ལེའུ་དགུ༌པ།
སོ་ལོ་སྐྱབས་མགོན་ཡེ་ཤུར་དད༌པ།
1 དེའི་དུས༌སུ། སོ་ལོ་ཡིས་མུ་མཐུད་དུ་གཙོ་བོའི་རྗེས་འབྲང་པ་རྣམས་ལ་འཇིགས་སྐུལ་བྱས་ནས་དམར་གསོད་ཀྱི་གཏམ་སྨྲ་བཞིན་ཡོད་པ༌དང༌། མཆོད་དཔོན་ཆེན་པོའི་དྲུང་དུ་སོང༌སྟེ།
2 མཱ་ཤི་ཀའི་ཆོས་ཀྱི་ལམ་དེ་ལ་ཞུགས་མཁན་ཡོད༌ན། ཕོ་མོ་གང་ཡིན་ཡང་བཙན་བཟུང་བྱས་ནས་ཡེ་རུ་སཱ་ལེམ་དུ་འཁྲིད་ཆོག་པའི༌ཕྱིར། དཱ་མེ་སེག་ཏུ་ཡོད་པའི་ཆོས་ཁང་སོ་སོ་ལ་འཕྲིན་ཡིག་གནང་བར་ཞུས།
3 དེ་ནས་སོ་ལོ་ལམ་ལ་ཆས་ཏེ་དཱ་མེ་སེག་གི་ཉེ་སར་སླེབས་པ༌ན། གློ་བུར༌ཉིད་དུ་ནམ་མཁའི་ཞིང་ཁམས་ནས་ཁོའི་ཕྱོགས་བཞིར་འོད་འཁྱུགས་ཤིང་འཚེར་བ༌དང༌།
4 ཁོ་རང་སར་འགྱེལ་ཞིང་སྐད་སྒྲ་ཞིག་གིས་འདི་སྐད་དུ། ཀྱེ། སོ༌ལོ། སོ་ལོ། ཁྱོད་ཀྱིས་བདག་ལ་གནོད་འཚེ་བྱེད་དོན་ཅི་ཡིན་ནམ་ཞེས་གསུངས་པ་ཐོས༌ནས།
5 ཁོ་ན༌རེ། ཀྱེ་གཙོ་བོ༌ལགས། ཁྱེད་རང་སུ་ཡིན་ནམ་ཞེས་ཞུས་པ༌ལ། ཁོང་གིས་འདི་སྐད༌དུ། བདག་ནི་ཁྱོད་ཀྱིས་གནོད་འཚེ་བྱེད་བཞིན་པའི་ཡེ་ཤུ་ཡིན།
6 ཁྱོད་ཡར་ལངས་ནས་གྲོང་ཁྱེར་དེར་སོང༌དང༌། ཁྱོད་ཀྱིས་ཅི་བྱ་དགོས་པ་དེ་མི་གཞན་གྱིས་ཁྱོད་ལ་སྨྲ་བར་ངེས་ཞེས་གསུངས་སོ།།
7 ལམ་གྲོགས་རྣམས་ཀྱིས་ཀྱང་སྐད་དེ་ཐོས་པ་ལས་མི་སུ་ཡང་མ་མཐོང་བས་ཡར་ལངས་ནས་བསྡད་ཅིང་ཅི་ཡང་སྨྲ་མ་ནུས་སོ།།
8 དེ་ནས་སོ་ལོ་ས་ནས་ཡར་ལངས་ཏེ་མིག་ཕྱེས་ཚེ་ཅི་ཡང་མ་མཐོང༌ཞིང་། ལམ་གྲོགས་རྣམས་ཀྱིས་ཁོའི་ལག་པར་འཇུས་ནས་དཱ་མེ་སེག་ཏུ་ཁྲིད་པ༌དང༌།
9 ཁོས་ཉིན་གསུམ་གྱི་རིང་ལ་མིག་གིས་ཅི་ཡང་མ་མཐོང་ཞིང་བཟའ་བཏུང་ཅི་ཡང་མ་སྤྱད༌དོ།།
10 དེ་ཡང་དཱ་མེ་སེག་ཏུ་མིང་ལ་ཨ་ནན་ཡཱ་ཟེར་བའི་རྗེས་འབྲང་པ་ཞིག་ཡོད༌ཅིང༌། ཁོ་ལ་ཞལ་གཟིགས་གནང་ནས་གཙོ་བོས་ཁོ་རང་ལ་ཨ་ནན་ཡཱ་ཞེས་བོས་པ༌དང༌། ཁོས་གཙོ་བོ༌ལགས། ང་རང་འདི་རུ་ཡོད་ཅེས་ཞུས་སོ།།
