ལེའུ་བཅུ་གཉིས༌པ།
དཀོན་མཆོག་གིས་རང་ཉིད་ཀྱི་བུ་ཕྲུག་ལ་བསླབ་བྱ་གནང་བའི༌སྐོར།
1 དེ་བས་ན་བདག་ཅག་ལ་སྤྲིན་ཕུང་གིས་མཐའ་ནས་བསྐོར་བ་ལྟ་བུའི་དཔང་པོ་འདི་འདྲ་མང་པོ་ཡོད་པས། ཁུར་པོ་ལྕི་མོ་སྣ་ཚོགས་བསྐྱུར་བ་དང་། འཁྲིལ་སླ་བའི་སྡིག་པ་རྣམས་སྤངས༌ཏེ། བཟོད་སེམས་བཅངས་ནས་མདུན་དུ་བཤམས་པའི་འགྲན་རྒྱུག་དེར་རྒྱུག་དགོས༌པ་དང་།
2 བདག་ཅག་གི་དད་པའི་འགོ་རྩོམ་མཁན་དང་དེ་ཉིད་ཡོངས་སུ་རྫོགས་པར་མཛད་མཁན་སྐྱབས་མགོན་ཡེ་ཤུ་ལ་མགོ་བོ་ཡར་བཏེགས་ནས་བལྟ་དགོས༌སོ།། ཁོང་གིས་རང་ཉིད་ཀྱི་མདུན་དུ་བཤམས་པའི་དགའ་སྤྲོའི་ཕྱིར། ངོ་ཚ་སྣང་མེད་དུ་བསྐྱུར་བ་དང་ཤིང་རྒྱ་གྲམ་གྱི་དཀའ་སྡུག་ལ་བཟོད་བསྲན་མཛད་དེ། ཁོང་ཉིད་དཀོན་མཆོག་གི་བཞུགས་ཁྲིའི་གཡས་ཕྱོགས་སུ་བཞུགས༌པ་ཡིན།
3 ཁྱོད་རྣམས་ལུས་ཐང་མི་ཆད་པ་དང་ཡིད་སེམས་མི་ཕམ་པའི་ཕྱིར། ཁོང་གིས་སྡིག་ཅན་རྣམས་ཀྱི་འགོག་རྒོལ་ལ་ཅི་ལྟར་བཟོད་བསྲན་བྱས་པར་ཁྱོད་ཅག་གིས་མནོ་བསམ་གཏོང་བར་བྱའོ།།
4 ཁྱོད་རྣམས་སྡིག་པ་དང་འཐབ་ནའང་། ཁྲག་བཞུར་བའི་བར་དུ་འགོག་དགོས་པའི་ཚད་ལ་ད་དུང་མ་སླེབས་སོ།།
5 དེ་ལ་ཇི་སྐད༌དུ།
བདག་གི་བུ་ཁྱོད་གཙོ་བོས་གཅུན་པ་ལ།།
ཁྱོད་ཀྱིས་མཐོང་ཆུང་སྣང་མེད་མ་བྱེད་ཅིག །
བཀའ་བཀྱོན་མཛད་དུས་ཡིད་སེམས་ཕམ་མི་བྱ།།
6 གཙོ་བོས་གཅེས་པ་རྣམས་ལ་གཅུན་པ་དང་།།
བུ་རུ་བརྩིས་པ་རེ་རེར་རྡེག་ཕྱིར་རོ།།
ཞེས་བུ་ལ་བསླབ་བྱ་གནང་བ་བཞིན། ཁྱོད་རྣམས་ལ་བསླབ་བྱ་གནང་བ་ཡང་ཁྱོད་ཅག་གིས་བརྗེད་ཟིན༌ཏོ།།
