ལེའུ་བཅུ་དྲུག༌པ།
ཐི་མོ་ཐེ་བྱ་བ་ཕོལ་ལོལ་དང་སི་ལཱ་གཉིས་ལ་འགྲོགས༌པ།
1 ཕྱིས་སུ་ཕོལ་ལོལ་ནི་དིར་སྦེ་དང་དེ་ནས་ལིས་ཏྲ་རུ་ཕེབས་པ༌ལ། གནས་དེར་ཐི་མོ་ཐེ་ཟེར་བའི་རྗེས་འབྲང་པ་ཞིག་ཡོད་ཅིང་། ཁོ་ནི་སྐྱབས་མགོན་ཡེ་ཤུར་དད་པ་ཡོད་པའི་ཡ་ཧུ་དཱ་པའི་བུད་མེད་ཅིག་གི་བུ་ཡིན་ཡང་ཁོའི་ཕ་ནི་གྷི་རིག་པ་ཡིན།
2 ལིས་ཏྲ་དང་ཨི་ཀོན་ཡུ་རུ་ཡོད་པའི་སྤུན་ཟླ་རྣམས་ཀྱིས་ཐི་མོ་ཐེ་ལ་བསྟོད་པ་བྱས་པ་རེད།
3 ཕོལ་ལོལ་གྱིས་ཐི་མོ་ཐེ་ཡང་འཁྲིད་འདོད་ཀྱང་ཡུལ་དེའི་ཡ་ཧུ་དཱ་པ་རྣམས་ཀྱིས་ཁོའི་ཕ་ནི་གྷི་རིག་པ་ཡིན་པ་ཤེས་པས། ཕོལ་ལོལ་གྱིས་ཁོའི་མཚན་སྐྱི་བཅད་དོ།།
4 དེ་ནས་ཁོང་རྣམས་གྲོང་ཁྱེར་སོ་སོ་བརྒྱུད་ནས་ཡེ་རུ་སཱ་ལེམ་གྱི་སྐུ་ཚབ་པ་དང་རྒན་པོ་རྣམས་ཀྱིས་གཏན་ལ་ཕབ་པའི་ཁྲིམས་སྲོལ་དད་ལྡན་རྣམས་ལ་སྤྲད་ནས་བསྲུང་དུ་བཅུག༌པས།
5 ཆོས་ཚོགས་རྣམས་ཀྱི་དད་སེམས་དེ་བས་ཇེ་བརྟན་དུ་གྱུར་ཅིང་མི་གྲངས་ཀྱང་ཉིན་རེ་བཞིན་ཇེ་མང་དུ་འཕེལ་ཏོ།།
ཕོལ་ལོལ་གྱིས་མ་ཀེ་དོན་ཡཱ་ཡུལ་ནས་མཐོང་བའི་ཞལ་གཟིགས།
6 དེ་ཡང་དམ་པའི་ཐུགས་ཉིད་ཀྱིས་ཁོང་རྣམས་ལ་ཨེ་ཞི་ཡཱ་ཡུལ་ནས་དཀོན་མཆོག་གི་བཀའ་བསྒྲག་མི་རུང་བར་མཛད༌པས། ཁོང་རྣམས་ཕུ་ཀེ་ཡཱ་དང་ག་ལད་ཡཱ་ཡུལ་གཉིས་ཀྱི་ས་ཕྱོགས་བརྒྱུད༌ནས།
7 མོ་སི་ཡཱ་ཡུལ་གྱི་ས་མཚམས་སུ་སླེབས་ཏེ་པི་ཐིན་ཡཱ་ཡུལ་དུ་འགྲོ་འདོད༌ནའང༌། སྐྱབས་མགོན་ཡེ་ཤུའི་ཐུགས་ཉིད་ ཀྱིས་འགྲོ་རུ་མ་བཅུག་གོ།
8 དེ་ནས་ཁོང་རྣམས་མོ་སི་ཡཱ་ཡུལ་བརྒྱུད་ནས་ཏྲོ་ཡཱ་ཞེས་པར་ཕྱིན་པ་རེད།
9 གནས་དེར་ཞག་སྡོད་བྱེད་པའི༌ཚེ། ཕོལ་ལོལ་ལ་ཞལ་གཟིགས་གནང་བ༌སྟེ། མ་ཀེ་དོན་ཡཱ་ཡུལ་གྱི་མི་ཞིག་ལངས་ནས་བསྡད་དེ་འདི་ལྟར། ཁྱེད་རང་མ་ཀེ་དོན་ཡཱ་ཡུལ་དུ་ཕེབས་ནས་ངེད་ཅག་ལ་རོགས་རམ་བྱེད་པར་མཛོད་ཅེས་ཞུ་བ་ཞུས།