11 ཡང་གཙོ་བོས་འདི་སྐད༌དུ། ཡར་ལངས་ནས་སྲང་ལམ་དྲང་པོ་དེར་སོང༌སྟེ། ཡུ་དཱའི་ཁྱིམ་ནས་ཐཱར་ཟི་ཡི་མི་སྟེ། མིང་ལ་སོ་ལོ་ཟེར་བ་དེ་ཚོལ༌དང༌། ད་ལྟ་ཁོས་གསོལ་བ་འདེབས་ཀྱིན་ཡོད་པ༌དང༌།
12 རང་གི་མིག་གིས་སླར་ཡང་མཐོང་ཐུབ་པའི༌ཕྱིར། སོ་ལོ་ལ་གནང་བའི་ཞལ་གཟིགས་ནས་ཨ་ནན་ཡཱ་ཞེས་པའི་མི་ཞིག་ཁོའི་སྡོད་སར་ཡོང་སྟེ་ལག་པ་ཁོའི་ལུས་སྟེང་ལ་བཞག་པ་མཐོང་ཡོད་ཅེས་གསུངས་ནའང་།
13 ཨ་ནན་ཡཱ་ན༌རེ། གཙོ་བོ༌ལགས། ངས་མི་གཞན་མང་པོའི་ངག་ལས་མི་འདིའི་སྐོར་གོ་བྱུང་སྟེ་ཡེ་རུ་སཱ་ལེམ་དུ་ཁྱེད་ཀྱི་དད་ལྡན་དམ་པ་རྣམས་ལ་གནོད་འཚེ་ཅི་ཙམ་བཏང་བ༌དང༌།
14 ཡང་ཁོས་མཆོད་དཔོན་ཆེན་པོ་རྣམས་ཀྱི་དྲུང་ནས་ཁྱེད་ཀྱི་མཚན་ནས་འབོད་མཁན་གྱི་མི་རྣམས་བཟུང་ཆོག་པའི་དབང་ཆ་བླངས་ཏེ་འདི་རུ་ཡོད་པའང་ཐོས་ཞེས་ཞུས་ཀྱང༌།
15 གཙོ་བོས་འདི་སྐད༌དུ། ཁྱོད་རང་སོང༌དང༌། ཁོ་ནི་ངས་བདམས་པའི་སྣོད་ལྡན་ཞིག༌སྟེ། ཁོས་ཕྱི་ཕྱོགས་པ་རྣམས༌དང༌། རྒྱལ་པོ༌རྣམས། གཞན་ཡང་ཡེས་ར་ཨེལ་གྱི་བུ་རྒྱུད་བཅས་ཀྱི་མདུན་དུ་བདག་གི་མིང་བསྒྲག་པར་འགྱུར༌ཞིང༌།
16 ངས་ཀྱང་ཁོ་རང་ལ་ངའི་མིང་གི་ཆེད་དུ་ངེས་པར་སྡུག་བསྔལ་ཇི་ཙམ་མྱང་དགོས་པ་སྟོན་པར་བྱའོ་ཞེས་གསུངས་སོ།།
17 དེ་ནས་ཨ་ནན་ཡཱ་ཁྱིམ་དེར་སོང་ནས་སོ་ལོའི་ལུས་ལ་ལག་པ་བཞག༌སྟེ། སྤུན་ཟླ་སོ་ལོ༌ལགས། ལམ་བར་དུ་ཁྱོད་ལ་གསལ་པོར་མངོན་པའི་གཙོ་བོ་ཡེ་ཤུ་ཁོང་ཉིད་ཀྱིས་ཁྱོད་ཀྱི་མིག་གིས་སླར་ཡང་མཐོང་ཐུབ་པ༌དང༌། ཁྱོད་ལ་དམ་པའི་ཐུགས་ཉིད་ཀྱིས་ཁྱབ་པའི་ཕྱིར་ང་རང་མངགས་པ་ཡིན་ཞེས་སྨྲས༌ཤིང༌།