7 ཁྱོད་རྣམས་ཀྱིས་བཟོད་བསྲན་བྱེད་པ་ནི་གཅུན་པའི་ཕྱིར་ཡིན་ལ། དཀོན་མཆོག་གིས་ཁྱོད་རྣམས་རང་གི་བུ་བཞིན་དུ་གཅུན་པར་མཛད་པའོ།། ཕ་ཡིས་བུ་ལ་མི་གཅུན་པ་ཞིག་ག་ན་ཡོད་ཨང་།
8 མ་གཞི་བུ་ཕྲུག་ཐམས་ཅད་ལ་གཅུན་མཁན་ཡོད། གལ་ཏེ། ཁྱོད་རྣམས་ལ་གཅུན་མཁན་མེད༌ན། ཁྱོད་ཅག་ནི་བྱི་ཕྲུག་ཡིན་པ་ལས་བུ་ཕྲུག་དངོས་མིན་ནོ།།
9 གཞན་ཡང་། བདག་ཅག་ལ་གཅུན་མཁན་ལུས་སྦྱིན་གྱི་ཕ་ཡོད་ལ། བདག་ཅག་གིས་ཁོང་ལ་བརྩི་བཀུར་བྱེད༌པ་ཡིན་པས། སེམས་ཉིད་ཀྱི་ཡབ་ནི་ལྟ་ཅི་སྨོས། བདག་ཅག་གིས་ཁོང་གི་བཀའ་ལ་མཉན་ཏེ་འཚོ་བར་མི་འོས༌སམ།
10 ལུས་སྦྱིན་གྱི་ཕ་རྣམས་ཀྱིས་རང་རང་གི་འདོད་བློ་ལྟར་གནས་སྐབས་སུ་བདག་ཅག་ལ་གཅུན་པ་ཡིན༌མོད། འོན་ཀྱང་སེམས་ཉིད་ཐམས་ཅད་ཀྱི་ཡབ་ལགས་ཀྱིས་བདག་ཅག་ལ་ཕན་འདོགས་པ་དང་། ཁོང་གི་དམ་པའི་རང་བཞིན་ལས་བདག་ཅག་ལ་སྐལ་བ་ལྡན་པའི་ཕྱིར་གཅུན་པར་མཛད་པའོ།།
11 སྤྱིར་གཅུན་པའི་དོན་ཐམས་ཅད་ནི་སྐབས་དེར་སྡུག་བསྔལ་དུ་འདོད་པ་ལས་དགའ་སྤྲོའི་ཚོར་བ་མེད་མོད། འོན་ཀྱང་གཅུན་པའི་སྦྱོང་བ་ཐོབ་པ་རྣམས་ལ་ཕྱིས་སུ་ཞི་བདེའི་འབྲས་བུ་སྨིན་ཞིང་དེ་ནི་དྲང་བདེན་ཡིན་ནོ།།
12 དེའི༌ཕྱིར། ཁྱོད་རྣམས་ཀྱིས་ལག་པ་ལྷོད་ཅིང་པུས་མོའི་ཤེད་ཉམས་པ་དག་ནི་སྟོབས་དང་ལྡན་པར་གྱིས།
13 ཡང་རང་རང་གི་རྐང་པའི་དོན་དུ་ལམ་དྲང་པོར་བཟོས༌ཤིག དེ་ལྟར་བྱས་ན། རྐང་ལག་ཞ་བར་གྱུར་པ་གང་ཡིན་པ་ཚིགས་མི་བུད་པར་སོས་པར་འགྱུར༌རོ།།
དཀོན་མཆོག་འདོར་མི་རུང་བའི་ཉེན་བརྡ།
14 ཁྱོད་རྣམས་ཀྱིས་མི་ཐམས་ཅད་ལ་མཐུན་པོ་ཡོང་བ་དང་རང་ཉིད་དམ་པར་འགྱུར་བར་བསྙེག་དགོས༌ཏེ། དམ་པ་མིན་ན་གཙོ་བོ་ལ་མཇལ་ཐུབ་མཁན་གཅིག་ཀྱང་མེད༌དོ།།