10 ཁོང་གིས་ཞལ་གཟིགས་དེ་མཐོང་བ༌དང༌། ངེད་ཅག་ མྱུར་དུ་མ་ཀེ་དོན་ཡཱ་ཡུལ་དུ་འགྲོ་བར༌བརྩམས། རྒྱུ་མཚན་ནི་དཀོན་མཆོག་གིས་ངེད་རྣམས་ཡུལ་དེའི་མི་རྣམས་ལ་འཕྲིན་བཟང་བསྒྲག་པར་བཀའ་གནང་བ་ངེད་ཅག་གིས་ཐག་གིས་ཆོད་པས༌སོ།།
ལིད་ཡཱ་ཞེས་པའི་བུད་མེད་ཅིག་དད་པར་གྱུར༌པ།
11 དེ་ནས་ངེད་ཅག་ཏྲོ་ཡཱ་ནས་གྲུ་གཟིངས་ལ་བསྡད་དེ་ཐད་ཀར་སཱ་མོ་ཏྲེ་ཀེ་རུ་སླེབས་པ༌དང༌། དེའི་ཕྱི༌ཉིན། ནེ་ཨ་པོ་ལི་རུ་སླེབས་པ་ཡིན།
12 དེ་ནས་ཕི་ལིབ་པི་རུ་སོང་བ་དང་དེ་ནི་མ་ཀེ་དོན་ཡཱ་ཡུལ་གྱི་གྲོང་ཁྱེར་ཆེན་པོ་ཞིག༌སྟེ། རོ་མཱ་གོང་མའི་རྒྱལ་ཁོངས་ཀྱི་གྲོང་ཁྱེར་ཡིན། ངེད་ཅག་གྲོང་ཁྱེར་དེ་རུ་ཉིན་འགར་བསྡད༌པ་ཡིན།
13 དེ་ཡང་ངལ་གསོ་བའི་ཉིན་ལ་ངེད་རྣམས་གྲོང་ཁྱེར་གྱི་མཁར་སྒོའི་ཕྱི་རོལ་ཏུ་ཕྱིན༌ཅིང༌། ཆུ་འགྲམ་དུ་གསོལ་བ་འདེབས་ས་ཞིག་ཡོད་པར་བསམས༌ཏེ། གནས་དེར་སོང་ནས་བསྡད་པ༌དང༌། དེར་འཛོམས་པའི་བུད་མེད་རྣམས་ལ་བཀའ་གསུངས་སོ།།
14 ཡང་གནས་དེར་རས་རྒྱ་སྨུག་ཚོང་མཁན་མིང་ལ་ལིད་ཡཱ་ཞེས་པའི་བུད་མེད་ཅིག་ཡོད༌ལ། ཁོ་མོ་ནི་ཐི་ཨ་ཏེ་རཱ་གྲོང་ཁྱེར་གྱི་མི་ཡིན་པ་དང་དཀོན་མཆོག་ལ་བསྙེན་བཀུར་བྱེད་མཁན་ཞིག་ཀྱང༌ཡིན། ཁོ་མོས་ངེད་ཅག་གི་གཏམ་ཐོས་ཤིང་དཀོན་མཆོག་གིས་ཁོ་མོའི་བློ་སྒོ་ཕྱེས་པ་དང་ཁོ་མོས་ཀྱང་སེམས་གཏད་ནས་ཕོལ་ལོལ་གྱི་གསུང་ལ་མཉན་ཏོ།།
15 དེ་ནས་ཁོ་མོ་དང་ཁོ་མོའི་ཁྱིམ་མི་རྣམས་ཁྲུས་གསོལ་ལ་ཞུགས་རྗེས་ཁོ་མོ་ན༌རེ། གལ་ཏེ་ཁྱེད་རྣམས་ཀྱིས་ང་རང་གཙོ་བོ་ལ་དད་པ་ཡོད་པ་བདེན་པར་དགོངས༌ན། ངའི་ཁྱིམ་དུ་ཕེབས་ཏེ་བཞུགས་པར་མཛོད་ཅེས་ཞུས་ཤིང་ངེད་ཅག་ནན་གྱིས་བཀག་པའོ།།
ཕོལ་ལོལ་དང་སི་ལཱ་གཉིས་བཙོན་དུ་བཅུག་པ།
