ལེའུ་བཞི༌པ།
རྫ་ཆས་ནང་གི་རིན་པོ་ཆེའི༌དཔེ།
1 དེ་ལྟར་ཡིན་པས། ངེད་ཅག་ལ་ཐུགས་རྗེའི་སྒོ་ནས་ཞབས་ཏོག་བྱེད་པའི་ལས་འགན་འདི་ཐོབ་པས་དཔའ་མི་ཞུམ༌པར།
2 ལྐོག་གྱུར་དང་ངོ་ཚའི་དོན་རྣམས་སྤངས་ཤིང་གཡོ་སྒྱུ་མི་བྱེད་པ་དང་དཀོན་མཆོག་གི་བཀའ་ལའང་ལྷད་ཞུགས་སུ་མི་འཇུག༌པར། དཀོན་མཆོག་གི་བདེན་པ་ཉིད་ཁོ་ན་གསལ་པོར་བསྟན༌ཏེ། དཀོན་མཆོག་གི་སྤྱན་སྔར་རང་ཉིད་ནི་མི་ཚང་མའི་བསམ་པ་ལ་གཏོད་པར་བརྩོན་པ་ཡིན་ནོ།།
3 གལ༌ཏེ། ངེད་ཅག་གི་འཕྲིན་བཟང་བསྒྲིབས་པར་གྱུར༌ན། འཇིག་པར་འགྱུར་བའི་མི་རྣམས་ཀྱི་ཁྲོད་དུ་བསྒྲིབས༌པ་ཡིན།
4 འཇིག་རྟེན་འདིའི་ལྷ་ཡིས་དད་པ་མེད་པའི་མི་རྣམས་ཀྱི་སེམས་རྨོངས་པར་བྱས༌ཏེ། སྐྱབས་མགོན་མཱ་ཤི་ཀའི་གཟི་བརྗིད་དང་ལྡན་པའི་འཕྲིན་བཟང་གི་འོད་སྣང་ཁོ་རྣམས་ལ་འཕྲོ་རུ་མི་འཇུག༌པའི་ཕྱིར་རོ།། སྐྱབས་མགོན་མཱ་ཤི་ཀ་ནི་དཀོན་མཆོག་གི་སྣང་བརྙན་ཡིན།
5 ངེད་ཅག་གིས་རང་ཉིད་སྒྲོག་པ་མ་ཡིན༌པར། ཡེ་ཤུ་མཱ་ཤི་ཀ་ནི་གཙོ་བོ་ཡིན༌པ་དང་། སྐྱབས་མགོན་ཡེ་ཤུའི་དོན་དུ་ངེད་ཅག་ནི་ཁྱོད་རྣམས་ཀྱི་གཡོག་པོ་ཡིན་པ་སྒྲོག༌པ་ཡིན།
6 ཡེ་ཤུ་མཱ་ཤི་ཀའི་ཞལ་རས་ནས་མངོན་པའི་དཀོན་མཆོག་གི་གཟི་འོད་དེ་བདག་ཅག་ལ་ཤེས་སུ་འཇུག་པའི་ཕྱིར། མུན་པའི་ཁྲོད་ནས་འོད་སྤྲོ་བར་བཀའ་གནང་མཁན་དཀོན་མཆོག་ནི་བདག་ཅག་གི་སེམས་ནང་དུ་འཕྲོས༌སོ༎
7 འོན་ཀྱང་། དཔག་ཏུ་མེད་པའི་ནུས་མཐུ་ནི་དཀོན་མཆོག་ནས་བྱུང་བ་ལས་བདག་ཅག་ལས་བྱུང་བ་མ་ཡིན༌པའི་དོན་དེ་མངོན་པའི་ཕྱིར། བདག་ཅག་གི་ནོར་བུ་འདི་ནི་རྫ་ཆས་ནང་དུ་བཞག་ཡོད༌པ་ཡིན༌ནོ།།
8 ངེད་ཅག་ལ་ཕྱོགས་བཞི་ནས་དཀའ་སྡུག་གིས་མནན་ཡང་བཙིར་མི་ནུས་ལ། སེམས་ནི་ཅི་བྱ་གཏོལ་མེད་དུ་གྱུར་ནའང་བློ་མི༌ཕམ་མོ།།
9 གཉའ་གནོན་མྱངས་ཀྱང་འདོར་བ་མིན། ས་རུ་བསྒྱེལ་ཡང་འཆི་བར་གྱུར་མེད་དོ།།
