ལེའུ་གསུམ་པ།
བྱ་བ་ཐམས་ཅད་ལ་དུས་ཤིག་ཡོད་པ།
1 བྱ་བ་ཀུན་ལ་དུས་ཤིག་ཡོད་པ་དང་། ། གནམ་འོག་དོན་རེར་དུས་ཤིག་ཡོད་པ་སྟེ། །
2 སྐྱེ་བའི་དུས་ཤིག་འཆི་བའི་དུས་ཤིག་ཡོད། ། འཛུགས་པའི་དུས་ཤིག་འབལ་བའི་དུས་ཤིག་ཡོད།
3 གསོད་པའི་དུས་ཤིག་གསོ་བའི་དུས་ཤིག་ཡོད། ། བཤིག་པའི་དུས་ཤིག་བསྐྲུན་པའི་དུས་ཤིག་ཡོད། །
4 ངུ་བའི་དུས་ཤིག་དགོད་པའི་དུས་ཤིག་ཡོད། ། མྱ་ངན་དུས་ཤིག་གར་རྩེད་དུས་ཤིག་ཡོད། །
5 རྡོ་བ་འཕེན་པའི་དུས་ཤིག་ཡོད་པ་དང་། ། རྡོ་བ་སྤུང་བའི་དུས་ཤིག་ཀྱང་ནི་ཡོད། ། འཐམ་པའི་དུས་ཤིག་མི་འཐམ་དུས་ཤིག་ཡོད། །
6 འཚོལ་བའི་དུས་ཤིག་སྤང་བའི་དུས་ཤིག་ཡོད། ། འཇོག་པའི་དུས་ཤིག་འཕེན་པའི་དུས་ཤིག་ཡོད། །
7 དབྲལ་བའི་དུས་ཤིག་འཚེམ་པའི་དུས་ཤིག་ཡོད། ། ཁ་ཁུ་སིམ་པོར་སྡོད་པའི་དུས་ཤིག་དང་། ། ངག་ནས་སྐད་ཆ་སྨྲ་བའི་དུས་ཤིག་ཡོད། །
8 བརྩེ་བའི་དུས་ཤིག་སྡང་བའི་དུས་ཤིག་ཡོད། ། འཐབ་མོའི་དུས་ཤིག་ཞི་བདེའི་དུས་ཤིག་ཡོད། །
9 དེས་ན་ལས་ཀ་བྱེད་པའི་མི་ལ་རང་གི་དཀའ་ལས་ཀྱི་ནང་ནས་ཕན་ཐོགས་ཅི་ཞིག་འཐོབ་བམ།
10 དཀོན་མཆོག་གིས་མི་རྣམས་ལ་ལས་ཀ་གནང་སྟེ་ཁོ་ཚོ་དེ་ལ་བྲེལ་བ་ངས་མཐོང་བྱུང་ངོ་། །
11 དཀོན་མཆོག་གིས་ཐམས་ཅད་བཀོད་པ་དང་། ཁོང་ཉིད་ཀྱི་དུས་སུ་དངོས་པོ་ཐམས་ཅད་མཛེས་པར་བཀོད་ཅིང་། ཐོག་མཐའ་མེད་པའི་འདུ་ཤེས་ཀྱང་དེ་དག་གི་སེམས་སུ་བཞག་པར་མཛད་ནའང་། དཀོན་མཆོག་གི་ཐོག་མཐའ་བར་གསུམ་གྱི་མཛད་པ་ནི་མི་རྣམས་ཀྱིས་རྟོགས་མི་ནུས་སོ། །
12 མི་རྣམས་ཚེ་གང་པོར་དགའ་ཞིང་དགེ་བ་སྒྲུབ་པ་ལས་ལྷག་པ་ཞིག་མེད་པ་ངས་རྟོགས་བྱུང་།
13 མི་རྣམས་ཀྱིས་བཟའ་བཏུང་སྤྱོད་པ་དང་། རང་གི་དཀའ་ལས་ཐམས་ཅད་ཀྱི་འབྲས་བུ་ལོངས་སུ་སྤྱོད་པ་ནི་དཀོན་མཆོག་གི་གནང་སྦྱིན་ལགས་སོ། །
