ལེའུ་བཅུ་གསུམ༌པ།
མཇུག་མཐའི་གདམས༌པ།
1 ཁྱོད་ཅག་གིས་རྟག་ཏུ་སྤུན་ཟླ་རྣམས་གཅེས་སུ་འཛིན་པའི་སེམས་བཅང༌དགོས་ཤིང་།
2 མགྲོན་པོར་སྣེ་ལེན་བྱ་རྒྱུ་བརྗེད་མི་རུང༌སྟེ། སྔོན་ཆད་མགྲོན་པོར་སྣེ་ལེན་བྱེད་མཁན་གྱིས་དེ་ལྟར་བྱས་ནས་མ་བསམ་ས་ནས་ཕོ་ཉ་རྣམས་ལའང་སྣེ་ལེན་བྱས་མྱོང་བའི་ཕྱིར་རོ།།
3 ཁྱོད་ཅག་གིས་བཙོན་དུ་བཅུག་ཡོད་པ་རྣམས་སེམས་སུ་གཟུང་འོས༌ཏེ། རང་ཉིད་ཀྱང་ཁོ་རྣམས་དང་ལྷན་དུ་བཙོན་ལ་བཅུག་ཡོད་པ་བཞིན་བྱེད༌པ་དང་། རང་ཉིད་ཀྱང་ཤ་གཟུགས་ཀྱི་ཕུང་བོའི་ནང་དུ་ཡོད་པས། མནར་གཅོད་མྱངས་པ་རྣམས་སེམས་སུ་གཟུང་འོས༌སོ།།
4 མི་ཐམས་ཅད་ཀྱིས་གཉེན་སྒྲིག་ལ་བརྩི་མཐོང་བྱ་འོས་ཤིང་། བཟའ་ཟླའི་མལ་ཁྲི་ཡང་མི་གཙང་བར་བྱ་མི༌རུང་ངོ་།། རྒྱུ་མཚན་ནི་མི་ཚངས་སྤྱོད་པ་དང་ལོག་གཡེམ་བྱེད་མཁན་ལ་དཀོན་མཆོག་གིས་ཉེས་ཆད་གཅོད་པར་འགྱུར་བའི་ཕྱིར་ཡིན།
5 ཁྱོད་རྣམས་དངུལ་ལ་ཞེན་ཆགས་མི་རུང༌སྟེ། རང་ཉིད་ལ་གང་ཡོད་པ་དེར་ཡིད་ཚིམ་པར་བྱའོ། །ཅིའི་ཕྱིར་ཞེ་ན། དཀོན་མཆོག་གིས་འདི་སྐད༌དུ།
བདག་གིས་རྒྱུན་དུ་ཁྱོད་རང་མི་འདོར་ཞིང༌།།
ནམ་ཡང་ཁྱོད་རང་བསྐྱུར་བར་མི༌བྱེད་དོ།།
ཞེས་གསུངས༌པའི་ཕྱིར་རོ།།
6 དེའི་ཕྱིར། བདག་ཅག་གིས་སྤོབས་པ་བསྐྱེད་ནས།
གཙོ་བོ་ཁོང་ཉིད་བདག་གི་སྡོངས་གྲོགས་ཡིན།།
བདག་ལ་འཇིགས་པའི་དོན༌ནི་ཡོད་མི་སྲིད།།
འཇིག་རྟེན་མི་ཡིས་བདག་ལ་ཅི་ཞིག་བྱ།།
ཞེས་སྨྲ་བར་ནུས༌སོ།།
7 ཁྱོད་ཅག་གིས་སྔོན་ཆད་ཁྱོད་རྣམས་ལ་ཁྲིད་སྟོན་གནང་བ་སྟེ་དཀོན་མཆོག་གི་བཀའ་གསུང་མཁན་རྣམས་སེམས་སུ་གཟུང་དགོས༌ཤིང༌། དེ་དག་གི་སྤྱོད་ལམ་གྱི་འབྲས་བུར་ནན་གྱིས་བལྟས་ནས། ཁོ་ཚོའི་དད་སེམས་མིག་དཔེར་གཟུང་བར་བྱའོ།།
8 ཡེ་ཤུ་མཱ་ཤི་ཀ་ནི་ཁ་སང་དེ༌རིང༌དང་ཡུན་ནས་ཡུན་དུ་འགྱུར་བ་མེད་དོ།།
