ལེའུ་བཅུ་བཞི༌པ།
ལུང་བསྟན་དང་སྐད་གཞན་སྨྲ་བའི་གནང་སྦྱིན༌སྐོར།
1 ཁྱོད་ཅག་གིས་བྱམས་པ་ལ་བརྩོན་པར་བྱ༌ཞིང༌། དམ་པའི་ཐུགས་ཉིད་ཀྱི་གནང་སྦྱིན་ལའང་བརྩོན་པ༌དང༌། དེ་ལས་ཀྱང་ལུང་བསྟན་གནང་བར་བརྩོན་པར༌བྱའོ།།
2 རྒྱུ་མཚན་ནི་སྐད་གཞན་སྨྲ་མཁན་གྱིས་མི་གཞན་དག་ལ་སྨྲས་པ་མ་ཡིན༌པར། དཀོན་མཆོག་ལ་ཞུས་པ་ཡིན་པས་མི་སུས་ཀྱང་དོན་གོ་མ་ཐུབ༌ནའང༌། ཁོས་དམ་པའི་ཐུགས་ཉིད་ལ་བརྟེན་ནས་གསང་བ་སྣ་ཚོགས་སྨྲ་བར་བྱེད།
3 འོན༌ཀྱང༌། ལུང་སྟོན་པར་བྱེད་པ་ནི་མི་གཞན་རྣམས་ལ་སྨྲ་བ་ཡིན༌ཏེ། མི་སྐྱེད་སྲིང་བྱེད་པ༌དང༌། མི་ལ་སྐུལ་མ་གནང་བ། མི་ལ་སེམས་གསོ་བྱེད༌པ་བཅས༌ཡིན།
4 སྐད་གཞན་སྨྲ་མཁན་གྱིས་རང་ཉིད་ཡར་སྐྱེད་བྱེད༌ཅིང༌། ལུང་སྟོན་པས་ཆོས་ཚོགས་ཡར་སྐྱེད་བྱེད༌པ་ཡིན་ནོ།།
5 བདག་གི་རེ་བ་ནི་ཁྱོད་ཅག་ཚང་མས་སྐད་གཞན་སྨྲ་བ༌དང༌། དེ་བས་ཀྱང་ལུང་བསྟན་གནང་མཁན་དུ་བྱས་ན་ལེགས་སོ།། ཅིའི་ཕྱིར་ཞེ་ན། སྐད་གཞན་སྨྲ་མཁན་གྱི་ཚིག་དོན་ལ་སྐད་སྒྱུར་མ་བྱས༌ན། ཆོས་ཚོགས་སྐྱེད་སྲིང་བྱེད་པར་མི་ཕན༌པས། ལུང་སྟོན་པ་ནི་སྐད་གཞན་སྨྲ་མཁན་ལས་མཆོག་ཏུ་གྱུར་པའི་ཕྱིར༌རོ།།
6 སྤུན་ཟླ༌རྣམས། གལ༌ཏེ། ང་རང་ཁྱོད་ཅག་གི་གམ་དུ་ཡོང་ནས་སྐད་གཞན་ཁོ་ན་སྨྲ༌ཞིང༌། གསང་བ་མངོན་པའམ། ཤེས་རྟོགས་སམ། ལུང༌བསྟན་ནམ། ཁྲིད་སྟོན་བཅས་ཀྱི་སྒོ་ནས་གསལ་བཤད་མ་བྱས༌ན། བདག་ནི་ཁྱོད་རྣམས་ལ་ཕན་ཐོགས་ཅི་ཡོད་དམ།
7 སེམས་མེད་ཀྱི་དངོས་པོ་གླིང་བུའམ་རྒྱུད་མངས་སོགས་ལས་བྱུང་བའི་སྒྲ་དབྱངས་དང་ཁྱད་པར་མེད༌ན། གང་ཞིག་གླིང་བུའི་སྒྲ་དང་གང་ཞིག་རྒྱུད་མངས་ཀྱི་སྒྲ་ཡིན་པ་ཇི་ལྟར་ཤེས༌སམ།
8 གལ༌ཏེ། དུང་བརྡ་མི་གསལ་བ་ཞིག་བཏང༌ན། སུ་ཞིག་གིས་དམག་འཐབ་ལ་སྟ་གོན་བྱེད༌དམ།
9 དེ་བཞིན་དུ་ཁྱོད་ཅག་གིས་ཀྱང་སྨྲ་བརྗོད་གསལ་པོར་མ་སྨྲས༌ན། ཁྱོད་ཅག་གིས་ཅི་ཞིག་སྨྲ་བ་སུ་ཞིག་གིས་ཤེས༌སམ། དེ་ནི་བར་སྣང་ལ་གཏམ་བཤད་པ་བཞིན༌ནོ།།