16 དེའི་རྗེས༌སུ། ངེད་ཅག་གསོལ་བ་འདེབས་པའི་གནས་དེར་འགྲོ༌སྐབས། མངོན་ཤེས་ཀྱི་གདོན་འདྲེས་བཟུང་བའི་གཡོག་མོ་ཞིག་ངེད་ཅག་གི་མདུན་སར་སླེབས་ཤིང་། ཁོ་མོས་མོ་འདེབས་པ་ལ་བརྟེན་ནས་རང་གི་བདག་པོ་རྣམས་ལ་རྒྱུ་ནོར་མང་པོ་ཐོབ་པར་བྱས་མྱོང་།
17 ཁོ་མོ་ཕོལ་ལོལ་དང་ངེད་ཅག་གི་རྗེས་སུ་འབྲངས་ནས་སྐད་ཆེན༌པོས། མི་འདི་རྣམས་ནི་བླ་ན་མེད་པའི་དཀོན་མཆོག་གི་ཞབས་ཕྱི་པ་ཡིན༌ཏེ། ཁོང་རྣམས་ཀྱིས་ཁྱོད་ཅག་ལ་ཐར་པའི་ལམ་གསུང་བཞིན་ཡོད་ཅེས་ཡང་ཡང་སྨྲས་པ༌དང༌།
18 ཁོ་མོས་དེ་ལྟར་ཉིན་མང་པོར་འུར་བརྒྱབ་པས་ཕོལ་ལོལ་སུན་སྣང་ཆེན་པོ་སྐྱེས༌ཏེ། ཁ་ཕྱིར་འཁོར་ནས་གདོན་འདྲེ་དེ་ལ་འདི་ལྟར། ངས་ཡེ་ཤུ་མཱ་ཤི་ཀའི་མཚན་ལ་བརྟེན་ནས་ཁྱོད་རང་ཁོ་མོ་ལས་ཕྱིར་བུད་ཅིག་ཅེས་བཀའ་བསྒྲགས་པ་ཡིན་ཞེས་གསུངས་མ་ཐག་གདོན་འདྲེ་དེ་ཁོ་མོ་ལས་ཕྱིར་ཐོན་ནོ།།
19 དེ་ནས་གཡོག་མོ་དེའི་བདག་པོ་རྣམས་ཀྱིས་རྒྱུ་ནོར་འཐོབ་པའི་རེ་བ་མེད་པར་གྱུར་པ་མཐོང༌ནས། ཕོལ་ལོལ་དང་སི་ལཱ་གཉིས་བཟུང་སྟེ། གྲོང་ཁྱེར་གྱི་ཁྲོམ་རའི་ནང་དུ་ཡོད་པའི་འགོ་དཔོན་དག་གི་མདུན་དུ་བཙན་ཁྲིད་བྱས་པ་དང་།
20 ཡང་ཁྲིམས་དཔོན་རྣམས་གྱི་མདུན་དུ་ཁྲིད་ནས་ན་རེ། མི་འདི་གཉིས་ནི་ཡ་ཧུ་དཱ་པ་ཡིན་ཞིང་རང་རེའི་གྲོང་ཁྱེར་ནང་དུ་ཟིང་ཆ་བསླངས༌ཏེ།
21 བདག་ཅག་རོ་མཱ་པ་རྣམས་ཀྱིས་ཁྲིམས༌ལྟར་ན་དང་དུ་ལེན་མི་རུང་བའམ་བསྲུང་མི་རུང་བའི་གོམས་སྲོལ་རྣམས་བསྒྲགས་པ་ཡིན་ཞེས་སྨྲས་པ༌ལ།
22 མི་ཚོགས་ཀྱིས་ཀྱང་ལྷན་དུ་ཁོང་གཉིས་ལ་རྒོལ་ཅིང་དགག་པ༌དང༌། ཁྲིམས་དཔོན་དེ་དག་གིས་ཁོང་གཉིས་ཀྱི་ཕྱི་གོས་བཤུས་ཏེ་དབྱུག་པས་རྡེག་པའི་བཀའ་བསྒོས་སོ།།