18 དེ་མ་ཐག་སོ་ལོའི་མིག་ལས་ཤུན་སྐོགས་ལྟ་བུ་རེ་ལྷུང་བ་དང་མིག་གིས་སླར་ཡང་མཐོང་ཐུབ་པར་གྱུར་ཏོ།། དེ་ནས་སོ་ལོ་ཡར་ལངས་ནས་ཁྲུས་གསོལ་ལ་ཞུགས་པ༌དང༌།
19 ཁ་ཟས་ལ་རོལ་རྗེས་ལུས་སྟོབས་རྒྱས༌པ་རེད།
སོ་ལོ་ཡིས་དཱ་མེ་སེག་ཏུ་ཆོས་བསྒྲགས་པ།
སོ་ལོ་དང་དཱ་མེ་སེག་ཏུ་ཡོད་པའི་རྗེས་འབྲང་པ་རྣམས་མཉམ་དུ་ཉིན་ཁ་ཤས་ལ་བསྡད༌པ་དང་།
20 དེ་མ་ཐག་ཁོང་ཉིད་ཆོས་ཁང་སོ་སོར་སོང་ནས་སྐྱབས་མགོན་ཡེ་ཤུ་ནི་དཀོན་མཆོག་གི་སྲས་ཡིན་པ་བསྒྲགས༌ཤིང༌།
21 གཏམ་དེ་ཐོས་པའི་མི་ཐམས་ཅད་ངོ་མཚར་སྐྱེས་ཏེ་ན༌རེ། མི་འདི་ནི་ཡེ་རུ་སཱ་ལེམ་ནས་སྐྱབས་མགོན་ཡེ་ཤུའི་མཚན་ལ་ཞུ་མཁན་རྣམས་ལ་གནོད་འཚེ་ཆེན་པོ་བཏང་བ༌དང༌། དད་ལྡན་རྣམས་བཟུང་སྟེ་མཆོད་དཔོན་ཆེན་པོ་རྣམས་ཀྱི་གམ་དུ་འཁྲིད་པའི་ཕྱིར་འདིར་ཡོང་བ་དེ་མ་ཡིན་ནམ་ཞེས་སྨྲས་སོ།།
22 འོན་ཀྱང་སོ་ལོ་ལ་ནུས་མཐུ་ཇེ་ཆེ་ནས་ཇེ་ཆེར་གྱུར་པ༌དང༌། ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་བདེན་དཔང་བྱས་ཏེ་དཱ་མེ་སེག་ཏུ་ཡོད་པའི་ཡ་ཧུ་དཱ་པ་རྣམས་དགག་པས་བཏུལ་བའོ།།
23 དེ་ནས་ཉིན་མང་པོ་འགོར་བ་དང་ཡ་ཧུ་དཱ་པ་རྣམས་ཀྱིས་སོ་ལོ་གསོད་པར་གྲོས་བྱས༌ནའང༌།
24 སོ་ལོས་ཁོ་རྣམས་ཀྱི་ཇུས་ངན་ཤེས༌པ་དང་། དེ་དག་གིས་སོ་ལོ་གསོད་པའི་ཕྱིར་ཉིན་མཚན་མེད་པར་གྲོང་ཁྱེར་གྱི་མཁར་སྒོ་ཐམས་ཅད་བསྲུངས་མོད།
25 འོན་ཀྱང་སོ་ལོའི་རྗེས་འབྲང་པ་རྣམས་ཀྱིས་མཚན་མོའི་དུས་སུ་ཁོང་ཉིད་སླེ་བོའི་ནང་དུ་བཞག་སྟེ་མཁར་གྱང་ནས་མར་དཔྱངས་སོ།།
26 དེ་ནས་སོ་ལོ་ཁོང་ཉིད་ཡེ་རུ་སཱ་ལེམ་དུ་སླེབས་ནས་རྗེས་འབྲང་པ་རྣམས་དང་འགྲོགས་འདོད༌ཀྱང༌། དེ་རྣམས་ཁོང་ལ་འཇིགས་ཤིང་རྗེས་འབྲང་པ་ཡིན་པར་ཡིད་མ་ཆེས་པ་རེད།
