa nanku Yeese.
Yeese, yaa nanku Obeedi.
Obeedi, yaa nanku Booaasi.
Booaasi, yaa nanku Salimooni.
Salimooni, yaa nanku Nakhasooni.
33 Nakhasooni, yaa nanku Aminadaabu.
Aminadaabu, yaa nanku Adimiini.
Adimiini, yaa nanku Arinii.
Arinii, yaa nanku Khesirooni.
Khesirooni, yaa nanku Pereesi.
Pereesi, yaa nanku Yuuda.
34 Yuuda, yaa nanku Yakoobo.
Yakoobo, yaa nanku Isaaka.
Isaaka, yaa nanku Aburahaamu.
Aburahaamu, yaa nanku Teera.
Teera, yaa nanku Nakhoori.
35 Nakhoori, yaa nanku Seruugi.
Seruugi, yaa nanku Reeu.
Reeu, yaa nanku Peleegi.
Peleegi, yaa nanku Ebeeri.
Ebeeri, yaa nanku Saala.
36 Saala, yaa nanku Kenaani.
Kenaani, yaa nanku Arifakisaadi.
Arifakisaadi, yaa nanku Seemu.
Seemu, yaa nanku Nuuhu.
Nuuhu, yaa nanku Lameeki.
37 Lameeki, yaa nanku Metuseela.
Metuseela, yaa nanku Enooki.
Enooki, yaa nanku Yareedi.
Yareedi, yaa nanku Mahalaleeli.
Mahalaleeli, yaa nanku Kenaani.
38 Kenaani, yaa nanku Enoosi.
Enoosi, yaa nanku Seeti.
Seeti, yaa nanku Adaamu.
Adaamu, yaa nanku Iliitleemu.