23 དེ་ནས་ཁོང་གཉིས་ལ་དབྱུག་པས་མང་དུ་བརྡེགས་པ་དང་བཙོན་དུ་བཅུག་ཅིང་བཙོན་སྲུང་དམག་ལ་དམ་པོར་བསྲུང་དགོས་པར་གདམས།
24 བཙོན་སྲུང་དམག་གིས་ཀྱང་བཀའ་ལྟར་ཁོང་གཉིས་བཙོན་ཁང་གི་ཕུགས་སུ་བཅུག་པ་དང་ཨན་གཏད་བརྒྱབ་ནས་བཞག༌གོ།
25 དེ་ནས་ནམ་ཕྱེད་ཙམ་ལ་ཕོལ་ལོལ་དང་སི་ལཱ་གཉིས་ཀྱིས་དཀོན་མཆོག་ལ་གསོལ་བ་བཏབ་པ་དང་བསྟོད་དབྱངས་ཕུལ་བ༌ན། བཙོན་པ་གཞན་རྣམས་ཀྱིས་ཀྱང་རྣ་བ་བླགས་ཏེ་ཉན།
26 གློ་བུར༌ཉིད་དུ་ས་འགུལ་དྲག་པོ་ཞིག་བྱུང་སྟེ་བཙོན་ཁང་གི་རྨང་གཞི་ཡང་ཤིན་ཏུ་གཡོས༌ཤིང༌། བཙོན་ཁང་གི་སྒོ་ཚང་མའང་དེ་མ་ཐག་ཕྱེས་ནས་བཙོན་པ་ཡོངས་ཀྱི་ལྕགས་ཐག་ཀྱང་ལྷོད་པར་གྱུར་ཏོ།།
27 དེ་ནས་བཙོན་སྲུང་དམག་གཉིད་ལས་སད་དེ་བཙོན་ཁང་གི་སྒོ་ཐམས་ཅད་ཕྱེས་ཡོད་པ་མཐོང༌ནས། བཙོན་པ་ཐམས་ཅད་བྲོས་སོ་སྙམ་སྟེ་རལ་གྲི་ཕྱུང་ནས་རང་སྲོག་གཅོད་པར་རྩོམ་པ༌ལ།
28 ཕོལ་ལོལ་གྱིས་སྐད་ཆེན་པོས་འདི་སྐད༌དུ། རང་ལ་གནོད་པ་མ༌བྱེད་ཅིག ངེད་ཅག་ཐམས་ཅད་འདི་རུ་ཡོད་ཅེས་བོས༌པ་རེད།
29 དེ་ནས་བཙོན་སྲུང་དམག་གིས་མི་གཞན་ལ་སྒྲོན་མེ་འཁྱེར་ཡོང་བར་བསྐུལ༌ཏེ། མྱུར་དུ་བཙོན་ཁང་ནང་དུ་སོང་ནས་སྐྲག་བཞིན་འདར་བཞིན་ཕོལ་ལོལ་དང་སི་ལཱ་གཉིས་ཀྱི་དྲུང་དུ་པུས་མོ་སར་བཙུགས༌ཤིང༌།
30 ཡང་ཁོང་གཉིས་བཙོན་ཁང་གི་ཕྱི་རོལ་ཏུ་ཁྲིད་དེ་ན༌རེ། ཇོ་བོ༌ལགས། བདག་ལ་ཐར་པ་འཐོབ་ཆེད་ངས་ཅི་ཞིག་བྱ་འོས་སམ་ཞེས་ཞུས་པ༌ལ།
31 ཁོང་གཉིས་ཀྱིས་འདི་སྐད༌དུ། གཙོ་བོ་ཡེ་ཤུ་ལ་དད་པ་བྱོས༌དང༌། ཁྱོད་དང་ཁྱིམ་མི་ཐམས་ཅད་ལ་ཐར་པ་འཐོབ་ངེས་ཡིན་ཞེས་གསུངས་པ༌དང༌།
32 ཁོང་གཉིས་ཀྱིས་གཙོ་བོའི་བཀའ་དེ་བཙོན་སྲུང་དམག་དང་ཁོའི་ཁྱིམ་མི་ཐམས་ཅད་ལ་གསུངས་སོ།།