27 འོན༌ཀྱང༌། པཱར་ན་པཱ་ཡིས་ཁོང་ཉིད་སྐུ་ཚབ་པ་རྣམས་ཀྱི་མདུན་དུ་ཁྲིད༌ཅིང༌། དེ་སྔར་སོ་ལོས་ལམ་བར་ནས་གཙོ་བོ་ཁོང་ཉིད་ཇི་ལྟར་མཐོང་ཞིང་ཁོང་གིས་ཁོ་རང་ལ་གསུང་གླེང་ཅི་གནང་བ༌དང༌། ཡང་སོ་ལོས་དཱ་མེ་སེག་ནས་སྙིང་སྟོབས་ཆེན་པོས་སྐྱབས་མགོན་ཡེ་ཤུའི་མཚན་ལ་བརྟེན་ནས་ཆོས་བསྒྲགས་པ་སོགས་སྨྲས་སོ།།
28 དེ་ནས་སོ་ལོ་དང་སྐུ་ཚབ་པ་རྣམས་མཉམ་དུ་འགྲོགས༌ཏེ། ཡེ་རུ་སཱ་ལེམ་དུ་རྒྱུ་ཞིང་གཙོ་བོའི་མཚན་ལ་བརྟེན་ནས་སྤོབས་པ་ཆེན་པོས་ཆོས་བསྒྲགས་པ༌དང༌།
29 གྷི་རིག་སྐད་སྨྲ་མཁན་ཡ་ཧུ་དཱ་པ་རྣམས་ལའང་རྩོད་གླེང་བྱས་ཤིང་དེ་རྣམས་ཀྱིས་སོ་ལོ་གསོད་པའི་ཐབས་བཙལ།
30 སྤུན་ཟླ་རྣམས་ཀྱིས་དོན་དེ་ཤེས་ནས་ཁོང་ཉིད་མར་ཀེ་སར་ཡཱ་རུ་བསྐྱལ་ཏེ་ཐཱར་ཟི་ལ་འགྲོ་རུ་བཅུག་གོ།
31 དེའི་དུས༌སུ། ཡ་ཧུ་དཱ༌དང༌། ག༌ལིལ། སཱ་མར་ཡ་བཅས་ཡུལ་སོ་སོའི་ཆོས་ཚོགས་རྣམས་ལ་ཞི་བདེ་ཡོད་ཅིང་ཡར་བསྐྱེད་ཐོབ་པ༌དང༌། གཙོ་བོ་ལ་གུས་ཤིང་འཇིགས་པ་དང་དམ་པའི་ཐུགས་ཉིད་ཀྱིས་སེམས་གསོ་མཛད་པའི་ངང་ནས་མི་གྲངས་ཀྱང་ཇེ་མང་དུ་འཕེལ་ཏོ།།
པེ་ཏྲོའི་འཕྲིན་ལས་ཀྱི་སྐོར།
32 དེ་ཡང་པེ་ཏྲོ་ཡུལ་ཕྱོགས་ཀུན་ཏུ་རྒྱུ་བའི་དུས་སུ་ལད་རྡ་རུ་གནས་པའི་དད་ལྡན་དམ་པ་རྣམས་ཀྱི་དྲུང་དུ་ཕྱིན་པ༌དང༌།
33 དེ་རུ་མིང་ལ་ཨེ་ནེ་ཡཱ་བྱ་བ་ནད་བྱུང་ནས་ལོ་བརྒྱད་ལ་ཉལ་སར་ལྷུང་བའི་ཞ་བོ་ཞིག་ཡོད་པ་དང་ཕྲད་ཅིང༌།
34 པེ་ཏྲོ་ན༌རེ། ཨེ་ནེ༌ཡཱ། ཡེ་ཤུ་མཱ་ཤི་ཀས་ཁྱོད་ཀྱི་ནད་གསོས་པས་ཡར་ལངས་ནས་རང་གི་མལ་སྟན་བདག་གཉེར་གྱིས་ཞེས་གསུངས་མ་ཐག་ཁོ་རང་ཡར་ལངས་པ་དང་།
35 ལད་རྡ་དང་ཤཱ་རོན་དུ་གནས་པའི་མི་ཐམས་ཅད་ཀྱིས་ཨེ་ནེ༌ཡཱ་མཐོང་སྟེ་གཙོ་བོའི་ཕྱོགས་སུ་འཁོར༌ཏོ།།
