ལེའུ་དྲུག༌པ།
1 དེའི༌ཕྱིར། བདག་ཅག་གིས་སྐྱབས་མགོན་མཱ་ཤི་ཀའི་རྨང་གཞིའི་བསླབ་བྱ་ལས་བརྒལ་ནས། དད་པ་བརྟན་པོའི་ཕྱོགས་སུ་བརྩོན་དགོས་པ་ལས། ཡང་བསྐྱར་རྨང་གཞི་འདིང་མི་དགོས་ཏེ། དཔེར་ན། འཆི་རུ་འཇུག་པའི་སྤྱོད་ངན་ལས་འགྱོད་བཤགས་བྱེད་པ་དང་། དཀོན་མཆོག་ལ་དད༌པ་བྱེད་པ།
2 ཁྲུས་ཀྱི་མཛད་སྒོ་སྣ༌ཚོགས་བསྒྲུབ་པ། ལག་པ་གཞན་གྱི་ལུས་སྟེང་དུ་འཇོག༌པ། གཤིན་པོ་རྣམས་སླར་གསོན༌པ། རྫོགས་མཐའ་མེད་པའི་ལེགས་ཉེས་ཀྱི་ཁྲིམས་ཐག་གཅོད་པ་ལ་སོགས་པའི་བསླབ་བྱ་སྣ་ཚོགས་ལྟ་བུ་ཡིན་ནོ།།
3 དཀོན་མཆོག་ཐུགས་དགྱེས་ན། བདག་ཅག་གིས་དེ་ལྟར་བྱ་ངེས༌སོ།།
4 དེ་ཡང་སུ་ཞིག་ལན་གཅིག་བློ་གསལ་པོར་མཛད་ཅིང་ནམ་མཁའི་ཞིང་ཁམས་ཀྱི་གནང་སྦྱིན་གྱི་བྲོ་བ་མྱངས་པ༌དང༌། དམ་པའི་ཐུགས་ཉིད་ཀྱི་སྐལ་བ་ལྡན་པར་མ༌ཟད།
5 དཀོན་མཆོག་གི་བཀའ་ལེགས་པོ་དང་། བསྐལ་པ་འབྱུང་འགྱུར་གྱི་ནུས་མཐུའི་བྲོ་བ་མྱངས་ནའང་།
6 དེ་རྣམས་ཀྱིས་དད་པ་བསྐྱུར་ན། ཁོ་རྣམས་ཡང་བསྐྱར་འགྱོད་བཤགས་བྱེད་པར་བྱ་མི་ནུས་སོ།། ཅིའི་ཕྱིར་ཞེ་ན། དེ་རྣམས་ཀྱིས་དངོས་སུ་དཀོན་མཆོག་གི་སྲས་དེ་ཡང་བསྐྱར་ཤིང་རྒྱ་གྲམ་གྱི་སྟེང་དུ་བརྡབས་ཏེ། མངོན་སུམ་དུ་ཁོང་ལ་ངོ་གནོང་བར་བྱས་པའི་ཕྱིར་རོ།།
7 དེ་ནི་ས་ཞིང་ཞིག་བསྟུད་མར་བབས་པའི་ཆར་ཆུས་བརླན་པར་བྱས་ཤིང་། དེ་ལས་སྔོ་ཚོད་སྐྱེས་པ་དང་ཞིང་འདེབས་མཁན་རྣམས་ལ་མཁོ་བ་བཞིན་དུ་བཀོལ་སྤྱོད་བྱེད་པར་འོས༌ན། དེ་ནི་དཀོན་མཆོག་ནས་བྱིན་རླབས་ཐོབ་པ་ལྟ་བུ་ཡིན་མོད།
8 འོན་ཀྱང་། ས་ཞིང་དེ་ལས་ཚེར་མ་དང་སྤྱང་ཚེར་སྐྱེས་པ་ཡིན་ན། དེ་ཉིད་འདོར་ཞིང་དམོད་མོ་ཐེབས་ཉེན་ཆེ་བ་དང་། མཇུག་འབྲས་ནི་མེར་བསྲེག་པ་ལྟ་བུའོ།།
9 སྙིང་ནས་བརྩེ་བའི་སྤུན་ཟླ༌རྣམས། ངེད་ཅག་གིས་འདི་ལྟར་སྨྲས༌ནའང༌། ཁྱོད་རྣམས་ཀྱི་སྤྱོད་ལམ་དེ་དག་ལས་ལེགས་པ་དང་། ཁྱོད་རྣམས་ལ་ཐར་པ་དང་ལྡན་པའི་དོན་རྣམས་ཐོབ་ཡོད་པར་ཡིད་ཆེས་སོ།།
