ལེའུ་ལྔ་པ།
རང་དགར་རེ་བ་བསྐང་མི་རུང་།
1 ཁྱོད་རང་དཀོན་མཆོག་གི་མཆོད་ཁང་དུ་འགྲོ་དུས་སུ་རང་གི་གོམ་སྟབས་ལ་གཟབ་གཟབ་གྱིས་ཤིག ཉེ་སར་བཏུད་ནས་དཀོན་མཆོག་གི་བཀའ་ལ་ཉན་པ་ནི་བླུན་པོ་ཞིག་གིས་སྦྱིན་སྲེག་འབུལ་བ་ལས་ལེགས་ཏེ། ཁོ་ཚོས་རང་གིས་ལས་ངན་པ་བྱས་པའང་མི་ཤེས་སོ། །
2 དཀོན་མཆོག་གི་དྲུང་དུ་ཁྱོད་བབ་ཅོལ་ཅན་བྱས་ནས་གཏམ་སྨྲ་བར་ཁ་མ་མགྱོགས་ཤིག གང་ལ་ཞེ་ན། དཀོན་མཆོག་ནི་ནམ་མཁར་བཞུགས་ཤིང་ཁྱོད་ས་ལ་ཡོད་པས། གཏམ་ཉུང་ཉུང་བརྗོད་པར་གྱིས་ཤིག
3 དོན་བྱ་མང་ན་རྨི་ལམ་འབྱུང་བ་དང་། སྨྲ་བརྗོད་མང་བ་བླུན་པོའི་རྟགས།
4 ནམ་ཞིག་ཁྱོད་ཀྱིས་དཀོན་མཆོག་ལ་དམ་བཅས་པ་ཡིན་ན་དེ་བསྒྲུབ་པར་དུས་འགྱང་མ་བྱེད། ཅི་ལ་ཞེ་ན། བླུན་པོ་རྣམས་ལ་ཁོང་ཐུགས་མི་མཉེས་པས། དམ་བཅའ་དེ་ཅི་ནས་ཀྱང་བསྒྲུབ་དགོས།
5 དམ་བཅས་ནས་མི་བསྒྲུབ་པ་ལས་དམ་མ་བཅས་ན་ལེགས།
6 ཁྱོད་ཀྱིས་རང་གི་སྨྲ་སྒོའི་རྐྱེན་གྱིས་རང་ཉིད་ཉེས་པར་ལྷུང་དུ་འཇུག་མི་རུང་། ཕོ་ཉའི་མདུན་དུ་ངས་མ་ཤེས་པར་དམ་བཅས་ནས་ནོར་སོང་ཞེས་མ་ཞུས་ཤིག ཁྱོད་ཀྱི་སྐད་ཀྱིས་དཀོན་མཆོག་ལ་ཐུགས་ཁྲོ་བསླངས་ནས་ཁྱོད་ཀྱི་ལག་གི་ལས་ཀ་མེད་པར་མཛད་དུ་འཇུག་དོན་ཅི་ཡོད།
7 རྨི་ལམ་མང་བ་དང་གཏམ་མང་བ་ཐམས་ཅད་སྟོང་པ་ཡིན་པས། ཁྱོད་ཀྱིས་དཀོན་མཆོག་ལ་གུས་ཤིང་འཇིགས་པར་གྱིས།
མི་ཚེ་སྟོང་པ་ཡིན་པ།
8 ཇི་སྟེ་ཁྱོད་ཀྱིས་ཡུལ་ཞིག་ཏུ་དབུལ་པོ་ལ་གཉའ་གནོན་ཐེབས་པ་དང་། ཁྲིམས་ལོག་དང་གཤགས་ལོག་བྱེད་པ་མཐོང་ན་དེར་ཧ་ལས་མི་དགོས་ཏེ། ཅིའི་ཕྱིར་ཞེ་ན། མཐོ་ཤོས་རྣམས་ལས་ཀྱང་མཐོན་པོ་ཡིན་པ་དེས་ལྟ་སྐྱོང་བྱེད་ཅིང་། དེ་དག་ལས་ཀྱང་མཐོ་བ་ཞིག་ཡོད་དོ། །
9 དེར་མ་ཟད་ས་གཞིའི་ཁེ་བཟང་ནི་ཀུན་གྱི་ཕྱིར་ཡིན་ཏེ། རྒྱལ་པོ་ཡིན་ནའང་ཞིང་གིས་དེ་ལ་ཕན་ཐོགས་སོ། །
