ལེའུ་བཅོ་ལྔ༌པ།
ཡེ་རུ་སཱ་ལེམ་གྱི་གྲོས༌ཚོགས།
1 དེ་ཡང་ཡ་ཧུ་དཱའི་ཡུལ་ནས་ཡོང་བའི་མི་ཁ་ཤས་ཀྱིས་སྤུན་ཟླ་རྣམས་ལ་ཁྱོད་རྣམས་ཀྱིས་མོ་ཤེའི་བཀའ་ཁྲིམས་བཞིན་དུ་མཚན་སྐྱི་མ་བཅད་ན་ཐར་པ་འཐོབ་མི་སྲིད་ཅེས་བསླབ་བྱ་བཏང་ངོ༌།།
2 ཕོལ་ལོལ་དང་པཱར་ན་པཱ་གཉིས་ཀ་དེ་རྣམས་དང་ཤིན་ཏུ་མ་མཐུན་པར་རྩོད་པ་བྱས་པ༌ལ། རྗེས་འབྲང་པ་རྣམས་ཀྱིས་ཕོལ་ལོལ་དང་པཱར་ན་པཱ་གཉིས་དང་རང་གི་ཆོས་ཚོགས་ཀྱི་མི་འགའ་ཞིག་རྩོད་གླེང་དེའི་དོན་སྐུ་ཚབ་པ་དང་རྒན་པོ་རྣམས་ལ་འདྲི་བའི༌ཕྱིར། ཡེ་རུ་སཱ་ལེམ་དུ་འགྲོ་རུ་འཇུག་རྒྱུ་ཐག་གིས༌བཅད་དོ།།
3 དེ་ནས་ཆོས་ཚོགས་ཀྱིས་མི་དེ་རྣམས་ལམ་དུ་བརྫངས་པ༌དང༌། དེ་རྣམས་ཕོའོ་ནེ་ཀེ་དང་སཱ་མར་ཡ་ཡུལ་གཉིས་བརྒྱུད་ནས་གང་སར་ཕྱིན་ཅིང་ཕྱི་ཕྱོགས་པ་རྣམས་སྐྱབས་མགོན་ཡེ་ཤུ་ལ་དད་པར་གྱུར་པའི་གནས་ཚུལ་བཤད་དེ་སྤུན་ཟླ་རྣམས་ཤིན་ཏུ་སྤྲོ་བར་བྱས།
4 དེ་ནས་ཁོང་རྣམས་ཡེ་རུ་སཱ་ལེམ་དུ་སླེབས་པ་དང་ཆོས་ཚོགས༌དང༌། སྐུ་ཚབ༌པ། རྒན་པོ་རྣམས་ཀྱིས་སྣེ་ལེན་བྱས༌ཤིང༌། ཁོང་རྣམས་ཀྱིས་ཀྱང་དཀོན་མཆོག་གིས་ཁོང་རྣམས་དང་ལྷན་དུ་མཛད་པའི་དོན་ཐམས་ཅད་བཤད་མོད།
5 འོན་ཀྱང་ཕ་རུ་ཤི་པའི་གྲུབ་མཐའ་ལ་གཏོགས་པའི་དད་ལྡན་འགའ་ཞིག་ཡར་ལངས་ཏེ་ན༌རེ། ངེས་པར་ཕྱི་ཕྱོགས་པ་རྣམས་ལ་མཚན་སྐྱི་གཅོད་དགོས་པ་དང་མོ་ཤེའི་བཀའ་ཁྲིམས་ལྟར་བསྲུང་དགོས་ཚུལ་བསྐུལ་འོས་ཞེས་སྨྲས༌སོ།།
6 དེ་ནས་སྐུ་ཚབ་པ་དང་རྒན་པོ་རྣམས་དོན་དེར་གྲོས་བྱེད་པའི་ཕྱིར་ལྷན་དུ་འདུས༌པ་རེད།
7 དེ་རྣམས་ཀྱིས་རྩོད་གླེང་བྱས་ནས་དུས་རིང་པོ་འགོར་བ༌ན། པེ་ཏྲོ་ཡར་ལངས་ཏེ་འདི་སྐད༌དུ། སྤུན་ཟླ༌རྣམ་པ། ཁྱོད་ཅག་གིས་ཤེས་གསལ༌ལྟར། དཀོན་མཆོག་གིས་ཕྱི་ཕྱོགས་པ་རྣམས་ལ་ངའི་ངག་ནས་འཕྲིན་བཟང་ཐོས་ཤིང་སྐྱབས་མགོན་ཡེ་ཤུ་ལ་དད་པ་བྱ༌ཆེད། ཁོང་གིས་སྔ་མོ་ནས་ཁྱོད་རྣམས་ཀྱི་ཁྲོད་ནས་ང་རང་བདམས༌པ་ཡིན་ནོ།།
