ལེའུ་གསུམ༌པ།
ཞལ་ཆད་གསར་པའི་ཞབས་ཕྱི༌པ།
1 ངེད་ཅག་གིས་སླར་ཡང་རང་ལ་བསྟོད་པ་བྱེད༌དམ། མི་གཞན་དག་ལྟར་ངེད་ཅག་གི་མཚམས་སྦྱོར་ཡི་གེ་ཁྱོད་རྣམས་ལ་སྤྲོད༌པའམ། ཡང་ན་ཁྱོད་ཅག་གི་མཚམས་སྦྱོར་ཡི་གེ་མི་གཞན་ལ་སྤྲོད་དགོས་སམ་ཞེ་ན་མི་དགོས་སོ།།
2 ཁྱོད་རྣམས་ནི་ངེད་ཅག་གི་སེམས་སུ་བྲིས་པའི་ངོ་སྤྲོད་ཡི་གེ་ཡིན༌ཏེ། མི་ཀུན་གྱིས་ཤེས་ཤིང་ཀློག༌པ་ཡིན།
3 ཁྱོད་ཅག་ནི་སྐྱབས་མགོན་མཱ་ཤི་ཀའི་འཕྲིན་ཡིག་ཡིན་པར་མངོན་ཞིང་། ངེད་ཅག་ལ་བརྟེན་ནས་བྱུང་བ་ཡིན་ལ། དེ་ནི་སྣག་ཚས་བྲིས་པ་མ་ཡིན་པར་གཏན་དུ་གསོན་པོར་བཞུགས་པའི་དཀོན་མཆོག་གི་ཐུགས་ཉིད་ཀྱིས་ཕྱག་བྲིས་གནང༌ཞིང༌། རྡོ་ལེབ་སྟེང་དུ་བྲིས་པ་མ་ཡིན་པར་མིའི་སེམས་ནང་དུ་བྲིས་པ་ཡིན༌ནོ།།
4 སྐྱབས་མགོན་མཱ་ཤི་ཀ་བརྒྱུད་ནས་ངེད་ཅག་ལ་དཀོན་མཆོག་གི་སྤྱན་དྲུང་དུ་ཡིད་ཆེས་དེ་འདྲ་ཡོད་པ་ཡིན།
5 ངེད་ཅག་གིས་རང་ལ་བརྟེན་ནས་གང་ཞིག་བསྒྲུབ་ནུས་པར་བསམ་པ་མིན༌ཏེ། གང་ཞིག་བསྒྲུབ་ནུས་པ་ནི་དཀོན་མཆོག་ལ་བརྟེན་ནས་བྱུང༌བ་ཡིན།
6 ཁོང་གིས་ཀྱང་ངེད་ཅག་ནི་ཞལ་ཆད་གསར་པའི་ཞབས་ཕྱི་པ་བྱེད་ནུས་པར་མཛད༌ཅིང༌། དེ་ནི་བཀའ་ཁྲིམས་ལས་བྱུང་བ་མ་ཡིན་པར་དམ་པའི་ཐུགས་ཉིད་ལས་བྱུང་བ་ཡིན༌ཏེ། བཀའ་ཁྲིམས་ཀྱིས་འཆི་རུ་འཇུག་པ༌དང༌། དམ་པའི་ཐུགས་ཉིད་ཀྱིས་གསོན་དུ་འཇུག་པའི་ཕྱིར༌རོ།།
ཞལ་ཆད་གསར་པའི་གཟི༌འོད།
7 སྔོན་ཆད་རྡོའི་སྟེང་དུ་ཡི་གེ་བརྐོས་ཤིང་འཆི་བར་གཏོགས་པའི་ཞབས་ཏོག་དེ་ལ་གཟི་འོད་ཡོད་པ༌དང༌། མོ་ཤེའི་གདོང་གི་གཟི་འོད་ཉམས་བཞིན་ཡོད་ཀྱང་ད་དུང་གཟི་འོད་ཡོད༌པས། ཡེས་ར་ཨེལ་གྱི་བུ་རྒྱུད་ཀྱིས་ཁོང་གི་གདོང་ལ་མིག་གིས་ཐད་ཀར་ལྟ་མ་ནུས༌ན།