9 ཁྱོད་རྣམས་ཚུལ་མིན་བསླབ་པ་སྣ་ཚོགས་ཀྱི་བསླུ་བྲིད་དབང་དུ་འགྲོ་བར་མི་བྱའོ། །ཅིའི་ཕྱིར་ཞེ་ན། མིའི་སེམས་ནི་ཐུགས་རྗེ་ལ་བརྟེན་ནས་བརྟན་པོར་གྱུར་ན་ལེགས་པ་ལས། བཟའ་བཏུང་ལ་བརྟེན་པ་མ་ཡིན་ཏེ། བཟའ་བཏུང་ཁོ་ནར་བློ་འཁོར་བ་རྣམས་ལ་ཕན་ཅི་ཡང་མ་ཐོགས་པའི་ཕྱིར་ཡིན།
10 བདག་ཅག་ལ་མཆོད་ཁྲི་ཞིག་ཡོད་ཅིང་གུར་མཆོག་གི་ཞབས་ཏོག་པ་རྣམས་ཀྱིས་དེ་ལས་བཟའ་མི་རུང་ངོ་།།
11 མ་གཞི་མཆོད་དཔོན་ཆེན་པོས་གནས་དམ་མཆོག་ནང་དུ་ཕྱུགས་ཟོག་གི་ཁྲག་ཁྱེར་ནས་སྡིག་པའི་ཆེད་དུ་འབུལ་བ༌དང༌། ཕྱུགས་ཟོག་གི་བེམ་པོ་ནི་སྒར་སའི་ཕྱི་རོལ་ཏུ་མེར་བསྲེགས་པའོ།།
12 དེའི་ཕྱིར། སྐྱབས་མགོན་ཡེ་ཤུས་རང་ཉིད་ཀྱི་སྐུ་ཁྲག་གིས་འབངས་མི་དམ་པར་མཛད་པའི་ཆེད་དུ། ཁོང་གིས་ཀྱང་མཁར་སྒོའི་ཕྱི་རོལ་ཏུ་སྡུག་བསྔལ་མྱངས་པའོ།།
13 དེ་ལྟར་བདག་ཅག་སྒར་སའི་ཕྱི་རོལ་ཏུ་ཁོང་གི་དྲུང་ལ་སོང་སྟེ། ཁོང་གིས་མྱངས་པའི་བརྙས་བཅོས་དེ་ལྟ་བུ་ལ་བཟོད་བསྲན་བྱ་འོས༌ཤིང་།
14 བདག་ཅག་ལ་གནས་འདི་རུ་རྟག་གཏན་གྱི་གྲོང་ཁྱེར་ཞིག་མེད་ནའང་། མ་འོངས་འབྱུང་འགྱུར་གྱི་གྲོང་ཁྱེར་དེ་ཉིད་འཚོལ་བའོ།།
15 དེའི་ཕྱིར། བདག་ཅག་གིས་སྐྱབས་མགོན་ཡེ་ཤུར་བརྟེན་ནས། དཀོན་མཆོག་ལ་རྟག་ཏུ་བསྟོད་བསྔགས་ཀྱི་མཆོད་པ་འབུལ་འོས༌ཤིང༌། དེ་ནི་ཁོང་གི་མཚན་ཁས་ལེན་མཁན་དག་གི་སྨྲ་སྒོའི་འབྲས་བུ་ཡིན༌ནོ།།
16 ལས་བཟང་པོ་བསྒྲུབ་པ་དང་ཕན་ཚུན་ལ་སྦྱིན་པ་གཏོང་བ་ནི་བརྗེད་པར་མི་བྱའོ།། ཅིའི་ཕྱིར་ཞེ་ན། དཀོན་མཆོག་མཆོད་པ་དེ་ལྟ་བུ་ལ་ཐུགས་དགྱེས་པའི་ཕྱིར་རོ།།
17 ཁྱོད་ཅག་གིས་ཁྲིད་སྟོན་གནང་མཁན་གྱི་ངག་ལ་མཉན་པ་དང་ཁོང་རྣམས་ཀྱི་བཀའ་ལྟར་བསྒྲུབ་དགོས༌སོ།། ཅིའི་ཕྱིར་ཞེ་ན། ཁོང་རྣམས་ཀྱིས་རྟག་ཏུ་ཁྱོད་ཅག་གི་ཚེ་སྲོག་སྲུང་བ་དང༌། དེ་རྣམས་ནི་མ་འོངས་པའི་དུས་སུ་དཀོན་མཆོག་ལ་རྩིས་སྤྲོད་མཁན་ཡིན་པས། ཁྱོད་ཅག་གིས་ཁོང་རྣམས་ལ་སེམས་ཁྲལ་མེད་པར་དགའ་སྤྲོའི་ངང་ནས་བསྲུང་དུ་བཅུག་ན་འོས་སོ།། གལ་ཏེ། ཁོང་རྣམས་ལ་སེམས་ཁྲལ་ཡོད་ན་ཁྱོད་ཅག་ལ་ཕན་ཐོགས་མེད་པའི་ཕྱིར་རོ།།