10 སྐྱབས་མགོན་ཡེ་ཤུའི་ཚེ་སྲོག་ཀྱང་ངེད་ཅག་གི་སྟེང་དུ་གསལ་པོར་མངོན་པར་བྱེད༌པའི་ཕྱིར། ངེད་ཅག་གིས་རྟག་ཏུ་སྐྱབས་མགོན་ཡེ་ཤུ་སྐུ་གྲོངས་པའི་དོན་དེ་ལུས་ལ་འཁུར༌བ་ཡིན།
11 ཡང་ཁོང་ཉིད་ཀྱི་ཚེ་སྲོག་དེ་ངེད་ཅག་གི་འཆི་བར་འགྱུར་བའི་ལུས་སྟེང་ནས་གསལ་པོར་མངོན་པའི་ཕྱིར། ངེད་ཅག་གསོན་པོར་གནས༌ཀྱང༌། རྟག་ཏུ་སྐྱབས་མགོན་ཡེ་ཤུའི་དོན་དུ་འཆི་ལམ་ལ་བརྫངས༌པ་ཡིན་ནོ།།
12 དེའི༌ཕྱིར། འཆི་བས་ངེད་ཅག་གི་ནང་དུ་ལས་བྱེད་ཀྱང༌། ཚེ་སྲོག་གིས་ཁྱོད་ཅག་གི་ནང་དུ་ལས་བྱེད་དོ།།
13 འོན༌ཀྱང༌། ངེད་ཅག་ལ་དད་སེམས་ཡོད༌དེ། གསུང་རབ་ཀྱི་མདོ་ལས་ཇི་སྐད༌དུ། བདག་གིས་དད་པ་བྱེད་པས་གཏམ་འདི་ལྟར་སྨྲས་པ་ཡིན་ཞེས་གསུངས་པ༌བཞིན། ངེད་ཅག་ལའང་དད་པའི་སེམས་དང་ལྡན་པས་གཏམ༌སྨྲ་བ་ཡིན་ནོ།།
14 སྐྱབས་མགོན་ཡེ་ཤུ་སླར་གསོན་པར་མཛད་མཁན་གྱིས་བདག་ཅག་ཀྱང་སྐྱབས་མགོན་ཡེ་ཤུ་དང་མཉམ་དུ་སླར་གསོན་པར་མཛད་ངེས་པར་མ༌ཟད། ངེད་ཅག་དང་ཁྱོད་རྣམས་ལྷན་དུ་ཁོང་གི་སྤྱན་སྔར་མཉམ་དུ་སྡོད་པར་མཛད་ངེས་པའང་བདག་ཅག་གིས་ཤེས་སོ།།
15 ཐུགས་རྗེས་མི་གྲངས་ཇེ་མང་དུ་སོང་བ་དང་བསྟུན༌ནས། ལྷག་ཏུ་བཀའ་དྲིན་ཞུ་མཁན་མང་དུ་མངོན་ཞིང་དཀོན་མཆོག་ལ་བསྟོད་བསྔགས་འབུལ་བར་འགྱུར་བའི་ཕྱིར། དོན་ཐམས་ཅད་ཁྱོད་ཅག་གི་ཆེད་དུ་ཡིན༌ནོ།།
16 དེའི༌ཕྱིར། བདག་ཅག་དཔའ་མི་ཞུམ་ལ། ཕྱིའི་ལུས་པོ་རླག་དང་བརླག་པར་འགྱུར་ནའང་ནང་སེམས་ནི་ཉིན་རེ་བཞིན་གསར་དུ་སྒྱུར་བ་ཡིན་ནོ།།
17 བདག་ཅག་གི་ཡུད་ཙམ་གྱི་སྡུག་བསྔལ་ཆུང་ངུ་འདིས་བདག་ཅག་ལ་བླ་ན་མེད་པ་དང་མཐའ་ཡས་པའི་གཟི་བརྗིད་འཐོབ་པར་བྱེད།
18 མིག་གིས་མཐོང་བ་དག་ནི་གནས་སྐབས་ཙམ་དང་མི་མཐོང་བ་དག་ནི་གཏན་དུ་གནས༌པས། བདག་ཅག་གིས་མིག་གིས་མཐོང་བ་དག་ལ་མི་བལྟ་བར་མིག་གིས་མི་མཐོང་བ་དག་ལ་བལྟ༌བར་བྱའོ།།