8 དམ་པའི་ཐུགས་ཉིད་ཀྱི་ཞབས་ཏོག་ལ་ལྷག་ཏུ་གཟི་འོད་ལྡན་པ་མ་ཡིན༌ནམ།
9 གལ༌ཏེ། ཉེས་ཆད་གཅོད་པའི་ཞབས་ཏོག་ལ་གཟི་འོད་ཡོད༌ན། རྣམ་པར་དག་པ་ལ་གཏོགས་པའི་ཞབས་ཏོག་ལ་དེ་བས་ཀྱང་གཟི་འོད༌ཆེའོ།།
10 སྔོན་ཆད་གཟི་འོད་ཡོད་པ་དེ་ནི་ད་ལྟའི་གཟི་འོད་ཆེན་པོ་འདིའི་དབང་གིས་གཟི་འོད་ལྡན་པར་གྱུར་པ་མིན།
11 དེ་སྔར་ཉམས་པར་གྱུར་པ་དེ་ལ་གཟི་འོད་ཡོད་ན། གཏན་དུ་བཞུགས་པ་དེ་ལ་ལྷག་ཏུ་གཟི་འོད་ལྡན་པ་ཡིན༌ནོ།།
12 དེའི་ཕྱིར། ངེད་ཅག་ལ་རེ་བ་དེ་ལྟ་བུ་ཡོད་པས་སྤོབས་པ་ཆེན་པོས༌སྨྲ་བ་ཡིན་ནོ།།
13 དེ་ནི་མོ་ཤེ་ཡིས་རང་གི་གདོང་ལ་སེང་རས་བཀབ་སྟེ་ཡེས་ར་ཨེལ་གྱི་བུ་རྒྱུད་ལ་ཉམས་པར་འགྱུར་བའི་གཟི་འོད་ཐད་ཀར་མི་མཐོང་བར་བྱས་པ་དང་མི་མཚུངས་སོ།།
14 འོན༌ཀྱང༌། དེ་དག་གི་སེམས་རྒྱུད་གྱོང་པོ་ཡིན༌ཏེ། ད་ལྟའི་བར་དུ་ཞལ་ཆད་རྙིང་པའི་གཞུང་དོན་བཀླགས་ནའང་སེང་རས་དེ་བླངས་མེད་དོ།། རྒྱུ་མཚན་ནི་སྐྱབས་མགོན་མཱ་ཤི་ཀའི་ནང་ནས་སེང་རས་དེ་ལེན་ནུས༌པའི་ཕྱིར་རོ།།
15 དེང་གི་བར་དུ་མོ་ཤེའི་མདོ་ཀློག་ཐེངས་རེ༌རེར། སེང་རས་དེས་ཡེས་ར་ཨེལ་མི་རྣམས་ཀྱི་སེམས་གཡོགས་འདུག
16 འོན༌ཀྱང༌། སུ་ཞིག་དུས་ནམ་ཞིག་ལ་གཙོ་བོའི་ཕྱོགས་སུ་འཁོར༌ན། དེའི་དུས་སུ་སེང་རས་དེ་ཡང་ལེན་ངེས༌ཡིན།
17 གཙོ་བོ་ནི་ཐུགས་ཉིད༌ཡིན། གཙོ་བོའི་ཐུགས་ཉིད་དེ་གང་དུ་བཞུགས་ན་དེ་རུ་རང་དབང་ཡོད་དོ།།
18 བདག་ཅག་ཐམས་ཅད་ཀྱིས་གདོང་མ་གཡོགས་པར་གཙོ་བོའི་གཟི་འོད་མཐོང་བ་ནི་མེ་ལོང་ལས་ཕྱིར་སྣང་བ་དང་མཚུངས༌ཤིང༌། བདག་ཅག་ཐམས་ཅད་ནི་གཙོ་བོའི་སྣང་བརྙན་དང་མཚུངས་པར་འགྱུར་བཞིན་པ༌དང༌། དེ་ནི་རིམ་བཞིན་གཟི་བརྗིད་ཀྱི་སྟེང་དུ་གཟི་བརྗིད་བསྣན་པར་འགྱུར་ཞིང་ཐུགས་ཉིད་ཡིན་པའི་གཙོ་བོ་ནས་བྱུང་ངོ་།།