8 ཡང་མི་སེམས་མཁྱེན་པའི་དཀོན་མཆོག་གིས་བདག་ཅག་ལ་དམ་པའི་ཐུགས་ཉིད་གནང་བ་བཞིན༌དུ། ཕྱི་ཕྱོགས་པ་རྣམས་ལའང་དམ་པའི་ཐུགས་ཉིད་གནང༌སྟེ། ཁོ་རྣམས་ལ་བདེན་དཔང་མཛད་དོ།།
9 ཡང་ཁོང་གིས་བདག་ཅག་དང་ཁོ་རྣམས་ཀྱི་བར་དུ་ཁྱད་པར་ཅི་ཡང་མ་ཕྱེས་པར། དད་པའི་སྒོ་ནས་ཕྱི་ཕྱོགས་པ་རྣམས་ཀྱི་སེམས་ཀྱང་འདག་པར་མཛད་དོ།།
10 ད་ལྟ་ཅིའི་ཕྱིར་བདག་ཅག་གི་ཕ་མེས་ཡང་མེས་དང་བདག་ཅག་གིས་ཀྱང་འཁུར་དཀའ་བའི་གཉའ་ཤིང་དེ་རྗེས་འབྲང་པ་རྣམས་ཀྱི་གཉའ་ལ་བཀལ་ནས་དཀོན་མཆོག་ལ་ཚོད་བགམ་མམ།
11 བདག་ཅག་ཀྱང་ཕྱི་ཕྱོགས་པ་དང་འདྲ་བར་གཙོ་བོ་ཡེ་ཤུའི་ཐུགས་རྗེའི་སྒོ་ནས་ཐར་པ་ཐོབ་པ་ལ་ཡིད་ཆེས་པ་ཡིན་ཞེས་གསུངས་སོ།།
12 དེ་ནས་མི་རྣམས་ཀྱིས་ཅི་ཡང་མི་སྨྲ་བར། པཱར་ན་པཱ་དང་ཕོལ་ལོལ་གཉིས་ཀྱིས་གསུངས་པའི་གཏམ༌སྟེ། དེ་སྔར་དཀོན་མཆོག་གིས་ཁོང་གཉིས་བརྒྱུད་ནས་ཕྱི་ཕྱོགས་པའི་ཁྲོད་དུ་མཛད་པའི་གྲུབ་རྟགས་དང་ངོ་མཚར་བའི་དོན་ཐམས་ཅད་ལ་མཉན༌ཏོ།།
13 དེ་ནས་ཁོང་གཉིས་ཀྱིས་དེ་ལྟར་གསུངས་རྗེས་ཡ་ཀོབ་ཀྱིས་འདི་སྐད༌དུ། སྤུན་ཟླ་རྣམས་ཀྱིས་བདག་ལ་ཉོན༌ཅིག
14 དཀོན་མཆོག་གིས་ཐོག་མར་ཇི་ལྟར་ཕྱི་ཕྱོགས་པ་རྣམས་ལ་ཐུགས་རྗེས་གཟིགས༌ཤིང༌། དེ་རྣམས་ལས་མི་རྣམས་རང་ཉིད་ཀྱི་མཚན་གྱི་འོག་ཏུ་ཇི་ལྟར་དྲངས་པའི་སྐོར་སི་མོན་གྱིས་གསུངས༌ཤིང་།
15 དེ་ནི་ལུང་སྟོན་པ་རྣམས་ཀྱི་ལུང་བསྟན་དང་མཐུན༌ཏེ།
16 གསུང་རབ་ཀྱི་མདོ་ལས་ཇི་སྐད༌དུ།
དེ་ཡང་རྗེས་སུ་ང་རང་ཕྱིར་ལོག༌སྟེ།།
དཱ་བིད་གུར་མཆོག་བརྡིབས་པ་བསྐྱར་བཟོ༌བྱེད།།