10 ཅིའི་ཕྱིར་ཞེ་ན། དཀོན་མཆོག་ནི་དྲང་བདེན་ཡིན་པས། ཁྱོད་ཅག་གིས་བྱས་པའི་ལས་བཟང་པོ་དང་ཁོང་གི་མཚན་ལ་བཅངས་པའི་བྱམས་པ་སྟེ། སྔོན་ཆད་དད་ལྡན་དམ་པ་རྣམས་ལ་ཞབས་ཕྱི་བསྒྲུབས་ཤིང་། ད་ལྟའང་སྒྲུབ་བཞིན་པའི་ལས་དེ་ཁོང་གིས་བརྗེད་མི་སྲིད༌པའི་ཕྱིར་ཡིན།
11 ཁྱོད་རྣམས་ལ་མཐའ་མཇུག་བར་དུ་རེ་བ་ཆེན་པོ་དང་ལྡན་པའི༌ཕྱིར། ཁྱོད་ཅག་མི་རེ་རེས་ལས་དེ་ལྟ་བུར་བརྩོན་རྒྱུ་ནི་ངེད་ཅག་གི་འདུན་པ་ཡིན༌ཏེ།
12 ཁྱོད་རྣམས་ལེ་ལོའི་དབང་དུ་མི་འགྲོ་བའི་ཕྱིར། དད་པ་དང་བཟོད་བསྲན་ལ་བརྟེན་ནས་ཞལ་བཞེས་ཐོབ་མཁན་རྣམས་མིག་དཔེར་འཛིན་དགོས་སོ།།
དཀོན་མཆོག་གི་འགྱུར་བ་མེད་པའི་ཞལ་བཞེས།
13 དེ་ཡང་དང་ཐོག་དཀོན་མཆོག་གིས་ཨབ་ར་ཧམ་ལ་ཞལ་བཞེས་གནང་བའི་དུས༌སུ། རང་ཉིད་ལས་ཆེན་པོ་ཞིག་རྟེན་ས་མེད་པས། ཁོང་གིས་རང་ཉིད་དཔང་དུ་བཙུགས་ནས་འདི་སྐད༌དུ།
14 བདག་གིས་ཁྱོད་ལ་བྱིན་རླབས་ཆེན་པོ་གནང་ངེས༌ཤིང༌། ཁྱོད་ཀྱི་རིགས་རྒྱུད་མང་དུ་སྤེལ་བར་བྱའོ་ཞེས་དམ་བཅས་སོ།།
15 དེ་ལྟར་ཨབ་ར་ཧམ་གྱིས་ཡུན་རིང་དུ་བཟོད་བསྲན་བྱས་རྗེས། ཞལ་བཞེས་གནང་བ་དེ་ཉིད་ཁོང་ལ་ཐོབ་པ་ཡིན༌ནོ།།
16 མི་སུ་ཡིན་ཡང་རང་ཉིད་ལས་ཆེན་པོ་ཞིག་དཔང་དུ་བཙུགས་ནས་དམ་བཅའ་བར་མ༌ཟད། དམ་བཅའི་ཚིག་གཞིར་བཟུང་ནས་རྩོད་གཞི་སྣ་ཚོགས་ཐག་གིས་གཅོད་པར་བྱེད་དོ།།
17 དེ་བཞིན་དུ་དཀོན་མཆོག་གིས་ཞལ་བཞེས་ཐོབ་མཁན་རྣམས་ལ་ཁོང་གི་ཐུགས་དགོངས་ནི་འགྱུར་བ་མེད་པ་དེ་ལས་ཀྱང་མངོན་གསལ་དུ་སྟོན་པར་དགོངས༌ཤིང་། དམ་བཅས་པར་བརྟེན་ནས་བདེན་དཔང་མཛད༌པ་ཡིན།
18 དེ་ནི་འགྱུར་བ་མེད་པའི་དོན་འདི་གཉིས་བརྒྱུད་ནས། དཀོན་མཆོག་གིས་ཞལ་རྫུན་གཏན་ནས་གསུང་མི་སྲིད་ཅིང་། བདག་ཅག་སྐྱབས་སུ་སོང་པ་རྣམས་ནི་བདག་ཅག་གི་མདུན་དུ་ལྷགས་པའི་རེ་བ་དེ་རང་སེམས་ལ་འཛིན་པར་སྙིང་སྟོབས་ཆེན་པོ་བསྐྱེད་ཐུབ་པའི་ཕྱིར་རོ།།
19 བདག་ཅག་གི་རེ་བ་ནི་སེམས་ཀྱི་གཏིང་རྡོ་ལྟ་བུ་ཡིན་ཏེ། སྲ་ཞིང་བརྟན་ལ་ཡོལ་བའི་རྒྱབ་ཀྱི་གནས་དེ་རུ་སླེབ་པ་ཡིན།
20 སྐྱབས་མགོན་ཡེ་ཤུ་ནི་བདག་ཅག་གི་ཆེད་དུ་སྔོན་འགྲོ་པ་ལྟར་གནས་དེ་རུ་ཕེབས་ཟིན་ཏེ། མཱལ་ཀི་ཚེ་དེག་གི་རིམ་པ་བཞིན་དུ་ཡུན་གཏན་གྱི་མཆོད་དཔོན་ཆེན་པོར་གྱུར༌པའོ།།