ལེའུ་སོ་ལྔ༌པ།
ཡ་ཀོབ་ཀྱིས་པེད་ཨེལ་གྲོང་ཁྱེར་དུ་མཆོད་ཁྲི་བཞེངས༌པ།
1 དེ་ནས་དཀོན་མཆོག་གིས་ཡ་ཀོབ་ལ་འདི་སྐད༌དུ། ཡར་ལོངས༌དང༌། པེད་ཨེལ་དུ་སོང་ནས་སྡོད༌ཅིག གནས་དེ་རུ་དཀོན་མཆོག་ལ་མཆོད་ཁྲི་ཞིག་བཞེང་བར་གྱིས། དཀོན་མཆོག་གང་ཞེ༌ན། དེ་སྔར་ཁྱོད་ནི་རང་གི་གཅེན་པོ་ཨེ་སཱབ་ལ་གཞའ་ནས་འབྲོ་བའི་དུས་སུ་ཁྱོད་ལ་མངོན་པ་དེ་ཉིད་ཡིན་ཞེས་གསུངས༌པས།
2 ཡ་ཀོབ་ཀྱིས་རང་གི་ཁྱིམ་མི་འཁོར་དང་བཅས་པ་ལ་འདི༌ལྟར། ཁྱོད་ཅག་གིས་ཁྱོད་རྣམས་ཀྱི་ཁྲོད་དུ་ཕྱི་རོལ་པའི་ལྷ་སྐུ་ཡོད་པ་ཐམས་ཅད་དོར༌ཅིག རང་ཉིད་གཙང་མར་བྱས་ནས་གྱོན་གོས་བརྗེ་བར༌གྱིས།
3 ངེད་ཅག་ལངས་ནས་ཡར་པེད་ཨེལ་དུ་འགྲོ་བར༌བྱ། བདག་གིས་གནས་དེ་རུ་དཀོན་མཆོག་ལ་མཆོད་ཁྲི་ཞིག་བཞེང་བར་བྱ༌སྟེ། གང་ཡིན་ཟེར༌ན། བདག་ལ་སྡུག་བསྔལ་བྱུང་བའི་དུས༌སུ། བདག་གིས་གསོལ་བ་བཏབ་པར་གསན་པ༌དང༌། ལམ་ལ་ཆས་པའི་སྐབས་སུ་བདག་ལ་སྐྱབས་མཛད་མཁན་དེ་ཉིད་ཡིན་ཞེས་སྨྲས༌པས།
4 ཁྱིམ་མི་འཁོར་དང་བཅས་པས་ཕྱི་རོལ་པའི་ལྷ་སྐུ་དང་རྣ་ཆ་ཐམས་ཅད་བླངས་ནས་ཡ་ཀོབ་ལ་སྤྲད་པ༌དང༌། ཁོས་ཀྱང་དངོས་པོ་དེ་རྣམས་སི་ཀེམ་གྱི་བེ་ཤིང་གི་རྩར་སྦས༌སོ།།
5 དེ་ནས་ཁོ་རྣམས་ཡར་ལངས་ནས་ལམ་ལ་ཆས༌སྐབས། དཀོན་མཆོག་གིས་ཉེ་འཁོར་གྱི་གྲོང་ཁྱེར་དེ་དག་གི་མི་རྣམས་ལ་འཇིགས་སྣང་བསྐུལ༌བས། མི་དེ་རྣམས་ཡ་ཀོབ་ཀྱི་བུ་རྣམས་ཀྱི་རྗེས་སུ་སྙེག་མ་ནུས༌སོ།།
6 དེའི༌ཕྱིར། ཡ་ཀོབ་འཁོར་དང་བཅས་པ་ཀ་ན་ཨན་ཡུལ་གྱི་ལོ་ཟི་གྲོང་ཁྱེར་ཏེ་པེད་ཨེལ་དུ་སླེབས་སོ། །
7 དེ་ནས་ཡ་ཀོབ་ཀྱིས་གནས་དེ་རུ་མཆོད་ཁྲི་ཞིག་བཞེངས༌པ་དང་། ཡུལ་དེའི་མིང་ལ་ཨེལ་པེད་ཨེལ་ ཞེས་བཏགས༌སོ། །ཅིའི་ཕྱིར་ཞེ༌ན། ཡ་ཀོབ་རང་གི་གཅེན་པོ་ལ་གཞའ་ནས་འབྲོ་བའི་དུས༌སུ། དཀོན་མཆོག་གནས་དེ་རུ་ཁོ་ལ་མངོན་པར་མཛད་པའི་ཕྱིར༌རོ།།