གཏོར་ཅིང་བརླག་པའི་གུར་མཆོག་རྗེས་ཤུལ༌དེ།།
ང་ཡིས་སླར་ཡང་བཟོ་ཞིང་བསྐྲུན་པར༌བྱེད།།
17 དེ་ནི་མིའི་རིགས་གཞན་རྣམས་ཐམས་ཅད༌དེ།།
ངའི་མིང་ཐོགས་པའི་ཕྱི་ཕྱོགས་མི་ཀུན༌གྱིས།།
གཙོ་བོ་ཁོང་ཉིད་འཚོལ་བའི་ཕྱིར༌ཡིན་ནོ།།
18 མངོན་མཛད་འདི་དག་གདོད་ནས་གཙོ་བོས་གསུངས།།
ཞེས་བཀོད་པའོ།།
19 དེའི༌ཕྱིར། བདག་གི་བསམ་ཚུལ་ནི། བདག་ཅག་གིས་དཀོན་མཆོག་གི་ཕྱོགས་སུ་འཁོར་བཞིན་ཡོད་པའི་ཕྱི་ཕྱོགས་པ་རྣམས་ལ་འོ་བརྒྱལ་མི་བཟོ༌བར།
20 ཁོ་རྣམས་ལ་ལྷ་སྐུ་དང་འབྲེལ་བའི་མི་གཙང་བ་དང༌། མི་ཚངས་སྤྱོད་པ། མིད་པ་བསྒགས་ནས་བསད་པའི་ཕྱུགས་ཟོག་གི་ཤ་དང་ཁྲག་བཅས་སྤང་དགོས་པའི་འཕྲིན་ཡིག་འབྲི་འོས༌ཏེ།
21 རྒྱུ་མཚན་ནི་མོ་ཤེའི་མདོ་རྣམས་ནི་སྔ་མོ་ནས་མི་རྣམས་ཀྱིས་གྲོང་ཁྱེར་སོ་སོ་ནས་བསྒྲགས༌ཏེ། ངལ་གསོ་བའི་ཉིན་མོ་རེ་རེར་ཆོས་ཁང་ནས་ཀློག་འདོན་བྱེད་པའི་ཕྱིར་ཡིན་ཞེས་གསུངས༌སོ།།
གྲོས་ཚོགས་ཀྱིས་ཕྱི་ཕྱོགས་ཀྱི་དད་ལྡན་རྣམས་ལ་སྤྲིངས་པའི་འཕྲིན་ཡིག
22 དུས་དེར་སྐུ་ཚབ་པ་དང་རྒན༌པོ། ཆོས་ཚོགས་ཡོངས་བཅས་ཀྱིས་རང་གི་ཚོགས་པ་ལས་དད་ལྡན་བདམས༌ཏེ། ཕོལ་ལོལ་དང་པཱར་ན་པཱ་གཉིས་དང་མཉམ༌དུ། སིར་ཡཱ་ཡུལ་གྱི་ཨན་ཏི་ཡོག་ཡཱ་རུ་མངག་རྒྱུ་ཐག་གིས་བཅད་དོ།། ཁོ་རྣམས་ཀྱིས་བདམས་པའི་མི་ནི་སྤུན་ཟླ་རྣམས་ཀྱི་ཁྲོད་ནས་དཔོན་རིགས་སུ་གྱུར་པའི་པཱར་ས་པཱ་ཞེས་ཀྱང་འབོད་པའི་ཡུ་དཱ་དང་སི་ལཱའོ།།
23 ཁོ་གཉིས་ལ་སྤྲད་པའི་འཕྲིན་ཡིག་གི་ནང་དུ་འདི་ལྟར་བྲིས་ཡོད༌དེ།
༄༅། །ཨན་ཏི་ཡོག་ཡཱ༌དང༌། སིར་ཡཱ༌ཡུལ། ཀི་ལིག་ཡཱ་ཡུལ་བཅས་སུ་གནས་པའི་ཕྱི་ཕྱོགས་ཀྱི་སྤུན་ཟླ་རྣམས༌ཀྱེ།
ཐོག་མར་ཁྱོད་རྣམས་ལ་འཚམས་འདྲི་ཞུ་ཞེས་ཁྱོད་ཅག་གི་སྤུན་ཟླ་སྟེ་སྐུ་ཚབ་པ་དང་རྒན་པོ་བཅས་ནས་བསྐུར༌དོན།