14 དཀོན་མཆོག་གིས་ཅི་མཛད་ཐམས་ཅད་རྟག་ཏུ་གནས་ཏེ། དེའི་ནང་དུ་ཅི་ཡང་བསྣོན་པར་མི་ནུས་ལ་ཅི་ཡང་འཕྲི་བར་མི་འཇོན། དེ་ནི་མི་རྣམས་དཀོན་མཆོག་ལ་གུས་ཤིང་འཇིགས་པའི་ཆེད་དུ་ཁོང་གིས་དེ་བཞིན་བསྒྲུབས་པ་ངས་རྟོགས་བྱུང་།
15 ད་ལྟ་ཡོད་པ་དེ་སྔར་ནས་བྱུང་ཟིན་པ་དང་། འབྱུང་འགྱུར་གྱི་དོན་རྣམས་ཀྱང་སྔར་ནས་བྱུང་བ་ཡིན་ཏེ། དཀོན་མཆོག་གིས་འདས་ཟིན་རྣམས་ཡང་བསྐྱར་འབྱུང་བར་མཛད་དོ། །
འཇིག་རྟེན་འདྲ་མཉམ་མིན་པ།
16 ཡང་དེར་མ་ཟད་ངས་ཉི་མའི་འོག་ཏུ་ཁྲིམས་ཐག་གཅོད་སར་གཡོ་སྒྱུ་ལྡན་པ་དང་། དྲང་བདེན་ཡིན་སར་གཡོ་སྒྱུ་ཡོད་པའང་རྟོགས་བྱུང་།
17 ངས་རང་གི་སེམས་སུ། བྱ་བ་རེ་རེ་དང་ལས་དོན་ཐམས་ཅད་ལ་དུས་ཤིག་ཡོད་པས། དཀོན་མཆོག་གིས་མི་དྲང་བདེན་དང་མི་ངན་པ་གཉིས་ལ་ལེགས་ཉེས་འབྱེད་པར་འགྱུར་སྙམ་དུ་བསམས་བྱུང་།
18 ཡང་ངས་རང་གི་སེམས་སུ། འཇིག་རྟེན་མི་བུ་རྣམས་ལ་མཚོན་ན་དཀོན་མཆོག་གིས་དེ་དག་ལ་བརྟག་པར་མཛད་ཅིང་། མི་རྣམས་ལ་རང་ཉིད་ནི་དུད་འགྲོ་ལྟ་བུ་ཡིན་པ་རྟོགས་སུ་འཇུག་སྙམ་པ་ཡིན།
19 ཅི་ལ་ཞེ་ན། མི་བུ་རྣམས་ལ་བྱུང་བ་དེ་རྣམས་དུད་འགྲོ་ལའང་འབྱུང་ལ། དེ་གཉིས་ཀའི་སྔོན་ལས་ནི་གཅིག་ཡིན་ཏེ། འདི་ཅི་ལྟར་འཆི་བ་ཡིན་ན་དེ་ཡང་དེ་ལྟར་དུ་འཆི་བ་ཡིན། དེ་གཉིས་ཀྱིས་དབུགས་ལེན་པའང་གཅིག་ཡིན་པས། མི་ནི་དུད་འགྲོ་ལས་རྩ་ཆེན་མ་ཡིན་ལ་ཐམས་ཅད་སྟོང་པ་ཡིན།
20 ཐམས་ཅད་གནས་གཅིག་ཏུ་འགྲོ་བ་སྟེ། ཐམས་ཅད་ས་རྡུལ་ལས་བྱུང་ཞིང་། ཐམས་ཅད་སླར་ཡང་ས་རྡུལ་དུ་འགྱུར་བ་ཡིན།
21 མི་ཡི་རྣམ་ཤེས་ཡར་འཕག་པ་དང་། དུད་འགྲོའི་རྣམ་ཤེས་ནི་མར་ལྷུང་བ་སུ་ཡིས་ཤེས་སམ།
22 དེ་བས། མི་ལ་རང་གི་ལས་རྣམས་ནས་དགའ་སྤྲོ་ཐོབ་པ་ལས་ལྷག་པ་ཞིག་མེད་པ་ངས་མཐོང་བྱུང་། དེ་ནི་ཁོའི་ཐོབ་སྐལ་ཡིན་པས་སོ། །སུ་ཞིག་གིས་ཁོའི་རྗེས་སུ་འབྱུང་བ་དེ་ཁོ་ལ་སྟོན་ནུས་སམ།