10 དངུལ་འདོད་ཅན་ཞིག་དངུལ་གྱིས་ཆོག་པར་མི་འགྱུར། ནོར་འདོད་ཅན་ཞིག་འཕེལ་བས་ཀྱང་ཆོག་པར་མི་འགྱུར། འདི་ཡང་སྟོང་པ་ཡིན།
11 ནོར་འཕེལ་དུས་ལོངས་སྤྱོད་བྱེད་མཁན་ཡང་འཕེལ་བས། ནོར་གྱི་བདག་པོ་ལ་མིག་གིས་ལྟ་བ་ལས་ཕན་ཐོགས་ཅི་ཡོད་དམ།
12 ལས་བྱེད་མཁན་གྱིས་མང་ཉུང་ཅི་ཟ་ཡང་དེའི་གཉིད་སྐྱིད་མོད། འོན་ཀྱང་ནོར་མང་པོས་ཕྱུག་པོ་གཉིད་དུའང་མི་འཇུག་གོ །
13 ངས་ཉི་མའི་འོག་ཏུ་སེམས་སྡུག་པའི་རྐྱེན་ངན་ཆེན་པོ་ཞིག་མཐོང་སྟེ། གང་ཡིན་ཞེ་ན། རྒྱུ་ནོར་གྱིས་བདག་པོ་རང་ལ་གནོད་བསྐྱལ་ཏོ། །
14 ཁོ་ལ་གནོད་འཚེ་ཐེབས་པས་རྒྱུ་ནོར་ཟད་པ་དང་། བུ་ཞིག་སྐྱེས་ན་ཡང་དེའི་ལག་ཏུ་ཅི་ཡང་མེད་དེ།
15 གཅེར་བུར་མངལ་ནས་ཐོན་པ་ལྟར་ཕྱིར་ཡང་དེ་ལྟར་འགྲོ་བ་སྟེ། དེས་དཀའ་བ་སྤྱད་པའི་ཐོབ་བྱ་དག་ནི་ཅི་ཡང་མཉམ་དུ་འཁྱེར་མི་ནུས།
16 ཁོ་ཅི་ལྟར་འོངས་པ་དེ་ལྟར་འགྲོ་དགོས་ཏེ། ལས་དོན་གྱི་ཆེད་དུ་འབད་ཀྱང་ཁོ་ལ་ཕན་ཅི་ཐོགས། འདི་ཡང་སེམས་སྡུག་པའི་རྐྱེན་ངན་ཆེན་པོ་ཞིག་གོ །
17 དེའི་ཚེ་གང་པོ་ནི་མུན་ནག་དང་སྡུག་བསྔལ་ནང་དུ་རོལ་བ་དང་། སེམས་ཁྲལ་མང་ཞིང་ན་ཚ་ཕོག་ནས་ཁོང་ཁྲོ་ཟའོ། །
18 ངས་ལེགས་ཤིང་ཡིད་དུ་འོང་བར་མཐོང་བའི་དོན་ནི། མི་ཡིས་དཀོན་མཆོག་གིས་གནང་བའི་ཚེ་གང་པོར་བཟའ་བཏུང་སྤྱོད་པ་དང་། ཉི་མའི་འོག་ཏུ་སྤྱད་པའི་དཀའ་བ་ཐམས་ཅད་ནས་ཐོབ་པའི་འབྲས་བུ་ལོངས་སུ་སྤྱད་དེ་སྐྱིད་པོ་བྱེད་པ་དེ་ཡིན་ལ། ཅིའི་ཕྱིར་ཞེ་ན། འདི་ནི་ཁོ་ལ་ཐོབ་འོས་པ་ཡིན་ནོ། །
19 དེར་མ་ཟད། དཀོན་མཆོག་གིས་མི་ལ་ནོར་དང་ལོངས་སྤྱོད་གནང་ཞིང་། དེ་ལས་བཟའ་བ་དང་རང་གི་ཐོབ་སྐལ་བླངས་ནས་རང་གི་དཀའ་ལས་ཁྲོད་དགའ་མགུ་བྱེད་པའི་དབང་ཡང་གནང་བ་ལགས། འདི་ནི་དཀོན་མཆོག་གི་གནང་སྦྱིན་ཡིན་ནོ། །
20 དཀོན་མཆོག་གིས་དེའི་སེམས་སུ་དགའ་སྤྲོ་གནང་བས། དེས་རང་གི་ཚེ་གང་པོའི་དོན་རྣམས་མང་དུ་དྲན་པར་མི་བྱའོ། །