15 ཡང་དཀོན་མཆོག་གི་ཐུགས་རྗེ་དང་མི་འབྲལ་བ་དང་། འཁོན་སེམས་དུག་གི་རྩ་བ་རྒྱས་ཏེ་ཁྱོད་རྣམས་དཀྲུགས་པ་བརྒྱུད་ནས་མི་མང་པོ་བཙོག་པར་མི་བྱེད་པའི་ཕྱིར་གཟབ་གཟབ་གྱིས་ཤིག
16 ལོག་གཡེམ་བྱེད་མཁན་དང་དད་གུས་མེད་པ་ཨེ་སཱབ་ལྟ་བུ་འབྱུང་བར་གཟབ་གཟབ་བྱེད་དགོས༌ཏེ། ཨེ་སཱབ་ཀྱིས་ཟས་ཐུན་གཅིག་གི་ཆེད་དུ་རང་ཉིད་ཀྱི་བུ་ཆེ་བའི་ཐོབ་ཐང་ཡང་བཙོངས་པ་ཡིན།
17 ཕྱིས་སུ་ཁོ་ལ་ཕ་ཡི་བྱིན་རླབས་འཐོབ་འདོད་ཀྱང་ཁོ་ནི་འདོར་བར་གྱུར་པ་དང་། མིག་ལས་མཆི་མ་བཞུར་གྱིན་ཞུ་བ་ཞུས་ཀྱང་ཕ་ཡི་བློ་ཁ་བསྒྱུར་བའི་ཐབས་མ་རྙེད་པ་ཁྱོད་རྣམས་ཀྱིས་ཤེས༌སོ།།
18 ཁྱོད་ཅག་ནི་རེག་ཐུབ་པའི་རི་བོ་དེར་ཡོང་བ་མ་ཡིན༌ཏེ། རི་བོ་དེར་མེ་དཔུང་དང་། སྤྲིན་ནག མུན་ནག དྲག་རླུང་།
19 དུང་སྒྲ་དང་བཀའ་གསུང་བའི་སྒྲ་བཅས་ཡོད་པ་ཡིན་ལ། གསུང་སྐད་དེ་ཐོས་པ་རྣམས་ཀྱིས་ཁོ་རྣམས་ལ་གསུང་སྐད་ཅི་ཡང་མི་གནང་བར་ཞུ་བ་ཞུས་སོ།།
20 ཅིའི་ཕྱིར་ཞེ་ན། འདི་སྐད༌དུ། རི་བོ་དེའི་འདབས་ལ་རེག་མཁན་ནི་རི་དྭགས་ཡིན་ཡང་། རྡོ་རུབ་བཏང་ནས་གསོད་པར་བྱ་ཞེས་གསུངས་པའི་བཀའ་ནི་ཁོ་རྣམས་ཀྱིས་མ་བཟོད་པའི་ཕྱིར་རོ།།
21 མིག་གིས་མཐོང་བ་དེ་ནི་འཇིགས་སུ་རུང་བ་ཞིག་ཡིན་པས། དེ་ལ་མོ་ཤེ་ཡིས་འདི་སྐད་དུ། བདག་ནི་ཤིན་ཏུ་འཇིགས་ཤིང་སྐྲག་སྟེ་འདར་བར་གྱུར་ཞེས་གསུངས་སོ།།
22 འོན་ཀྱང་། ཁྱོད་ཅག་ནི་རི་བོ་ཛ་ཡན་དང་རྟག་ཏུ་གསོན་པོར་བཞུགས་པའི་དཀོན་མཆོག་གི་གྲོང་ཁྱེར་ཏེ། ནམ་མཁའི་ཞིང་ཁམས་ཀྱི་ཡེ་རུ་སཱ་ལེམ་དུ་ཡོང་ངོ་།། གནས་དེ་རུ་ཕོ་ཉ་ཁྲི་ཕྲག་དུ་མ་ཡོད་ལ།
