ལེའུ་གཉིས༌པ།
དོགས་ཟོན་བྱེད་དགོས་པའི༌སྐོར།
1 དེ་བས་ན་བདག་ཅག་འཁྱོག་འགྲོས་སུ་མི་འཁྱར་བའི༌ཕྱིར། གང་ཞིག་ཐོས་པ་ལ་ལྷག་ཏུ་གཟབ་ནན་གྱིས་མཉན་པར་བྱའོ།།
2 ཕོ་ཉ་བརྒྱུད་ནས་བསྒྲགས་པའི་བཀའ་དེ་ངེས་གཏན་ཡིན་ཏེ། བཀའ་དེ་དང་འགལ་ཞིང་དེར་མ་མཉན་པ་ཐམས་ཅད་ལ་འཐོབ་འོས་པའི་ལན་ཐོབ་ཟིན་ཅིང་།
3 བདག་ཅག་གིས་ཐར་པ་ཆེན་པོ་འདི་ལྟ་བུ་སྣང་མེད་དུ་བསྐྱུར༌ན། ལན་དེ་ལས་ཅི་ལྟར་ཐར་ཐུབ༌བམ། ཐར་པ་དེ་ནི་ཐོག་མར་གཙོ་བོས་དངོས་སུ་གསུངས་པ༌དང༌། ཕྱིས་སུ་ཐོས་མཁན་རྣམས་ཀྱིས་བདག་ཅག་ལ་བདེན་དཔང་བྱས༌པ་ཡིན།
4 དཀོན་མཆོག་གིས་ཀྱང་རང་གི་ཐུགས་དགོངས་བཞིན་དུ་གྲུབ་རྟགས༌དང༌། དོན་ངོ་མཚར༌ཅན། ནུས་མཐུ་སྣ༌ཚོགས། གཞན་ཡང་དམ་པའི་ཐུགས་ཉིད་ཀྱི་གནང་སྦྱིན་བཅས་ལ་བརྟེན་ནས་ཁོ་རྣམས་དང་མཉམ་དུ་བདེན་དཔང་མཛད་པ་ལགས༌སོ།།
སྐྱབས་མགོན་ཡེ་ཤུ་དང་ཁོང་གི་དད་ལྡན༌སྐོར།
5 ངེད་ཅག་གིས་གླེང་བཞིན་པའི་འབྱུང་འགྱུར་གྱི་འཇིག་རྟེན་དེ་ནི་དཀོན་མཆོག་གིས་ཕོ་ཉ་རྣམས་ལ་བདག་སྐྱོང་བྱེད་པར་སྤྲད་པ་མ་ཡིན༌མོད།
6 འོན་ཀྱང་མི་གཞན་གྱིས་མདོ་ཞིག་ལས་ལུང་དྲངས་ཤིང་བདེན་དཔང་བྱས་པ༌འདི་ལྟར།
ཀྱེ་ཀྱེ་མགོ་ནག་མི་ནི་ཅི་འདྲ༌ཙམ།།
ཁྱེད་ཀྱིས་མི་རྣམས་ཐུགས་སུ་འཛིན་དོན༌ཅི།།
ཀྱེ་ཀྱེ་འཇིག་རྟེན་མིའི་བུ་ཅི་འདྲ༌ཙམ།།
ཁྱེད་ཀྱིས་དེ་ལ་ཐུགས་ཁུར་མཛད་དོན༌ཅི།།
7 ཁྱེད་ཀྱིས་ཕོ་ཉ་ལ་ནི་བསྡུར་བ༌ན།།
ཁོང་ནི་རེ་ཞིག་ཅུང་ཙམ་དམའ་བར་མཛད།།
གཟི་བྱིན་བཀུར་སྟི་གནང་སྟེ་གཙུག་རྒྱན༌གྱུར།།
ཁྱེད་ཀྱི་ཕྱག་གིས་མཛད་པའི་དངོས་པོ༌ཀུན།།
ཁོང་ལ་དོ་དམ་བྱེད་པར༌མཛད་པ་ཡིན།།
8 དངོས་པོ་ཐམས་ཅད་ཁོང་གི་ཞབས་འོག་གནོན།།
ཞེས༌པའོ།། དངོས་པོ་ཐམས་ཅད་ཁོང་གི་ཞབས་འོག་ཏུ་གནོན་པར་མཛད་པ་ཡིན༌པས། ཁོང་གི་དབང་འོག་ཏུ་མི་འགྲོ་བ་ཅི་ཡང་ལྷག་མེད། ད་ལྟ་བདག་ཅག་གིས་དངོས་པོ་ཐམས་ཅད་ཁོང་གི་དབང་འོག་ཏུ་ཡོད་པ་མི་མཐོང༌མོད།