10 འཇིག་རྟེན་དུ་སྐད་རིགས་ཅི་འདྲ་མང༌ཡང༌། ནང་དོན་མེད་པའི་སྐད་རིགས་གཅིག་ཀྱང་མེད།
11 གལ༌ཏེ། ངས་མི་གཞན་གྱིས་སྨྲས་པའི་སྐད་རིགས་མ་གོ༌ན། སྨྲ་མཁན་དེ་ནི་ངའི་མདུན་དུ་མཐའ་འཁོབ་པ་ལྟ་བུ་ཡིན༌ཞིང༌། སྨྲ་མཁན་དེའི་མདུན་དུ་ང་རང་ཡང་མཐའ་འཁོབ་པ་ལྟ་བུ་ཡིན་ནོ།།
12 དེ་བས་ཁྱོད་རྣམས་ཀྱང་དེ་བཞིན༌ཏེ། དམ་པའི་ཐུགས་ཉིད་ཀྱི་གནང་སྦྱིན་འཐོབ་པར་བརྩོན༌པས། ཆོས་ཚོགས་སྐྱེད་སྲིང་བྱེད་པའི་གནང་སྦྱིན་འཐོབ་པ་ལ་ལྷག་ཏུ་བརྩོན་པར་གྱིས༌ཤིག།
13 དེའི༌ཕྱིར། སྐད་གཞན་སྨྲ་མཁན་གྱིས་དེ་ལ་སྐད་སྒྱུར་བྱེད་ནུས་པའི་ཕྱིར་གསོལ་བ་འདེབས་པར༌བྱའོ།།
14 གལ༌ཏེ། བདག་གིས་སྐད་གཞན་སྨྲ་བའི་ངང་ནས་གསོལ་བ་བཏབ༌ན། ངའི་སེམས་ཉིད་ཀྱི་ངང་ནས་གསོལ་བ་བཏབ་པ་ཡིན༌ཡང༌། བདག་གི་བློ་གྲོས་ལ་ཕན་ཐོགས་མེད།
15 དེ་ལྟར་ཡིན༌ན། བདག་གིས་ཅི་བྱའམ། ངས་སེམས་ཉིད་ཀྱི་ངང་ནས་གསོལ་བ་འདེབས་དགོས་ལ། བློ་གྲོས་ཀྱི་ངང་ནས་ཀྱང་གསོལ་བ་འདེབས་དགོས། ཡང་སེམས་ཉིད་ཀྱི་ངང་ནས་གླུ་ལེན་དགོས་ལ། བློ་གྲོས་ཀྱི་ངང་ནས་ཀྱང་གླུ་ལེན་དགོས།
16 དེ་ལྟར་མ་ཡིན༌ན། ཁྱོད་ཅག་གིས་སེམས་ཉིད་ཀྱི་ངང་ནས་བསྟོད་བསྔགས་བརྗོད་པའི༌ཚེ། གནས་དེར་ཡོད་པའི་སྐད་གཞན་མི་གོ་བ་རྣམས་ཀྱིས་ཁྱོད་ཀྱི་སྐད་ཆ་མི་གོ༌བས། ཁྱོད་ཀྱིས་དྲིན་ལན་གྱི་ཞུ་ཚིག་འབུལ་དུས་སུ་ཞིག་གིས་ཨ་མེན་ཞེས་སྨྲ་བར་ནུས་སམ།
17 ཁྱོད་ཅག་གིས་དྲིན་ལན་གྱི་ཞུ་ཚིག་ཕུལ་བ་ནི་ལེགས༌ནའང༌། མི་གཞན་སྐྱེད་སྲིང་བྱེད་པར་ཕན་ཐོགས་ཅི་ཡང་མེད༌དོ།།
18 བདག་གིས་སྐད་གཞན་སྨྲ་བ་ནི་ཁྱོད་ཅག་ཐམས་ཅད་ལས་ཀྱང་མང་བས་ངས་དཀོན་མཆོག་ལ་ཐུགས་རྗེ༌ཆེ་ཞུའོ།།
19 འོན༌ཀྱང༌། ཆོས་ཚོགས་ཀྱི་ནང་དུ་བློ་གྲོས་ལ་བརྟེན་ནས་མི་གཞན་ལ་ཁྲིད་སྟོན་བྱེད་པའི་ཚིག་ལྔ་སྨྲ་འདོད་ཅིང་། དེ་ནི་སྐད་གཞན་ཆིག་ཁྲི་སྨྲས་པ་ལས་ཀྱང་མཆོག་ཏུ་གྱུར་པ་ཡིན༌ནོ།།
20 སྤུན་ཟླ༌རྣམས། བསམ་བློའི་ཆ་ནས་བྱིས་པ་བཞིན་དུ་མ་ཡིན༌པར། དོན་ངན་པའི་ཆ་ནས་བྱིས་པ་ལྟ་བུ་ཡིན་དགོས༌ཀྱང༌། བསམ་བློའི་ཆ་ནས་མི་དར་མ་བཞིན་དུ་ཡིན་པར༌གྱིས།