33 ཉིན་དེའི་མཚན་མོར། བཙོན་སྲུང་དམག་དེས་ཕོལ་ལོལ་དང་སི་ལཱ་གཉིས་ཕྱིར་ཁྲིད་དེ་ལུས་སྟེང་གི་རྨ་ཁ་བཀྲུས༌ཤིང་། བཙོན་སྲུང་དམག་དང་ཁོའི་ཁྱིམ་མི་ཐམས་ཅད་ལའང་དེ་མ་ཐག་ཁྲུས་གསོལ་ཐོབ་པ་རེད།
34 དེ་ནས་བཙོན་སྲུང་དམག་གིས་ཁོང་གཉིས་རང་ཁྱིམ་དུ་ཁྲིད་དེ་ཞལ་ཟས་དྲངས་པ༌དང༌། ཁོ་དང་ཁོའི་ཁྱིམ་མི་ཐམས་ཅད་དཀོན་མཆོག་ལ་དད་པར་གྱུར་པས་ཀུན་པོ་ཤིན་ཏུ་དགའ་བར་གྱུར༌ཏོ།།
35 དེ་ཡང་ཕྱི་ཉིན་ནམ་ལངས་པ་དང་ཁྲིམས་དཔོན་དག་གིས་རང་རང་གི་ཁྲིམས་གཡོག་མངགས༌ཏེ། མི་དེ་གཉིས་བཙོན་ལས་ཐོངས་ཤིག་ཅེས་བཀའ་གནང་བ༌དང༌།
36 བཙོན་སྲུང་དམག་གིས་ཀྱང་གཏམ་དེ་ཕོལ་ལོལ་ལ་འདི་ལྟར་སྨྲས༌པ། ཁྲིམས་དཔོན་དག་གིས་མི་མངགས་ཡོང་སྟེ་ཁྱེད་གཉིས་བཙོན་ལས་གཏོང་བའི་བཀའ་གནང༌བྱུང་། ད་ལྟ་ཉིད་དུ་བཙོན་ཁང་ནས་ཕྱིར་བུད་དེ་བདེ་བར་ཕེབས་རོགས་ཞེས་ཞུས་སོ།།
37 འོན་ཀྱང་ཕོལ་ལོལ་གྱིས་འདི་ལྟར༌གསུངས་པ་སྟེ། ངེད་གཉིས་ནི་རོ་མཱ་པ་ཡིན༌ཡང༌། ཁྲིམས་དཔོན་དེ་དག་གིས་ངེད་གཉིས་ལ་ཉེས་སྐྱོན་མེད་པར་མི་གཞན་རྣམས་ཀྱི་མིག་མདུན་ནས་གཅར་རྡུང་བཏང་སྟེ་བཙོན་དུ༌བཅུག ད་ལྟ་གསང་བའི་ངང་ནས་ངེད་གཉིས་ཕྱི་རུ་འདོན༌ནམ། དེ་ལྟར་གཏན་ནས་བྱ་མི་ཆོག༌སྟེ། ཁོ་རྣམས་རང་ཉིད་ཡོང་ནས་ངེད་གཉིས་བཙོན་ཁང་ལས་ཕྱིར་འཁྲིད་དགོས་ཞེས་པ༌དང༌།
38 ཁྲིམས་གཡོག་དེ་དག་གིས་ཀྱང་གསུང་དེ་ཁྲིམས་དཔོན་རྣམས་ལ་ཞུས༌ཤིང༌། དེ་རྣམས་ཀྱིས་ཀྱང་ཁོང་གཉིས་ནི་རོ་མཱ་པ་ཡིན་པ་ཐོས་ནས་འཇིགས་པར་གྱུར༌ཏེ།
39 ཁོང་གཉིས་ཀྱི་དྲུང་དུ་ཡོང་ནས་བསྐུལ་མ་བཏང་ཞིང་བཙོན་ཁང་ལས་ཕྱི་རོལ་ཏུ་ཁྲིད་པ་དང་གྲོང་ཁྱེར་དེ་དང་ཁ་འབྲལ་དགོས་ཞེས་ཞུས་སོ།།
40 དེ་ནས་ཁོང་གཉིས་བཙོན་ཁང་ལས་ཕྱི་རུ་བུད་པ་དང་ལིད་ཡཱའི་ཁྱིམ་དུ་ཕེབས་ཤིང་སྤུན་ཟླ་རྣམས་དང་ལྷན་དུ༌འདུས། དེ་དག་ལ་སེམས་གསོ་བྱས་རྗེས་ཁ་བྲལ༌ཏོ།།