ལེའུ་གསུམ༌པ།
སྐྱབས་མགོན་ཡེ་ཤུ་ནི་ལུང་སྟོན་པ་མོ་ཤེ་ལས་མཆོག་ཏུ་གྱུར་པའི༌སྐོར།
1 དེ་ལྟར་ཡིན་པས། ནམ་མཁའི་ཞིང་ཁམས་ནས་ཞལ་འབོད་གཅིག་མཚུངས་ཐོབ་མཁན་གྱི་སྤུན་ཟླ་དམ་པ༌རྣམས། བདག་ཅག་གིས་སྐུ་ཚབ་པ་དང་མཆོད་དཔོན་ཆེན་པོ་རུ་ཁས་ལེན་པའི་སྐྱབས་མགོན་ཡེ་ཤུ་ལ་ཁྱོད་ཅག་གིས་བསམ་མནོ་གཏོང་བར༌གྱིས།
2 ཁོང་ཉིད་ནི་རང་ཉིད་བསྐོ་མཁན་ལ་བློ་སེམས་དཀར༌བ་དང་། དེ་ནི་མོ་ཤེ་ཁོ་རང་དཀོན་མཆོག་གི་ཁྱིམ་མི་ཡོངས་ལ་བློ་སེམས་དཀར་བ་དང་མཚུངས་སོ།།
3 ཡང་ཁོང་ཉིད་ནི་མོ་ཤེ་ལས་ཀྱང་གཟི་བརྗིད་ཆེན་པོ་འཐོབ་འོས༌ཏེ། ཁང་པ་བཟོ་མཁན་ནི་ཁང་པ་ལས་ཀྱང་བརྗིད་ཉམས་ཆེ་བ་བཞིན༌ནོ།།
4 ཅིའི་ཕྱིར་ཞེ་ན། ཁང་པ་རེ་རེར་བཟོ་མཁན་ཡོད༌མོད། འོན་ཀྱང་དངོས་པོ་ཐམས་ཅད་སྐྲུན་མཁན་ནི་དཀོན་མཆོག་ཡིན་པའི་ཕྱིར་རོ།།
5 མོ་ཤེ་ནི་དཀོན་མཆོག་གི་ཁྱིམ་གཞིས་ལ་བློ་སེམས་དཀར་བའི་ཞབས་ཕྱི་པ་ཡིན༌ལ། མ་འོངས་པའི་དུས་སུ་སྒྲོག་ངེས་པའི་དོན་དེ་ལ་བདེན་དཔང་བྱེད་པར་འགྱུར།
6 འོན་ཀྱང་སྐྱབས་མགོན་མཱ་ཤི་ཀ་ནི་དཀོན་མཆོག་གི་སྲས་ཡིན་པ་བཞིན༌དུ། དཀོན་མཆོག་གི་ཁྱིམ་གཞིས་ལ་བློ་སེམས་དཀར་པོས་བདག་སྐྱོང་མཛད་མཁན་ཡིན། བདག་ཅག་གིས་བསྟོད་པར་འོས་པའི་རེ་བ་དང་བློ་སྟོབས་དེ་ཉིད་མཐའ་འཁྱོངས་པར་བྱས༌ན། བདག་ཅག་ནི་ཁོང་གི་ཁྱིམ་གཞིས་ཡིན་ནོ།།
དད་པ་མི་བྱེད་པར་ཉེན་བརྡ་གཏོང་བ།
7 དེའི་ཕྱིར། དམ་པའི་ཐུགས་ཉིད་ཀྱིས་འདི་སྐད་དུ་གསུངས་པ༌སྟེ།
དེ་རིང་ཁྱོད་ཚོས་ཁོང་གི་བཀའ་ཐོས༌ན།།
8 དབེན་སྟོང་ཡུལ་ནས་རྒྱབ་གཏོད་བྱས་པ་དང༌།།
ཚོད་བགམ་བགྱིས་པའི་དུས་དེ་ནང་བཞིན༌དུ།།
རང་གི་སེམས་ནི་གྱོང་པོར་མ་བྱེད༌ཅིག །
9 ཁྱོད་ཅག་མེས་པོས་གནའ་བོའི་ཡུལ་དེ༌ནས།།
བགྲང་བྱ་བཞི་བཅུར་བདག་གི་འཕྲིན་ལས་མཐོང་།།
བདག་ལ་ཚོད་བགམ་བྱས་ནས་འགྲན་སློང་བགྱིས།།