8 དེ་ཡང་རིབ་ཀཱའི་ནུ་ཞོ་མ་ཚབ་སྟེ་དི་བོ་རཱ་ཚེ་ལས་འདས༌ཤིང༌། པེད་ཨེལ་སྨད་ཕྱོགས་ཀྱི་བེ་ཤིང་གི་རྩར་དུར་དུ་སྦས་པ༌དང༌། བེ་ཤིང་དེའི་མིང་ལ་ཨ་ལུན་པཱ་ཀུད་ ཅེས་བཏགས༌སོ།།
9 དེ་ནས་ཡ་ཀོབ་ཁོ་རང་ཕཱ་དན་ཨ་རམ་ཡུལ་ནས་ཐོན་པ༌དང༌། ཡང་དཀོན་མཆོག་གིས་ཁོ་ལ་མངོན་པར་མཛད་ཅིང་བྱིན་རླབས་གནང་སྟེ་འདི་སྐད༌དུ།
10 ཁྱོད་ཀྱི་མིང་དངོས་ལ་ཡ་ཀོབ་ཅེས་ཟེར༌ཞིང༌། ད་ནས་བཟུང་ཡ་ཀོབ་ཅེས་མི་འབོད་པར་ཡེས་ར་ཨེལ་ཞེས་འབོད་དགོས་ཞེས་གསུངས་པ་དང་ཡ་ཀོབ་ཀྱི་མིང་ལ་ཡེས་ར་ཨེལ་ཞེས༌བཏགས།
11 ཡང་དཀོན་མཆོག་གིས་ཡ་ཀོབ་ལ་འདི་སྐད༌དུ། བདག་ནི་ཀུན་དབང་དཀོན་མཆོག༌ཡིན། ཁྱོད་ཀྱིས་རྒྱུད་དང་ལྡན་པར་གྱུར་ནས་མང་པོར་སྤེལ་བར༌བྱའོ། །ཁྱོད་ལས་རྒྱལ་ཁབ་ཅིག་དང་མི་རིགས་མང་དུ་འབྱུང༌ཞིང༌། ཁྱོད་རང་བརྒྱུད་ནས་རྒྱལ་པོ་རྣམས་ཀྱང་འབྱུང་བར་འགྱུར༌རོ།།
12 བདག་གིས་ཨབ་ར་ཧམ་དང་ཨི་སཱག་ལ་སྤྲད་པའི་ས་ཆ་དེ་ཁྱོད་དང་ཁྱོད་ཀྱི་རིགས་རྒྱུད་ཕྱི་མ་དག་ལ་སྦྱིན་པར་བྱ་ཞེས་གསུངས་པ༌དང༌།
13 དཀོན་མཆོག་ནི་ཡ་ཀོབ་དང་གསུང་མོལ་མཛད་པའི་གནས་དེ་ནས་ནམ་མཁའི་ཞིང་ཁམས་སུ་འཕགས༌སོ།།
14 དེ་ནས་ཡ་ཀོབ་ཀྱིས་གནས་དེ་རུ་རྡོའི་ཀ་བ་ཞིག་གྱེན་དུ་བསྒྲེངས༌ཤིང༌། དེའི་སྟེང་དུ་རྒུན་ཆང་དང་སྣུམ་བླུགས་ནས་མཆོད་པ་ཕུལ་བ༌དང༌།
15 གནས་དེའི་མིང་ལ་པེད་ཨེལ་ཞེས་བཏགས༌སོ།།
རཱ་ཧེལ་ཚེ་ལས་འདས༌པ།
16 དེ་ནས་ཁོ་རྣམས་པེད་ཨེལ་ཡུལ་ནས་ལམ་ལ་ཆས་ཤིང་ཨེབ་རཱད་གྲོང་རྡལ་དང་ཉེ་བའི་ལམ་བར༌དུ། རཱ་ཧེལ་ལ་ཕྲུ་གུ་བཙའ་རན་ཞིང་ཟུག་གཟེར་ཆེན་པོ༌ལངས།
17 དེ་ལྟར་ཟུག་གཟེར་ཆེན་པོ་ལངས་པའི་དུས༌སུ། སྐྱེ་གཡོག་མ་ན༌རེ། ཁྱོད་རང་འཇིགས་མི༌དགོས། ཁྱོད་ལ་ཡང་བུ་ཞིག་སྐྱེས་པ་རེད་ཅེས་སྨྲས་པ༌དང༌།
18 རཱ་ཧེལ་འཆི་ལ་ཉེ་ཞིང་ཁོ་མོའི་ཚེ་འཕོ་བར་རྩོམ་པའི་དུས༌སུ། ཁོ་མོས་རང་གི་བུའི་མིང་ལ་པེན་ཨོ་ནེ་ ཞེས་བཏགས་ནའང་ཡ་ཀོབ་ཀྱིས་རང་གི་བུའི་མིང་ལ་པེན་ཡཱ་མེན་ཞེས་བཏགས༌སོ།།