21 དེ་ལ་དཀོན་མཆོག་གི་བཀའ་ཁྲིམས་ཀྱི་མདོ༌ལས། གཙོ་བོས་འདི་སྐད༌དུ།
བདག་གིས་ཕྱི་ཕྱོགས་མི་རྣམས༌ཀྱི།།
སྐད་གཞན་དང་ནི་སྨྲ་སྒོ༌བཞིན།།
སྨྲ་བར་བྱ་ཡང་མི་རྣམས་ཀྱིས།།
བདག་གི་གཏམ་ལ་མི་མཉན༌ནོ།།
ཞེས་གསུངས༌པ་བཀོད་ཡོད་དོ།།
22 དེས༌ན། སྐད་གཞན་སྨྲ་བ་ནི་དད་ལྡན་རྣམས་ལ་བདེན་དཔང་བྱེད་པའི་ཕྱིར་མ་ཡིན༌པར། དད་པ་མེད་པ་རྣམས་ལ་བདེན་དཔང་བྱེད་པའི་ཕྱིར་ཡིན༌ལ། ལུང་བསྟན་གནང་བ་ནི་དད་པ་མེད་པ་རྣམས་ལ་བདེན་དཔང་བྱེད་པའི་ཕྱིར་མ་ཡིན༌པར། དད་ལྡན་རྣམས་ལ་བདེན་དཔང་བྱེད་པའི་ཕྱིར་ཡིན་ནོ།།
23 དེའི༌ཕྱིར། ཆོས་ཚོགས་ཀྱི་མི་ཐམས་ཅད་གནས་གཅིག་ཏུ་འཛོམས་ཤིང་ཀུན་གྱིས་སྐད་གཞན་སྨྲ་བ༌ན། སྟབས་དབང་གིས་སྐད་གཞན་མི་གོ་བའམ་དད་པ་མེད་པའི་མི་འགའ་ཡོང༌ཚེ། ཁྱོད་རྣམས་སྨྱོས་འདུག་ཅེས་ཟེར་བ་མིན༌ནམ།
24 གལ༌ཏེ། མི་ཐམས་ཅད་ཀྱིས་ལུང་བསྟན་གནང་བའི་དུས་སུ། གློ་བུར་ཉིད་དུ་དད་པ་མེད་པའམ་སྐད་གཞན་མི་གོ་བའི་མི་ཞིག་ཡོང༌ཚེ། མི་ཚོགས་ཐམས་ཅད་ཀྱིས་དེ་ལ་ཁ་ཏ་བསླབ་བྱ་གཏོང་བ་དང་དྲི་བ་དྲིས་ཏེ།
25 རང་སེམས་ཀྱི་གསང་བ་ཕྱིར་མངོན་པར་འགྱུར༌བས། མི་དེས་ལུས་པོ་སར་བཏུད་ནས་དཀོན་མཆོག་ལ་ཕྱག་བཙལ་ཏེ། དཀོན་མཆོག་ནི་དངོས་གནས་ཁྱོད་ཅག་གི་ཁྲོད་དུ་བཞུགས་ཞེས་བསྔགས་བརྗོད་བྱ་ངེས༌སོ།།
ཆོས་ཚོགས་ཀྱི་སྒྲིག༌ལམ།
26 སྤུན་ཟླ༌རྣམས། དེས་ན་འདི་ནི་ཅི་ལྟར་ཡིན༌ནམ། ཁྱོད་ཅག་མཉམ་དུ་འཛོམས་པའི་དུས༌སུ། མི་ལ་ལས་བསྟོད་དབྱངས་འབུལ་བ༌དང༌། ལ་ལས་ཆོས་འཆད་པ། ལ་ལས་གསང་བ་མངོན་པ། ལ་ལས་སྐད་གཞན་སྨྲ༌བ། ལ་ལས་སྐད་སྒྱུར་བྱེད་པ་བཅས་ཐམས་ཅད་ཀྱིས་མི་རྣམས་སྐྱེད་སྲིང་བྱེད་དགོས་སོ།།
27 གལ༌ཏེ། སྐད་གཞན་སྨྲ་མཁན་ཡོད༌ན། མི་གཉིས་སམ་མང་ན་མི་གསུམ་གྱིས་རེས་མོས་ངང་ནས་སྨྲ་ཞིང་མི་ཞིག་གིས་སྐད་སྒྱུར་བྱེད་དགོས།
28 གལ༌ཏེ། སྐད་སྒྱུར་བྱེད་མཁན་མེད༌ན། སྐད་གཞན་སྨྲ་མཁན་གྱིས་ཆོས་ཚོགས་ནང་དུ་ཅི་ཡང་མི་སྨྲ༌བར། རང་ཉིད་དང་དཀོན་མཆོག་ཁོ་ནར་སྨྲ་བར༌བྱའོ།།