23 ནམ་མཁའི་ཞིང་ཁམས་སུ་མིང་ཐོ་བཀོད་ཡོད་པའི་བུ་སྐྱེས་འགོ་རྣམས་འདུས་པའི་ཆོས་ཚོགས་དང་། མི་ཐམས་ཅད་ལ་ཁྲིམས་ཐག་མཛད་མཁན་དཀོན་མཆོག་དང་། ཡོངས་སུ་རྫོགས་པར་མཛད་པའི་རྣམ་པར་དག་པ་རྣམས་ཀྱི་རྣམ་ཤེས་ཡོད་པར་མ༌ཟད།
24 ཞལ་ཆད་གསར་པའི་བར་མི་སྟེ་སྐྱབས་མགོན་ཡེ་ཤུ་དང་ཁོང་གིས་གཏོར་བའི་སྐུ་ཁྲག་ཀྱང་ཡོད༌ལ། སྐུ་ཁྲག་དེས་ཧ་བེལ་གྱི་ཁྲག་ལས་ཀྱང་ཡིད་དུ་འོང་བའི་བཀའ་གསུངས་སོ།།
25 ཁྱོད་རྣམས་ཀྱིས་རྟག་ཏུ་གཟབ་གཟབ་བྱ་དགོས་ཏེ། ཁྱོད་རྣམས་ལ་བཀའ་གསུང་མཁན་དེ་ཉིད་འདོར་མི༌རུང་ངོ་།། འཇིག་རྟེན་དུ་མི་རྣམས་ལ་ཉེན་བརྡ་གཏོང་མཁན་དེ་ཉིད་དོར་བ་ཁོ་རྣམས་ཐར་མི་ནུས་ན། ནམ་མཁའི་ཞིང་ཁམས་ནས་བདག་ཅག་ལ་ཉེན་བརྡ་གཏོང་མཁན་དེ་ཉིད་དང་འགལ་བ་ཡིན་ན་སྨྲ་ཅི་དགོས།
26 དུས་དེར་ཁོང་གི་གསུང་སྐད་ཀྱིས་ས་གཞི་གཡོས་མོད། འོན་ཀྱང་ད་ལྟ་ཁོང་གིས་འདི་སྐད༌དུ་ཞལ་བཞེས་གནང་བ་སྟེ། ད་དུང་ཐེངས་གཅིག་ལ་བདག་གིས་ས་གཞི་གཡོ་ཞིང་ནམ་མཁའ་ཡང་གཡོ་བར་བྱའོ་ཞེས་གསུངས་པ་ཡིན།
27 ད་དུང་ཐེངས་གཅིག་ལ་ཞེས་པའི་གསུང་འདིས་གཡོ་མི་ནུས་པ་རྣམས་རྟག་ཏུ་གནས་པའི༌ཕྱིར། གཡོ་བར་འགྱུར་བའི་དངོས་པོ་བསྐྲུན་པ་དེ་དག་འདོར་བར་འགྱུར་བ་གསལ་པོར་བསྟན༌ཏོ།།
28 དེའི༌ཕྱིར། བདག་ཅག་ལ་གཡོ་མི་ནུས་པའི་རྒྱལ་སྲིད་ཐོབ་པ་ཡིན་པས། བདག་ཅག་ནི་དྲིན་གཟོ་བའི་སེམས་དང་ལྡན་འོས་ཤིང༌། དཀོན་མཆོག་ཐུགས་དགྱེས་པ་བཞིན་དུ། དད་གུས་དང་འཚེར་སྣང་བཅས་ཁོང་ལ་ཞབས་ཏོག་བསྒྲུབ་འོས་སོ།།
29 ཅིའི་ཕྱིར་ཞེ་ན། བདག་ཅག་གི་དཀོན་མཆོག་ནི་ཡོངས་རྫོགས་རྩ་མེད་གཏོང་བའི་མེ་ཡིན་པའི་ཕྱིར་རོ།།