24 དེ་ཡང་ངེད་རྣམས་ཀྱིས་གོ་ཐོས་ལྟར༌ན། ངེད་ཅག་གི་ཆོས་ཚོགས་འདི་ནས་སོང་བའི་མི་ཁ་ཤས་ཀྱིས་ཁྱོད་རྣམས་ལ་ངེས་པར་མཚན་སྐྱི་གཅོད་དགོས་པ༌དང༌། མོ་ཤེའི་བཀའ་ཁྲིམས་བསྲུང་དགོས་ཞེས་པའི་གཏམ་བརྗོད་དེ་ཁྱོད་རྣམས་ཀྱི་སེམས་ཤིན་ཏུ་དཀྲུགས་འདུག་ཟེར། འོན༌ཀྱང༌། ངེད་ཅག་གིས་དེ་ལྟར་མ་མངགས་སོ།།
25 དེ་བས་ངེད་ཅག་གིས་བློ་སེམས་གཅིག་མཐུན་སྒོས་དད་ལྡན་པ་འགའ་ཤས་བདམས་ཤིང༌། བདག་ཅག་གིས་སྙིང་ནས་བརྩེ་བའི་པཱར་ན་པཱ་དང་ཕོལ་ལོལ་གཉིས་དང་མཉམ་དུ་ཁྱོད་རྣམས་ཀྱི་དྲུང་དུ་མངག་རྒྱུ་ཐག་གིས་བཅད་དོ།།
26 ཁོ་གཉིས་ཀྱིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཆེད་དུ་རང་སྲོག་ལའང་མ་འཛེམས་པ་ཡིན།
27 དེའི༌ཕྱིར། ངེད་ཅག་གིས་ཡུ་དཱ་དང་སི་ལཱ་གཉིས་མངགས༌ཤིང༌། ཁོ་གཉིས་ཀྱིས་དངོས་སུ་དོན་འདི་དག་ཁྱོད་རྣམས་ལ་སྨྲ་བར་འགྱུར།
28 རྒྱུ་མཚན་ནི་ངེད་ཅག་གི་སེམས་ནི་དམ་པའི་ཐུགས་ཉིད་དང་མཐུན་པར་དོན་གལ་ཆེན་འདི་རྣམས་ལས༌གཞན། ཁུར་བོ་ལྷག་མ་ཞིག་ཁྱོད་ཅག་གི་ཕྲག་ལ་མི་དགལ་བར་ཐག་གིས་བཅད༌ཅིང༌།
29 དེ་ནི་ལྷ་སྐུའི་མདུན་དུ་ཕུལ་བའི་མཆོད་རྫས་དང༌། ཁྲག དེ་མིན་མིད་པ་བསྒགས་ནས་བསད་པའི་ཕྱུགས་ཟོག་གི༌ཤ་དང༌མི་ཚངས་སྤྱོད་པ་བཅས་སྤང་དགོས། གལ༌ཏེ། ཁྱོད་རྣམས་ཀྱིས་ལས་དེ་དག་སྤངས་ནས་དོན་དེ་དང་མི་འགལ་བར་བྱེད་པ་ཡིན་ན་ལེགས། མཇུག་མཐར་ཁྱོད་རྣམས་བདེ་བར༌སྨོན། ཞེས༌པའོ།།
30 དེ་ནས་མངག་བཅོལ་ལྟར་ཁོང་རྣམས་སིར་ཡཱ་ཡུལ་གྱི་ཨན་ཏི་ཡོག་ཡཱ་རུ་ཕྱིན་ཏེ་དད་ལྡན་རྣམས་བསྡུས་ཤིང་འཕྲིན་ཡིག་སྤྲད་པ༌དང༌།
31 དེ་རྣམས་ཀྱིས་ཀྱང་འཕྲིན་ཡིག་བཀླགས་པ་དང་སེམས་གསོའི་གཏམ་གྱིས་ཡིད་དགའ་བར་གྱུར་ཏོ།།