18 ངེད་ཅག་གིས་བསམ་པ་རྣམ་དག་མངའ་བའི་གདེང་ཚོད་དང་བཅས་ལས་ཐམས་ཅད་ཡང་དག་པའི་སྒོ་ནས་བསྒྲུབ་པར་འདོད་པས། ཁྱོད་རྣམས་ཀྱིས་ངེད་ཅག་གི་དོན་དུ་སྨོན་ལམ་འདེབས་པར་ཞུའོ།།
19 ང་རང་མྱུར་བ་མྱུར་བར་ཁྱོད་ཅག་གི་གམ་དུ་ཕྱིར་ཡོང་ཐུབ་པའི་ཆེད་དུ། ཁྱོད་རྣམས་ཀྱིས་བདག་གི་ཆེད་དུའང་ལྷག་ཏུ་སྨོན་ལམ་འདེབས་པར་ཞུའོ།།
20 ཞི་བདེ་གནང་མཁན་དཀོན་མཆོག་སྟེ། རྟག་གཏན་ཞལ་ཆད་ཀྱི་ཁྲག་ལ་བརྟེན་ནས་ལུག་ཁྱུའི་རྫི་བོ་ཆེན༌པོ་སྟེ། བདག་ཅག་གི་གཙོ་བོ་ཡེ་ཤུ་གཤིན་པོ་རྣམས་ལས་ཕྱིར་འདྲེན་མཁན་དཀོན་མཆོག༌གིས།
21 ཁོང་གི་ཐུགས་དགོངས་བཞིན་དུ་བསྒྲུབ་པའི་ཕྱིར། ལས་བཟང་པོ་སྣ་ཚོགས་ཀྱི་ཆ་ནས་ཁྱོད་རྣམས་སྟ་གོན་མཛད་པ༌དང༌། ཡང་ཁོང་གི་སྤྱན་སྔར་ཐུགས་དགྱེས་རུང་བའི་དོན་རྣམས་ནི་ཡེ་ཤུ་མཱ་ཤི་ཀ་བརྒྱུད་ནས་ཁྱོད་ཅག་གི་སེམས་སུ་མཛད་པར༌སྨོན། ཁོང་ལ་ཇི་སྲིད་བར་དུ་བསྟོད་བསྔགས་བརྗོད་པར་སྨོན། ཨ༌མེན།
22 སྤུན་ཟླ༌རྣམས། བདག་གིས་ཁྱོད་རྣམས་ལ་འཕྲིན་ཐུང་འདི་བྲིས་པ༌དང༌། ཁྱོད་རྣམས་ཀྱིས་བདག་གི་གདམས་པ་ཐེག་པར་སྐུལ་ལོ།།
23 ཁྱོད་རྣམས་ཀྱིས་བདག་ཅག་གི་སྤུན་ཟླ་ཐི་མོ་ཐེ་བཏང་ཟིན་པ་ཤེས་སྲིད་ལ། ཁོ་རང་མྱུར་དུ་ཡོང་བ་ཡིན་ན། ང་རང་ཡང་ཁོ་དང་ལྷན་དུ་ཁྱོད་ཅག་ལ་བལྟ་རུ་ཡོང་ངེས༌ཡིན།
24 ཁྱོད་ཅག་གིས་ཁྲིད་སྟོན་གནང་མཁན་དང་དད་ལྡན་དམ་པ་ཐམས་ཅད་ལ་འཚམས་འདྲི་ཞུ་བར་བྱའོ།། ཨི་ཏ་ལི་ཡུལ་ནས་ཡོང་བ་རྣམས་ཀྱིས་ཀྱང་ཁྱོད་ཅག་ལ་འཚམས་འདྲི༌ཞུའོ།།
25 ཐུགས་རྗེ་ནི་རྟག་ཏུ་ཁྱོད་ཅག་ཐམས་ཅད་དང་མཉམ་དུ་གནས་པར༌སྨོན།། །།