29 ལུང་སྟོན་པ་མི་གཉིས་སམ་གསུམ་གྱིས་ལུང་བསྟན་གནང་བར་བྱ༌ཞིང༌། གཞན་དག་གིས་བསམ་གཞིགས་བཏང་ནས་རྟོག་དཔྱོད༌བྱའོ།།
30 གལ༌ཏེ། གནས་དེར་སྡོད་མཁན་གྱི་མི་གཞན་ཞིག་ལ་མངོན་པར་གྱུར་ན། སྔོན་དུ་ལུང་སྟོན་མཁན་དེ་ནི་ཁ་རོག་ཏུ་སྡོད་འོས༌པ་ཡིན།
31 ཅིའི་ཕྱིར་ཞེ་ན། ཁྱོད་ཐམས་ཅད་ཀྱིས་རེ་རེ་བཞིན་ལུང་བསྟན་གནང་བར་བྱ་སྟེ། མི་ཀུན་གྱིས་བསླབ་ཅིང་སྐུལ་མ་ཐེབས་པའི་ཕྱིར༌རོ།།
32 ལུང་སྟོན་པའི་སེམས་ཉིད་ནི་མ་གཞི་ལུང་སྟོན་པ་རྣམས་ལ་བསྟུན་པ་ཡིན་ཏེ།
33 དཀོན་མཆོག་ནི་མི་ལ་མགོ་རྙོག་པར་མཛད་པའི་དཀོན་མཆོག་མ་ཡིན༌པར། མི་ལ་ཞི་མཐུན་ཡོང་བར་མཛད་པའི་དཀོན་མཆོག་ཡིན་པས༌སོ།།
དད་ལྡན་དམ་པ་རྣམས་ཀྱི་ཆོས་ཚོགས་ཐམས་ཅད་ཀྱི་ནང་དུ།
34 བུད་མེད་དག་གིས་གཏམ་མི་སྨྲ་བར་གྱིས། ཅིའི་ཕྱིར་ཞེ་ན། བཀའ་ཁྲིམས་ལས་གསུངས་པ༌བཞིན་དུ། ཁོ་མོ་རྣམས་ཀྱིས་གཏམ་མི་སྨྲ་ཞིང་རྣམ་པ་ཀུན་ཏུ་བསྟུན་དགོས་སོ།།
35 གལ༌ཏེ། ཁོ་མོ་རྣམས་ཀྱིས་གང་ཞིག་བསླབ་འདོད༌ན། རང་གི་ཁྱིམ་ནས་རང་ཉིད་ཀྱི་ཁྱོ་གར་དྲི་བར་བྱ༌སྟེ། བུད་མེད་རྣམས་ཀྱིས་ཆོས་ཚོགས་ནང་དུ་གཏམ་སྨྲ་བ་ནི་ངོ་གནོང་བ་ཞིག་ཡིན་པའི་ཕྱིར༌རོ།།
36 དཀོན་མཆོག་གི་བཀའ་ནི་ཁྱོད་ཅག་ལས་བྱུང་བ་ཞིག་ག་ནས༌ཡིན། ཁྱོད་ཅག་ཁོ་ན་ལ་ཐོབ་པ་ཞིག་ཀྱང་ག་ནས༌ཡིན།
37 གལ༌ཏེ། མི་ཞིག་གིས་རང་ཉིད་ནི་ལུང་སྟོན༌པའམ། ཡང་ན་ཐུགས་ཉིད་དང་ལྡན་པ་ཞིག་ཡིན་པར་འདོད༌ན། བདག་གིས་ཁྱོད་རྣམས་ལ་བྲིས་པ་དེ་དག་ནི་གཙོ་བོའི་བཀའ་ཡིན་པ་ཤེས་པར་གྱིས།
38 གལ༌ཏེ། སུ་ཞིག་གིས་དོན་འདི་ལ་དོ་སྣང་མི་བྱེད་ན། མི་དེ་ལའང་དོ་སྣང་བྱེད་མི་དགོས་སོ།།
39 དེའི༌ཕྱིར། བདག་གི་སྤུན་ཟླ༌རྣམས། ཁྱོད་རྣམས་ཀྱིས་ལུང་བསྟན་གནང་བར་བརྩོན་པ༌དང༌། སྐད་གཞན་སྨྲ་བའང་འགོག་པར་མི༌བྱ་བར།
40 དོན་ཐམས་ཅད་ཚུལ་དང་མཐུན་པའི་སྒོ་ནས་གོ་རིམ་བཞིན་དུ་བསྒྲུབ་དགོས༌སོ།།