9 འོན་ཀྱང་སྐྱབས་མགོན་ཡེ་ཤུ་ནི་རེ་ཞིག་ཕོ་ཉ་དག་ལས་ཅུང་ཙམ་དམའ་བར་མཛད་པ༌དང༌། ཁོང་གིས་འཆི་བའི་སྡུག་བསྔལ་མྱངས་པས་གཟི་བྱིན་དང་བཀུར་སྟིའི་གཙུག་རྒྱན་ཐོབ༌ཅིང༌། དེ་ནི་དཀོན་མཆོག་གི་ཐུགས་རྗེ་ལ་བརྟེན་ནས་མི་ཐམས་ཅད་ཀྱི་དོན་དུ་འཆི་བའི་སྡུག་བསྔལ་མྱངས༌པའི་ཕྱིར་རོ།།
10 མ་གཞི་དངོས་པོ་ཐམས་ཅད་ཀྱི་ཁོངས་གཏོགས་དང་གཞི་རྩ་ཡིན་པའི་དཀོན་མཆོག་གིས་བུ་མང་པོ་ཞིག་གཟི་བརྗིད་ཀྱི་ནང་དུ་འཁྲིད་པའི༌ཕྱིར། ཁོ་རྣམས་སྐྱོབ་པའི་འགོ་དཔོན་དེ་ཉིད་ཀྱིས་སྡུག་བསྔལ་མྱངས་པ་བརྒྱུད་ནས་ཆ་ཡོངས་སུ་རྫོགས་པར་མཛད་པ་ནི་འོས་ཤིང་འཚམ༌པ་ཡིན་ནོ།།
11 མི་དམ་པར་མཛད་མཁན་སྐྱབས་མགོན་ཡེ་ཤུ་དང་དམ་པར་གྱུར་ཟིན་པ་ཐམས་ཅད་འབྱུང་ཁུངས་གཅིག་ཡིན༌པས། ཁོང་གིས་དེ་རྣམས་ལ་སྤུན་ཟླ་ཞེས་ཞལ་འབོད་གནང་བ་ནི་ངོ་གནོང་དགོས་པ་ཞིག་མིན༌ཏེ།
12 ཁོང་གིས་འདི་སྐད༌དུ།
བདག་གིས་ཁྱེད་མཚན་ང་ཡི་སྤུན་ལ༌སྒྲོག །
འདུ་ཚོགས་ནང་དུ་ཁྱེད་ལ་བསྟོད་དབྱངས༌འབུལ།།
ཞེས༌དང༌།
13 ཡང་འདི་སྐད༌དུ།
བདག་གིས་ཁོང་ཉིད་ལ་ནི་ཡིད་རྟོན༌བྱེད།།
ཅེས༌དང༌། ཡང་འདི་སྐད༌དུ།
བདག་དང་དཀོན་མཆོག་ཉིད་ཀྱིས་ང་རང་ལ།།
གནང་བའི་བུ་ཕྲུག་རྣམས་ལ༌བལྟ་བར་གྱིས།།
ཞེས་གསུངས༌པའི་ཕྱིར་རོ།།
14 དེའི༌ཕྱིར། བུ་ཕྲུག་རྣམས་ལ་ཤ་ཁྲག་གདོས་བཅས་ཀྱི་ཕུང་བོ་ཡོད་པ༌བཞིན། སྐྱབས་མགོན་ཡེ་ཤུའང་དངོས་སུ་མི་ཡི་གཟུགས་པོར་གྱུར༌ཅིང༌། དེ་ནི་འཆི་བ་བརྒྱུད་ནས་འཆི་བདག་བདུད་དེ་འཇོམས་པ༌དང༌།
15 འཆི་བར་འཇིགས་ནས་མི་ཚེ་ཧྲིལ་པོར་གཡོག་པོར་གྱུར་པ་རྣམས་དགྲོལ་བའི་ཆེད༌དུ་ཡིན།
16 ཁོང་གིས་ཕོ་ཉ་རྣམས་བསྐྱབས་པ་མ་ཡིན༌པར། ཨབ་ར་ཧམ་གྱི་རིགས་རྒྱུད་རྣམས་སྐྱོབ༌པ་ཤ་སྟག་གོ།
17 དེའི༌ཕྱིར། ཁོང་ནི་རྣམ་པ་ཀུན་ནས་རང་གི་སྤུན་ཟླ་རྣམས་དང་གཅིག་འདྲར་འགྱུར་དགོས༌ཏེ། དཀོན་མཆོག་གི་འཕྲིན་ལས་ཀྱི་ཐད་ནས་བྱམས་སྙིང་རྗེ་ཅན་དང་ཡིད་རྟོན་རུང་བའི་མཆོད་དཔོན་ཆེན་པོར་འགྱུར་བ༌དང༌། མི་རྣམས་ཀྱི་སྡིག་པའི་ཆེད་དུ་ཉེས་ཆད་བསལ་བའི་མཆོད་པ་འབུལ་བའི་ཕྱིར༌ཡིན།
18 ཁོང་ལ་ཉམས་ཚོད་ཐེབས་ནས་སྡུག་བསྔལ་མྱངས༌པས། ཁོང་གིས་ཉམས་ཚོད་མྱོང་བའི་མི་རྣམས་ཀྱང་སྐྱོབ་ནུས༌སོ།།