ལེའུ་བཅུ་གསུམ༌པ།
བྱམས་པའི༌སྐོར།
1 དེ་ཡང་བདག་གིས་མི་དང་ཕོ་ཉ་རྣམས་ཀྱི་སྐད་སྣ་ཚོགས་སྨྲ་ཡང་བྱམས་པ་མེད༌ན། བདག་ནི་འཁར་རྔ་དང་སྦུབ་ཆ་རྡུང་བའི་སྒྲ་གྲགས་པ་ལྟ་བུར་གྱུར་པ་ཡིན་ནོ།།
2 གལ༌ཏེ། བདག་ལ་ལུང་བསྟན་གནང་བའི་ནུས་པ་ལྡན༌ཞིང༌། གསང་བ་དང་ཤེས་བྱ་ཐམས་ཅད་རྟོགས་པ་དང་། རི་བོ་སྤོར་ནུས་པའི་དད་པ་ཡོད་ཀྱང་བྱམས་པ་མེད༌ན། བདག་ནི་ཅི་ཡང་མ་ཡིན།
3 གལ༌ཏེ། བདག་གིས་རང་ལ་ཡོད་པ་ཐམས་ཅད་དབུལ་པོ་རྣམས་ལ་སྦྱིན༌ཞིང༌། རང་ལུས་སྤངས་ནས་མེ་རུ་བསྲེགས༌ཀྱང༌། བྱམས་པ་མེད༌ན། བདག་ལ་ཕན་ཐོགས་ཅི་ཡང་མེད༌དོ།།
4 བྱམས་པ་ནི་རྟག་བརྟན་གྱི་བཟོད་བསྲན༌དང༌། སྙིང་རྗེ་ལྡན༌པ། ཕྲག་དོག་མེད༌པ། རང་བསྟོད་མི་བྱེད༌པ། ང་རྒྱལ་མེད༌པ།
5 ངོ་གནོང་བའི་ལས་མི་བྱེད༌པ། རང་དོན་མི་སེམས༌པ། རང་དགར་མི་ཁྲོ༌བ། གཞན་གྱི་ཉེས་སྐྱོན་སེམས་སུ་མི་འཛིན༌པ།
6 དྲང་བདེན་མིན་པར་མི་དགའ་ཞིང་བདེན་པ་ཁོ་ནར་དགའ༌བ།
7 དོན་ཀུན་ལ་ཐུགས་རྒྱ་ཡངས༌པ། དོན་ཀུན་ལ་ཡིད་ཆེས༌པ། དོན་ཀུན་ལ་རེ་སྒུག་བྱེད༌པ། དོན་ཀུན་ལ་བཟོད་བསྲན་བྱེད་པ་ཞིག་ཡིན༌ནོ།།
8 བྱམས་པ་ལ་ཟད་མཐའ་མེད༌ཀྱང༌། ལུང་བསྟན་གནང་བའི་ནུས་པ་ནི་མཐའ་མར་རྫོགས་པར་འགྱུར༌ལ། སྐད་གཞན་སྨྲ་བའི་ནུས་པ་མཐའ་མར་མཚམས་ཆད་པ༌དང༌། ཤེས་བྱ་ཡང་མཐའ་མར་མེད་པར་འགྱུར་ངེས༌ཡིན།
9 རྒྱུ་མཚན་ནི་ད་ལྟ་བདག་ཅག་གིས་རྟོགས་པའི་ཤེས་བྱ་ཆ་མི་ཚང༌ལ། ལུང་བསྟན་གནང་བའང་ཆ་མི་ཚང་ངོ་།།
10 འོན་ཀྱང་། ཕུན་སུམ་ཚོགས་པ་དེ་ཉིད་ཡོང་བའི་ཚེ། ཆ་མི་ཚང་བ་དེ་དག་མེད་པར་འགྱུར།
11 ང་རང་བྱིས་པ་ཡིན་དུས། བདག་གི་སྨྲ་བརྗོད༌དང༌སེམས༌པ། བསམ་གཞིགས་བཅས་ནི་བྱིས་པ་དང་འདྲ༌ཞིང༌། ན་ཚོད་ཇེ་ཆེར་སོང་བ་ན་བྱིས་པའི་ངང་ཚུལ་སྤངས༌པ་ཡིན།
12 ད་ལྟ་བདག་ཅག་གིས་མེ་ལོང་གི་ངོས་ལས་རབ་རིབ་ཀྱི་གཟུགས་བརྙན་མཐོང་བ་དང་མཚུངས༌མོད། འོན༌ཀྱང༌། དུས༌དེ་སླེབས་པ་ན། བདག་ཅག་གིས་ཁ་རི་ཁ་ཐུག་ཏུ་མཐོང་བར་ངེས། ད་ལྟ་བདག་གིས་ཤེས་པ་ནི་ཆ་མི་ཚང་ཡང༌། ཁོང་གིས་ང་རང་ཡོངས་སུ་མཁྱེན་པ༌བཞིན། དུས་དེ་ལ་བདག་གིས་ཡོངས་སུ་རྟོགས་པར་འགྱུར་རོ།།
13 ད་ལྟ་ནམ་རྒྱུན་ཡོད་པ་ནི་དད་པ༌དང༌། རེ༌བ། བྱམས་པ་གསུམ་པོ་ཡིན༌ལ། དེ་ལས་ཆེས་མཆོག་ཏུ་གྱུར་པ་ནི་བྱམས་པ་ཡིན༌ནོ།།