32 ཡུ་དཱ་དང་སི་ལཱ་གཉིས་ནི་ལུང་སྟོན་པ་ཡང་ཡིན༌པས། གཏམ་མང་པོ་སྨྲས་ཏེ་སྤུན་ཟླ་རྣམས་ལ་སྐུལ་མ་མཛད་ཅིང་དད་པ་བརྟན་པོར་བྱས་སོ།།
33 དེ་ནས་གནས་དེར་ཉིན་ཞག་དུ་མར་བཞུགས༌རྗེས། སྤུན་ཟླ་རྣམས་ཀྱིས་ཁོང་གཉིས་ཕྱིར་མངགས་མཁན་རྣམས་ཀྱི་དྲུང་དུ་བདེ་བར་ལོག་ཏུ་བཅུག
34 འོན་ཀྱང་སི་ལཱ་ཡིས་ད་དུང་གནས་འདིར་སྡོད་པའི་སེམས་ཐག་བཅད༌དོ།།
35 ཕོལ་ལོལ་དང་པཱར་ན་པཱ་གཉིས་སྔར་བཞིན་ཨན་ཏི་ཡོག་ཡཱ་རུ་བཞུགས༌ཤིང༌། ཆོས་གྲོགས་གཞན་མང་པོ་དང་ལྷན་དུ་མི་རྣམས་ལ་གཙོ་བོའི་བཀའ་གསུངས་པ་དང་ཆོས་བསྒྲགས༌སོ།།
ཕོལ་ལོལ་ཐེངས་གཉིས་པར་ཆོས་སྤེལ་དུ་ཕྱིན་པ།
36 དེ་ནས་ཉིན་འགའ་འགོར༌རྗེས། ཕོལ་ལོལ་གྱིས་པཱར་ན་པཱ་ལ་འདི་སྐད༌དུ། འུ་གཉིས་གཙོ་བོའི་བཀའ་བསྒྲགས་མྱོང་སའི་གྲོང་ཁྱེར་སོ་སོའི་སྤུན་ཟླ་རྣམས་ཀྱི་གནས་ཚུལ་ཅི་འདྲ་ཡིན་པར་ཡང་བསྐྱར་བལྟ་རུ་འགྲོའོ་ཞེས་སྨྲས་པ༌ལ།
37 པཱར་ན་པཱ་ཡིས་མཱར་ཀུ་ཞེས་ཀྱང་འབོད་པའི་ཡོ་ཧ་ནན་འཁྲིད་འདོད༌པ་རེད།
38 འོན༌ཀྱང༌། ཕོལ་ལོལ་གྱི་སེམས་ལ་མཱར་ཀུ་ནི་སྔོན་ཆད་ཕཱམ་ཕིལ་ཡ་ཡུལ་ནས་ཁོང་གཉིས་དང་མཉམ༌དུ་ཆོས་དོན་བསྒྲུབ་ཏུ་མ་སོང་བར་ཁ་བྲལ་བའི་རྐྱེན་གྱིས་ད་ལྟ་ཁོ་རང་ཁྲིད་ན་མི་འོས་སྙམ་མོ།།
39 དེ་ནས་ཁོང་གཉིས་དོན་དེར་སེམས་མ་མཐུན་པར་རྩོད་གླེང་དྲག་པོ་བྱུང་བ་དང་ཐ་ན་སོ་སོར་གྱེས་པ་རེད། དེ་ནས་པཱར་ན་པཱ་ཡིས་མཱར་ཀུ་ཁྲིད་དེ་གྲུ་གཟིངས་ལ་བསྡད་ནས་ཀིབ་རིས་ལ་ཕྱིན་པ༌དང༌།
40 ཕོལ་ལོལ་གྱིས་ཀྱང་སི་ལཱ་བདམས་ཤིང་སྤུན་ཟླ་རྣམས་ཀྱིས་ཁོང་ཉིད་གཙོ་བོའི་ཐུགས་རྗེ་ལ་བཅོལ༌རྗེས། ཁོང་གཉིས་ལམ་ལ་ཆས༌ཏེ།
41 སིར་ཡཱ་ཡུལ་དང་ཀི་ལིག་ཡཱ་ཡུལ་བརྒྱུད་ནས་ཆོས་ཚོགས་རྣམས་ཀྱི་དད་པ་བརྟན་པོར་བྱས༌སོ།།