36 དེ་ནས་ཡོ་ཕཱ་རུ་མིང་ལ་ཐཱ་པི་ཐ་ཟེར་བའི་བུད་མེད་རྗེས་འབྲང་པ་ཞིག་ཡོད༌ཅིང༌། མིང་དེ་གྷི་རིག་སྐད་དུ་བསྒྱུར་ན་དོར་ཀི་ཞེས་ཀྱང༌ཟེར། ཁོ་མོས་རྟག་ཏུ་ལས་བཟང་པོ་བསྒྲུབས་པ་དང་སྦྱིན་པ་མང་པོ་བཏང་ངོ༌།།
37 དུས༌དེར། ཁོ་མོར་ན་ཚ་བྱུང་ནས་ཚེ་ལས་འདས་པ་དང་མི་རྣམས་ཀྱིས་ཁོ་མོའི་བེམ་པོ་བཀྲུས་ཏེ་ཐོག་ཁང་ཞིག་གི་ནང་དུ་བཞག་གོ།
38 ཡོ་ཕཱ་ནི་ལད་རྡ་དང་བར་ཐག་ཉེ་བས་རྗེས་འབྲང་པ་རྣམས་ཀྱིས་པེ་ཏྲོ་ཁོང་ཉིད་ལད་རྡ་རུ་ཡོད་པ་ཐོས་ནས་མི་གཉིས་ཁོང་གི་དྲུང་དུ་མངགས༌ཏེ། དུས་མི་འགྱངས་པར་ངེད་ཅག་གི་གམ་དུ་ཕེབས་རོགས་ཞེས་ནན་གྱིས་ཞུས་སོ།།
39 དེ་ནས་པེ་ཏྲོ་ཡར་ལངས་ནས་དེ་དག་དང་མཉམ་དུ་ལམ་ལ་ཆས། ཡོ་ཕཱ་རུ་སླེབས་ཤིང་མི་རྣམས་ཀྱིས་ཁོང་ཉིད་ཐོག་ཁང་ནང་དུ་ཁྲིད་པ༌དང༌། ཡུགས་མོ་རྣམས་ཁོང་གི་གམ་དུ་ཡར་ལངས་ནས་ངུས༌ཤིང༌། བུད་མེད་དོར་ཀི་དེ་སྔར་ཁོ་མོ་རྣམས་དང་མཉམ་དུ་ཡོད་དུས་བཟོས་པའི་ནང་གོས་དང་ཕྱི་གོས་རྣམས་ཁོང་ལ་བསྟན་པ་རེད།
40 འོན་ཀྱང་པེ་ཏྲོས་ཁོ་མོ་རྣམས་ཕྱིར་འགྲོ་རུ་བཅུག༌རྗེས། པུས་མོ་སར་བཙུགས་ཏེ་དཀོན་མཆོག་ལ་གསོལ་བ་བཏབ༌ཅིང༌། ཞལ་ཕྱིར་འཁོར་ནས་བེམ་པོ་ལ་འདི་སྐད༌དུ། ཐཱ་པི༌ཐ། ཡར་ལོངས་ཤིག་ཅེས་གསུངས་པ༌ན། ཁོ་མོས་མིག་ཕྱེས་ཏེ་པེ་ཏྲོ་མཐོང་བ་དང་ཡར་ཙོག་པུར་བསྡད་དོ།།
41 དེ་ནས་པེ་ཏྲོས་ཁོ་མོའི་ལག་པར་འཇུས་ནས་ཡར་བསླངས་ཤིང་དད་ལྡན་དམ་པ་དང་ཡུགས་མོ་རྣམས་ནང་ལ་བོས༌ཏེ། ཁོ་མོ་གསོན་པོར་དེ་རྣམས་ལ་སྤྲད།
42 དོན་དེ་ཡོ་ཕཱ་ཡོངས་སུ་ཁྱབ་པ་དང་མི་མང་པོས་གཙོ་བོ་ལ་དད་པ་བྱས་སོ།།
43 དོན་དེ་བྱུང་བའི་རྗེས༌སུ། པེ་ཏྲོ་ཁོང་ཉིད་ཡོ་ཕཱ་ཡི་སི་མོན་ཟེར་བའི་ཀོ་བཟོ་བ་ཞིག་གི་ཁྱིམ་དུ་ཉིན་མང་པོར་བཞུགས༌སོ།།