ལེའུ་བཞི་པ།
གཉའ་གནོན་དང་དཀའ་ལས། གྲོགས་མེད་ཁེར་རྐྱང་བཅས་པ།
1 ཡང་ཉི་མའི་འོག་ཏུ་གཉའ་གནོན་གྱི་བྱ་བ་རྣམས་བྱུང་བ་ངས་མཐོང་སོང་། གཉའ་གནོན་ཐེབས་མཁན་རྣམས་ངུས་ཀྱང་སེམས་གསོ་བྱེད་མཁན་སུ་ཡང་མེད་དེ། དེ་དག་ལ་གཉའ་གནོན་བྱེད་མཁན་རྣམས་དབང་ཆེ་བས། དེ་དག་ལ་སེམས་གསོ་བྱེད་མཁན་མེད་དོ། །
2 དེ་བས། ངས་ད་ལྟ་གསོན་པོར་གནས་པའི་གསོན་པོ་རྣམས་ལས་སྔར་ནས་འདས་ཟིན་པའི་གཤིན་པོ་རྣམས་ལ་ལྷག་པར་བསྟོད་པ་ཡིན།
3 འོན་ཀྱང་དེ་གཉིས་ཀ་ལས་ཀྱང་། ཉི་མའི་འོག་ཏུ་བྱས་པའི་ལས་ངན་པ་མ་མཐོང་བའི་ད་དུང་སྐྱེས་མེད་པ་དག་ནི་སྐྱིད་པར་བསམས།
4 མི་རྣམས་ཀྱིས་སྤྱད་པའི་དཀའ་བ་དང་གྲུབ་འབྲས་ཐམས་ཅད་ཀྱང་ཕན་ཚུན་བར་གྱི་ཕྲག་དོག་ལས་བྱུང་བ་ངས་མཐོང་བྱུང་། འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་མོ། །
5 བླུན་པོས་ལག་པར་ལག་པ་རུམ་ནས་རང་ཤ་རང་གིས་ཟ་བ་ཡིན།
6 དཀའ་ལས་ངང་རླུང་ལ་ཞགས་པ་འཕེན་པའི་སྤར་བ་གཉིས་ལས། སེམས་ལྷོད་པོའི་སྤར་བ་གང་དེ་ལེགས་སོ། །
7 དེ་ནས་ངས་སླར་ཡང་ཉི་མའི་འོག་གི་སྙིང་པོ་མེད་པའི་དོན་ཞིག་མཐོང་བ་ནི།
8 མི་ལ་ལ་གྲོགས་མེད་ཁེར་རྐྱང་ཡིན་ལ། བུ་ཡང་མེད། སྤུན་ཟླ་ཡང་མེད། འོན་ཀྱང་དེའི་འབད་བརྩོན་ལ་རྫོགས་མཐའ་མེད་ཅིང་། དེའི་མིག་ཟུང་ཡང་ནོར་གྱིས་མི་ཚིམ། དེ་ན་རེ། ངས་དཀའ་ལས་ཡོད་ཚད་སུའི་དོན་དུ་བྱེད་ཅིང་། ཅི་ལ་རང་གི་སེམས་བདེ་བ་ལས་འབྲལ་བར་བྱེད་དམ་ཟེར། འདི་ཡང་སྟོང་པ་ཡིན་ལ་ཁུར་བོ་ཤིན་ཏུ་ལྗིད་པོ་ཡིན་ནོ། །
9 མི་ཁེར་རྐྱང་ལས་མི་གཉིས་ཡིན་ན་དགའ། གང་ལ་ཞེ་ན། དེ་དག་ལ་དཀའ་ལས་ཀྱི་རྔན་པ་ལེགས་པར་འཐོབ་སྟེ།
10 གཅིག་འགྱེལ་ན་གཞན་དེས་རང་གི་གྲོགས་པོ་སློང་བར་བྱ། འོན་ཀྱང་གཅིག་པུ་ཡིན་པ་དེ་འགྱེལ་ན། ཁོ་རང་སློང་མཁན་མེད་པས་མི་དེར་ཆག་སྒོ་ཡིན་ནོ། །
11 ཡང་མི་གཉིས་མཉམ་དུ་ཉལ་ན་དྲོན་པོ་ཡིན་མོད། འོན་ཀྱང་མི་ཁེར་རྐྱང་ནི་ཅི་ལྟར་དྲོ་བར་འགྱུར།
12 ཡང་མི་ཁེར་རྐྱང་ནི་དགྲ་ངོར་འཕམ་ཞིང་མི་གཉིས་ཀྱིས་ཐུབ་པར་འགྱུར། ཐག་པ་སུམ་རྐྱ་ནི་མྱུར་དུ་མི་ཆད།
13 ཞལ་གདམས་ལ་མི་ཉན་པའི་རྒྱལ་པོ་བླུན་པོ་ཞིག་ལས། ན་གཞོན་དབུལ་པོ་མཁས་པ་ཞིག་ལེགས།
14 ན་གཞོན་དེ་ནི་རྒྱལ་སྲིད་ཀྱི་ནང་དུ་དབུལ་པོར་སྐྱེས་པ་དང་། བཙོན་ར་ནས་ཐོན་ཏེ་རྒྱལ་སྲིད་འཛིན་དུ་འོངས་པའོ། །
15 ཡང་ཉི་མའི་འོག་ཏུ་གསོན་པོར་གནས་པ་ཐམས་ཅད་རྒྱལ་པོ་རྒན་པ་དེའི་ཚབ་ཏུ་རྒྱལ་སྲིད་འཛིན་དུ་འོངས་པའི་ན་གཞོན་དེའི་རྗེས་སུ་འབྲངས་ནས།
16 ཁོས་སྐྱོང་བའི་མི་རྣམས་ཏེ་འབངས་མི་ཐམས་ཅད་བགྲང་ལས་འདས་ཀྱང་། དེའི་རྗེས་སུ་ཐོན་པ་རྣམས་དེ་ལ་ཡང་དགའ་བར་མ་གྱུར་པས། འདི་ཡང་སྟོང་པ་ཡིན་པ་དང་རླུང་ལ་ཞགས་པ་འཕེན་པ་ཙམ་མོ། །