19 དེ་ལྟར་རཱ་ཧེལ་ཚེ་ལས་འདས་ཤིང་ཨེབ་རཱད་ཀྱི་ལམ་འགྲམ་དུ་དུར་ལ་སྦས་པ༌དང༌། ཨེབ་རཱད་ཅེས་པ་པེད་ལེ་ཧེམ་གྲོང་རྡལ་ཡིན༌ནོ།།
20 ཡ་ཀོབ་ཀྱིས་ཁོ་མོའི་དུར་སའི་སྟེང་དུ་རྡོ་རིང་ཞིག་བཙུགས་པ༌དང༌། དེ་ནི་རཱ་ཧེལ་གྱི་དུར་རྟགས་ཡིན་ཏེ་ད་ལྟའི་བར་དུ་གནས་ཡོད་པ༌ཡིན།
21 དེ་ནས་ཡེས་ར་ཨེལ་ལམ་ལ་ཆས་ཤིང་ཨེ་དེར་མཁར་རྫོང་གི་ཕ་རོལ་ཏུ་སླེབས་ནས་གུར་ཕུབ་པ༌དང༌།
22 ཡེས་ར་ཨེལ་གནས་དེར་སྡོད་པའི་དུས༌སུ། རུ་བེན་ནི་ཕ་ཡི་ཆུན་མ་པིལ་ཧ་ཞེས་པ་དང་ལུས་འབྲེལ་བྱས་ཤིང་དོན་དེ་ཡེས་ར་ཨེལ་གྱིས་ཀྱང་ཐོས༌སོ།།
དེ་ཡང་ཡ་ཀོབ་ལ་བུ་བཅུ་གཉིས་ཡོད་པ་གཤམ་གསལ༌ལྟར།
23 ལེ་ཨ་ཡིས་བཙས་པའི་བུ་རྣམས་ནི་ཡ་ཀོབ་ཀྱི་བུ་སྐྱེས་འགོ་རུ་བེན༌དང༌། གཞན་ཡང་སི་མུ་ཨོན༌དང༌། ལེ༌ཝི། ཡ་ཧུ༌དཱ། ཡེས་སི༌ཀཱར། ཟེ་བུ་ལུན་བཅས་དྲུག༌གོ །
24 རཱ་ཧེལ་གྱིས་བཙས་པའི་བུ་ནི་ཡོ་སེབ་དང་པེན་ཡཱ་མེན་གཉིས༌སོ།།
25 རཱ་ཧེལ་གྱི་གཡོག་མོ་པིལ་ཧ་ཡིས་བཙས་པའི་བུ་ནི་དཱན་དང་ནཱབ་ཐ་ལི་གཉིས༌སོ།།
26 ལེ་ཨའི་གཡོག་མོ་ཟིལ་པཱ་ཡིས་བཙས་པའི་བུ་ནི་གཱ་རྡུ་དང་ཨ་ཤེར་གཉིས༌སོ། །བུ་དེ་དག་ནི་ཡ་ཀོབ་ཁོ་རང་ཕཱ་དན་ཨ་རམ་ཡུལ་དུ་ཡོད་པའི་དུས་སུ་སྐྱེས༌པའོ།།
27 དེ་ནས་ཡ་ཀོབ་རང་གི་ཕ་ཨི་སཱག་གི་དྲུང་དུ་སླེབས་པ༌དང༌། ཕ་ཡི་ཡུལ་ནི་ཀིར་ཡཱད་ཨར་པཱ་དང་བར་ཐག་ཉེ་བའི་མཱན་རེའེ་ཞེས་པའི་ཡུལ༌ཏེ། ཨབ་ར་ཧམ་དང་ཨི་སཱག་གི་སྡོད་གནས་ཀྱང་ཡིན༌ལ། ཀིར་ཡཱད་ཨར་པཱ་ཞེས་པར་ཧེབ་རོན་ཞེས་ཀྱང་ཟེར༌རོ།།
ཨི་སཱག་ཚེ་ལས་འདས༌པ།
28 དེ་ཡང་ཨི་སཱག་དགུང་ལོ་བརྒྱ་དང་བརྒྱད་ཅུར་བཞུགས༌ཤིང༌།
29 ཨི་སཱག་ལོ་ན་རྒས་ཤིང་ཚེ་ལོ་མཐར་ཕྱིན་ཏེ་ཚེ་ལས་འདས་པ་དང་མེས་པོ་རྣམས་ཀྱི་དྲུང་དུ་འཛོམས་པར་གྱུར༌ལ། ཨི་སཱག་གི་བུ་ཨེ་སཱབ་དང་ཡ་ཀོབ་གཉིས་ཀྱིས་ཁོའི་སྐུ་གདུང་དུར་དུ་སྦས༌སོ།།