10 དེའི་ཕྱིར་ང་རང་མི་རབས་དེ༌ལ་ནི།།
སུན་སྣང་བྱུང་ནས་འདི་སྐད་སྨྲས་པ༌སྟེ།།
དེ་དག་སེམས་ནི་རྟག་ཏུ་འཁྱོར་གྱུར་ནས།།
བདག་གི་སྤྱོད་ལམ་ནམ་ཡང་མི་ཤེས༌སོ།།
11 བདག་ནི་ཁོང་ཁྲོ་ལངས་ཏེ་དམ་བཅས་པ།།
ཁོ་རྣམས་བདག་གི་ངལ་གསོ་དེའི་ནང༌དུ།།
གཏན་ནས་ཞུགས་པར་མི་བྱ་ཞེས་པ་འོ།།
12 སྤུན་ཟླ༌རྣམས། ཁྱོད་ཅག་གི་ཁྲོད་དུ་སུ་ཞིག་གིས་དད་པ་མི་བྱེད་པའི་སེམས་ངན་བཅངས༌ནས། རྟག་ཏུ་གསོན་པོར་བཞུགས་པའི་དཀོན་མཆོག་དང་ཁ་མི་འབྲལ་བའི་ཕྱིར་ཁྱོད་ཅག་གིས་དོགས་ཟོན་བྱོས༌ཤིག
13 ཁྱོད་རྣམས་ལས་སུ་ཞིག་ཀྱང་སྡིག་པའི་གཡོ་འོག་ཏུ་ཚུད་ནས་སེམས་གྱོང་པོར་མི་འགྱུར་བའི༌ཕྱིར། དེ་རིང་ཟེར་བའི་ཉིན་མོ་མ་རྫོགས་པའི་བར་དུ། ཉིན་རེ་བཞིན་ཕན་ཚུན་སྐུལ་སློང་བྱེད་པར༌གྱིས།
14 ཅིའི་ཕྱིར་ཞེ་ན། བདག་ཅག་གིས་ཐོག་མར་ཐག་ཆོད་པའི་དད་སེམས་དེ་མཐའ་འཁྱོངས་ན། སྐྱབས་མགོན་མཱ་ཤི་ཀའི་ཆ་ནས་སྐལ་བ་དང་ལྡན༌པར་གྱུར་པའི་ཕྱིར་རོ།།
15 དེ་ལ་གསུང་རབ་ཀྱི་མདོ་ལས་ཇི་སྐད༌དུ།
དེ་རིང་ཁྱོད་ཚོས་ཁོང་གི་བཀའ་ཐོས༌ན།།
ཁོང་ལ་རྒྱབ་གཏོད་བྱེད་པའི་དུས་བཞིན༌དུ།།
རང་གི་སེམས་ནི་གྱོང་པོར་བྱ་མི༌རུང༌།།
ཞེས་གསུངས༌པའོ།།
16 དུས་དེར་ཁོང་གི་བཀའ་ཐོས་ཤིང་ཁོང་ལ་རྒྱབ་གཏོད་མཁན་ནི་སུ་ཞིག་ཡིན་ནམ་ཞེ༌ན། མོ་ཤེའི་རྗེས་སུ་འབྲངས་ཤིང་ཨེ་ཅིབ་ཡུལ་ནས་ཕྱིར་ཐོན་པའི་མི་ཐམས་ཅད་མ་ཡིན༌ནམ།
17 ལོ་ངོ་བཞི་བཅུའི་རིང༌ལ། དཀོན་མཆོག་ནི་མི་སུ་ཞིག་ལ་ཐུགས་སུན་སྐྱེས་སམ་ཞེ༌ན། དེ་ནི་སྡིག་ཉེས་བསགས་ཏེ་བེམ་པོ་དབེན་སྟོང་དུ་ལུས་པའི་མི་རྣམས་མ་ཡིན༌ནམ།
18 ཡང་ཁོང་གིས་མི་སུ་ཞིག་རང་ཉིད་ཀྱི་ངལ་གསོའི་ནང་དུ་མི་ཞུགས་པར་དམ་བཅས་སམ་ཞེ༌ན། དེ་ནི་བཀའ་མི་སྲུང་བ་རྣམས་མ་ཡིན༌ནམ།
19 དེས་ན། ཁོ་རྣམས་ངལ་གསོའི་ནང་དུ་ཞུགས་མ་ནུས་པ་ནི་དད་པ་མེད་པའི་རྐྱེན་ཡིན་པ་ཤེས༌སོ།།